எத்தனை டிப்ஸ்கள், ஆலோசனைகள் கொடுத்தாலும் மன அழுத்தமில்லாத, தூக்கம்தான் கண்களின் ஆரோக்கியத்திற்கு சிறந்த மருத்துவம். தினமும் ஏதேனும் உடற்பயிற்சி செய்துவிட்டு ஆரோக்கியமான உணவுடன் வாழ தூக்கமும் தானாக வந்து சேரும். இதோ சில வீட்டிலேயே செய்யக் கூடிய கண்களுக்கான டிப்ஸ்கள்.
விளக்கெண்ணெய்: விளக்கெண்ணெய் ஒரு சொட்டு உள்ளங்கையில் எடுத்து கண்ணின் கீழ்ப்பகுதியில் பூச வேண்டும். இரவில் தூங்குவதற்கு முன்பாக கண்ணுக்கு கீழ் தடவி விட்டு காலையில் முகம் கழுவினால் கருவளையம் குறையும். இதை தொடர்ந்து ஒரு வாரம் பயன்படுத்தினால் போதும் என்பது குறிப்பிடத்தக்கது.
முட்டை: அவித்த முட்டையை வட்டமாக வெட்டி கண்களில் வைத்து கட்டிக் கொண்டு ஒரு மணி நேரம் கழித்து எடுத்தால், முட்டையின் நிறமே மாறியிருப்பதைக் காணலாம். கண்களில் உள்ள அதிகபடியான சூட்டைத் தணித்து குளிர்ச்சி கொடுக்கும். அதிக நேரம் கணினியில் வேலை செய்வோருக்கு இந்த முட்டை மருத்துவம் மகத்தானது.
வெள்ளரி: வெள்ளரியை வட்டமாக நறுக்கி கண்களில் அடிக்கடி வைத்தாலும் கண்களுக்குப் போதிய குளிர்ச்சிக் கிடைக்கும்.
பால்: ஏனைய கிளென்சர்களைக் காட்டிலும் சிறந்த ஆரோக்கியமான கிளென்சர் பால்தான். பாலை பஞ்சில் தொட்டு கண்களைச் சுற்றி மென்மையாக துடைக்க கருவளையம் நீங்கும். மேலும் சருமத்திற்குத் தேவையான மாய்ச்சரையும் கொடுக்கும்.
கற்றாழை: கற்றாழை ஜெல் கண்களைச் சுற்றி தடவி அடிக்கடி கழுவலாம். இதனால் கருவளையம் மட்டுமின்றி வயதாவதால் உண்டாகும் சுருக்கங்களையும் கூட கற்றாழை நீக்கும்.
– கவிதா பாலாஜி கணேஷ்