டெல்லி : நிலவின் தென் துருவத்தில் சந்திரயா-3 விண்கலம் வெற்றிகரமாக தரை இறங்கிய ஆகஸ்ட் 23-ந் தேதி இனி “தேசிய விண்வெளி தினம்” என கொண்டாடப்படுவதற்கு பிரதமர் மோடி தலைமையிலான மத்திய அமைச்சரவை நேற்று ஒப்புதல் அளித்தது. அதேபோல சந்திரயான் -3 தரை இறங்கிய இடத்துக்கு சிவசக்தி என பெயரிடப்பட்டதற்கும் மத்திய அமைச்சரவை வரவேற்பு தெரிவித்துள்ளது.இது தொடர்பான மத்திய அமைச்சரவை தீர்மானம்: நிலவுக்கு சந்திரயான் -3 திட்டத்தின் வரலாற்று வெற்றியைக் கொண்டாடுவதில் மத்திய அமைச்சரவை நாட்டு மக்களுடன் இணைகிறது. நமது விஞ்ஞானிகளின் மகத்தான சாதனையையும் அமைச்சரவை பாராட்டுகிறது. இது நமது விண்வெளி நிறுவனத்திற்கு கிடைத்த வெற்றி மட்டுமல்ல, உலக அரங்கில் இந்தியாவின் முன்னேற்றம் மற்றும் ஏற்றத்தின் பிரகாசமான அடையாளமாகும். ஆகஸ்ட் 23-ம் தேதி “தேசிய விண்வெளி தினமாக” கொண்டாடப்படுவதை அமைச்சரவை வரவேற்கிறது.
நிலவின் தென் துருவத்திற்கு அருகில் தரையிறங்கிய முதல் நாடு இந்தியா. கணிக்கப்பட்ட துல்லியத்துடன், நிலவில் தரையிறங்குவது ஒரு முக்கியமான சாதனையாகும். கடினமான சூழ்நிலைகளை கடந்து, நிலவின் தென்துருவம் அருகே தரையிறங்குவது, பல நூற்றாண்டுகளாக மனித அறிவின் எல்லைகளை உயர்த்த முயன்று வரும் நமது விஞ்ஞானிகளின் மனப்பான்மைக்கு ஒரு சான்றாகும். சந்திரனில் இருந்து ‘பிரக்யான்’ ரோவர் அனுப்பும் தகவல் வளம் அறிவை மேம்படுத்துவதோடு, சந்திரன் மற்றும் அதற்கு அப்பால் உள்ள மர்மங்கள் குறித்த அடிப்படை கண்டுபிடிப்புகளுக்கும் நுண்ணறிவுகளுக்கும் வழிவகுக்கும்.சந்திரயான் -3 ன் வெற்றி மற்றும் பொதுவாக இந்தியாவின் விண்வெளித் திட்டத்தின் வெற்றிக்கு ஏராளமான பெண் விஞ்ஞானிகள் பங்களித்துள்ளனர் என்பதைக் கண்டு அமைச்சரவை பெருமிதம் கொள்கிறது. இது வரும் ஆண்டுகளில் பல ஆர்வமுள்ள பெண் விஞ்ஞானிகளுக்கு ஊக்கமளிக்கும்.
நிலவில் உள்ள இரண்டு புள்ளிகளுக்கு திரங்கா பாயிண்ட் (சந்திரயான் -2 இன் கால்தடம்) மற்றும் சிவசக்தி புள்ளி (சந்திரயான் -3 இன் தரையிறங்கிய இடம்) என்று பெயரிடப்பட்டதை அமைச்சரவை வரவேற்கிறது. இந்தப் பெயர்கள் நவீனத்துவ உணர்வைத் தழுவும் அதே வேளையில் நமது கடந்த காலத்தின் சாராம்சத்தை அழகாகப் படம்பிடித்துக் காட்டுகின்றன. இந்த பெயர்கள் வெறும் தலைப்புகளை விட அதிகம். அவை நமது ஆயிரக்கணக்கான ஆண்டுகள் பழமையான பாரம்பரியத்தை நமது அறிவியல் விருப்பங்களுடன் நுணுக்கமாக இணைக்கும் ஒரு நூலை நிறுவுகின்றன.. 2047-ம் ஆண்டுக்குள் இந்தியாவை வளர்ச்சியடைந்த நாடாக உருவாக்க நாட்டு மக்கள், தங்கள் இதயங்களில் மகிழ்ச்சியும் பெருமிதமும் நிறைந்து தங்களை அர்ப்பணித்துக் கொள்வார்கள் என்றும் அமைச்சரவை நம்பிக்கை தெரிவிக்கிறது,”.இவ்வாறு மத்திய அமைச்சரவை தீர்மானத்தில் தெரிவிக்கப்பட்டுள்ளது.