புதுடெல்லி: ‘சாத்தான்குளம் தந்தை, மகன் கொலை தொடர்பாக நடத்தப்படும் வழக்கு விசாரணைக்கு தடை விதிக்க முடியாது,’ என உச்ச நீதிமன்றம் உத்தரவிட்டுள்ளது. தூத்துக்குடி மாவட்டம், சாத்தான்குளத்தில் தந்தை, மகன் (ஜெயராஜ், பென்னிக்ஸ்) ஆகியோர் போலீசால் கைது செய்யப்பட்டு அடித்து கொல்லப்பட்டது தொடர்பான வழக்கை சிபிஐ விசாரித்து வருகிறது. மேலும், இது சம்பந்தப்பட்ட பிரதான வழக்கு மதுரை முதலாவது கூடுதல் அமர்வு நீதிமன்றத்தில் விசாரணையில் இருந்து வருகிறது. இந்நிலையில், இந்த வழக்கில் கைது செய்யப்பட்டு சிறையில் இருக்கும் காவலர் ரகு கணேஷ் சார்பில் உச்ச நீதிமன்றத்தில் மேல்முறையீடு மனு தாக்கல் செய்யப்பட்டுள்ளது. அதில், ‘மதுரை நீதிமன்றத்தில் நடக்கும் வழக்கை கேரளாவுக்கு மாற்ற உத்தரவிட வேண்டும். இது தொடர்பான வழக்கை 6 மாதத்தில் விசாரித்து முடிக்க வேண்டும் என உயர் நீதிமன்ற மதுரை கிளை வழங்கிய உத்தரவுக்கும், மதுரை கூடுதல் அமர்வில் இருக்கும் விசாரணை ஆகியவற்றுக்கும் தடை விதிக்க வேண்டும்,’ என தெரிவிக்கப்பட்டது.இந்த வழக்கு நீதிபதி இந்திரா பானர்ஜி தலைமையிலான அமர்வில் நேற்று விசாரணைக்கு வந்தது. பின்னர், நீதிபதிகள் பிறப்பித்த உத்தரவில், ‘‘மனுதாரர் கூறுவது போல், இந்த விவகாரத்தில் எந்தவித அரசியல் தலையீடும் இருப்பதாக தெரியவில்லை. அதனால், இந்த வழக்கு விசாரணைக்கு தடை விதிக்கவோ அல்லது வேறு மாநிலத்திற்கு மாற்றி அமைக்கவோ கண்டிப்பாக முடியாது,’ என தெரிவித்தனர். அப்போது குறுக்கிட்ட தமிழக அரசு தரப்பு மூத்த வழக்கறிஞர் பி.எஸ்.நரசிம்மா மற்றும் வழக்கறிஞர் குமணன், ‘இது தொடர்பாக பதிலளிக்க அவகாசம் வழங்க வேண்டும்,’ என்றனர். இதை ஏற்ற நீதிபதிகள், வழக்கை கோடை கால விடுமுறைக்கு பின்னர் ஒத்திவைத்தனர்….
@2024-2025 – Designed and Developed by Sortd.Mobi