சென்னை: நாடாளுமன்ற தேர்தலில் தமிழகத்தில் பிரசாரம் செய்யும் அரசியல் கட்சிகள் கொடுத்துள்ள நட்சத்திர பேச்சாளர்கள் பெயர் பட்டியலை தேர்தல் கமிஷன் வெளியிட்டுள்ளது. அதில் 29 கட்சிகளை சேர்ந்த 640 பேச்சாளர்களுக்கு நட்சத்திர அந்தஸ்துடன் அனுமதி வழங்கப்பட்டு உள்ளது. இதில் தி.மு.க. நட்சத்திர பேச்சாளர்களின் பட்டியலில் முதல்வர் மு.க.ஸ்டாலின் உள்ளிட்ட 40 பேர் பெயர்கள் இடம் பெற்றுள்ளன. இந்த பட்டியலில் 33வதாக நடிகர் கருணாஸ் பெயரும், 35வதாக நடிகர் கமல்ஹாசன் பெயரும் இடம் பெற்றுள்ளது. மக்கள் நீதி மய்யம் கட்சியில் கமல்ஹாசன் பெயருடன் 9 பேர் இடம் பெற்றுள்ளனர்.
அதிமுக நட்சத்திர பேச்சாளர் பட்டியலில் பொதுச்செயலாளர் எடப்பாடி உள்ளிட்ட 40 பேர் உள்ளனர். இதில் நடிகைகள் விந்தியா, கவுதமி, காயத்ரி ரகுராம், நிர்மலா பெரியசாமி, நடிகர் சிங்கமுத்து பெயர்களும், தமாகா பட்டியலில் ஜி.கே.வாசன், சுரேஷ், சக்தி வடிவேல், விடியல் சேகர், முனவர் பாஷா, ராஜம் எம்.பி.நாதன், ஜி.ஆர்.வெங்கடேஷ் உள்ளிட்ட 20 பேரும் இடம் பெற்றுள்ளனர். பா.ஜ பட்டியலில் பிரதமர் மோடி, அமித்ஷா, ஜே.பி.நட்டா, நிர்மலா சீதாராமன், யோகி ஆதித்யநாத் பெயர்களுடன் அண்ணாமலை, ஓ.பன்னீர்செல்வம், டி.டி.வி.தினகரன், ஜி.கே.வாசன், ராமதாஸ், அன்புமணி, தமிழருவி மணியன், எச்.ராஜா, குஷ்பு, சரத்குமார் உள்ளிட்ட 40 பேர் இடம்பெற்றுள்ளனர். காங்கிரஸ், பாமக கட்சிகள் இதுவரை நட்சத்திர பேச்சாளர்களின் பட்டியலை அளிக்கவில்லை.
