சென்னை: தமிழகத்தில் நாடாளுமன்ற தேர்தலில் அதிமுகவுடன் பாமக கூட்டணி ஏற்படும் என்று கூறப்பட்ட நிலையில், நேற்று திடீரென பேச்சுவார்த்தையை முறித்துக் கொண்டு, பாஜ பக்கம் பாமக தாவி விட்டது. தற்போது அதிமுக – தேமுதிக கூட்டணியாவது ஏற்படுமா என்ற கேள்வி எழுந்துள்ளது. இன்று அல்லது நாளை தேமுதிகவுடன் ஒப்பந்தம் ஏற்பட வாய்ப்புள்ளதாகவும் கூறப்படுகிறது. தமிழகம் மற்றும் புதுச்சேரியில் மொத்தமுள்ள 40 நாடாளுமன்ற தொகுதிக்கும் ஒரே கட்டமாக ஏப்ரல் 19ம் தேதி தேர்தல் நடைபெறும் என்று இந்திய தலைமை தேர்தல் ஆணையம் அறிவித்துள்ளது.
திமுக தலைமையிலான கூட்டணியில் தொகுதி பங்கீடு முடிந்து வேட்பாளர்களும் அறிவிக்கப்பட்டு வருகிறார்கள். ஆனால், அதிமுகவில் இதுவரை கூட்டணி கட்சிகள் பெரிய அளவில் யாரும் இடம்பெறவில்லை. பாமக, தேமுதிக கூட்டணியில் இணையலாம் என்று கூறப்பட்டது. ஆனால், பாமக அதிமுக கூட்டணிக்கு வரவில்லை. நேற்று தைலாபுரம் தோட்டத்தில் நடந்த பாமக மாவட்ட செயலாளர்கள் கூட்டத்தில் பாஜவுடன் பாமக கூட்டணி வைக்க இருப்பதாக அதிகாரப்பூர்வமாக அறிவிக்கப்பட்டது.
இந்நிலையில், அதிமுக – தேமுதிக இடையே இதுவரை 3 கட்ட பேச்சுவார்த்தை நடந்தது. இதில் தேமுதிக 5 தொகுதி, ஒரு மாநிலங்களவை சீட் கேட்டு வந்தனர். ஆனால், அதிமுக தரப்பில் இறுதியாக 3 தொகுதிகள் மட்டுமே தேமுதிகவுக்கு தர முடியும் என்றும், மாநிலங்களவை சீட் வழங்க முடியாது என்றும் உறுதியாக கூறி விட்டது. இதனால், விரக்தி அடைந்த தேமுதிக பொதுச்செயலாளர் பிரேமலதா, தமிழகம் மற்றும் புதுச்சேரியில் மொத்தமுள்ள 40 எம்பி சீட்டுக்கும் போட்டியிட விரும்புகிறவர்கள் 19ம் தேதி (இன்று), 20ம் தேதி ஆகிய இரு நாட்கள் விருப்ப மனு அளிக்கலாம். 21ம் தேதி நேர்காணல் நடைபெறும் என்று நேற்று முன்தினம் அறிவித்தார்.
ஆனாலும், தேமுதிக நிர்வாகிகள் அதிமுக கூட்டணியில் தொடர விருப்பம் தெரிவித்து வருகின்றனர். அதனால், அதிமுக கொடுக்கும் சீட்டை பெற்றுக் கொண்டு கூட்டணியில் இடம்பெற முடிவு செய்யப்பட்டுள்ளதாக கூறப்படுகிறது. இதை தொடர்ந்து 20ம் தேதி (நாளை) எடப்பாடி பழனிசாமியுடன் தேமுதிகவும் கூட்டணி ஒப்பந்தத்தில் கையெழுத்திட வாய்ப்புள்ளது. இந்நிலையில் கூட்டணி பேச்சுவார்த்தை குழுவில் இடம்பெற்றுள்ள கே.பி.முனுசாமி, தங்கமணி, வேலுமணி ஆகியோருடன் அதிமுக பொதுச்செயலாளர் எடப்பாடி பழனிசாமி நேற்று நீண்டநேரம் ஆலோசனை நடத்தி உள்ளது குறிப்பிடத்தக்கது.