சென்னை: சென்னை அமலாக்கத்துறை நடத்திய சோதனையில், ஆர்.ஆர். நிறுவனத்திடம் இருந்து ரூ.850 கோடி மதிப்புள்ள சொத்து ஆவணங்கள் பறிமுதல் செய்யப்பட்டுள்ளது. இது குறித்து அமலாக்கத்துறை வெளியிட்டுள்ள அறிக்கை: அமலாக்க இயக்குனரகம், பணமோசடி தடுப்புச் சட்டம் 2002ன் விதிகளின் கீழ் கடந்த டிசம்பர் 28ம் தேதி சென்னை ஆர்.ஆர். குழுமத்தின் விளம்பரதாரர் மற்றும் மொரீஷியசின் கவுரவ ஆலோசகர் ரவி ராமன் ஆகியோருடன் தொடர்புடைய 8 இடங்களில் அமலாக்கத்துறை அதிகாரிகள் சோதனை நடத்தினர்.
வெளிநாட்டு நிதி முதலீடுகளை மோசடி செய்ததற்காக ரவி ராமன் மற்றும் அவரது மனைவி ஷோபனா ரவிக்கு எதிராக சென்னை மத்தியக் குற்றப்பிரிவு பதிந்த வழக்கின் அடிப்படையில் அமலாக்கத்துறை இந்த விசாரணையை தொடங்கியது. ஓல்ட் லேன் குழுமத்திடம் இருந்து ஆர்.ஆர். குழுமம் சார்பில் 117 கோடி பெறப்பட்டது. விசாரணையில் ரவி ராமன் ரூ.5 கோடி நிதி மோசடி செய்தது தெரியவந்தது. மேலும், அம்பத்தூரில் ஒரு தொழில்நுட்ப பூங்காவை மேம்படுத்துவதற்காக வெளிநாட்டு முதலீட்டாளரிடம் 117 கோடி ரூபாய் பெறப்பட்டது.
ஓல்ட் லேன் இந்தியா வாய்ப்புகள் எப்டிஐ வடிவில் வெளிநாட்டு முதலீட்டாளரிடமிருந்து பெறப்பட்ட நிதிகளுக்குப் பதிலாக குழு நிறுவனங்களின் சில சொத்துகள் பிணையாக, பாதுகாப்பாக வைக்கப்பட்டு, வெளிநாட்டு முதலீட்டாளருக்கு ஆதரவாக மாற்ற முடியாத கையொப்பம் இடப்பட்டது. மேலும், அடகு வைத்த சொத்து ஆவணங்கள் தொலைந்து போனதன் அடிப்படையில் ரவி ராமன் போலி எப்.ஐ.ஆர் பதிவு செய்துள்ளார். இந்தோனேசிய நிலக்கரி சுரங்கங்களில் மேலும் முதலீடு செய்யப்பட்ட தனது சிங்கப்பூர் நிறுவனமான ஆர்ஆர் இன்டஸ்ட்ரீஸ் சிங்கப்பூர் பிரைவேட் லிமிடெட் மூலம் குற்றச் செயல்களின் போது ரவி ராமன் சில நிதிகளைப் பறித்துள்ளார் என்பதும் அவரது உறவினர் மூலம் தெரியவந்துள்ளது.
சோதனையில் சுமார் ரூ. 74 லட்சம் கணக்கில் வராத ரொக்கம், சொத்து பத்திரங்கள் என ரூ.850 கோடி மதிப்புள்ள சொத்து ஆவணங்கள் பறிமுதல் செய்யப்பட்டுள்ளது. மேலும், மின்னணு சாதனங்கள் மற்றும் குற்றவியல் ஆவணங்கள் கைப்பற்றப்பட்டன. ஆர்.ஆர் குழுமம் வெளிநாட்டு நிறுவனங்களிடமிருந்து பிற வெளிநாட்டு முதலீடுகளை பெற்றுள்ளதும் விசாரணையில் தெரியவந்துள்ளது. தொடர்ந்து விசாரணை நடக்கிறது.
