ஆவடி: ஆவடி அருகே கல்லூரி மாணவி தூக்கிட்டு தற்கொலை செய்துகொண்டது குறித்து போலீசார் விசாரணை நடத்தி வருகின்றனர். ஆவடி அடுத்த பட்டாபிராம், அணைக்கட்டு சேரி, ஈஸ்வரன் கோயில் தெருவைச் சேர்ந்தவர் சிவராஜ். இவரது மகள் பத்மஸ்ரீ(20) சென்னை ராணி மேரி கல்லூரியில் மூன்றாம் ஆண்டு பயோ கெமிஸ்ட்ரி படித்து வந்தார். நேற்று முன்தினம் வழக்கம்போல் கல்லூரி முடிந்து வீட்டிற்கு வந்த பத்மஸ்ரீ, வீட்டில் யாரும் இல்லாத நேரத்தில் படுக்கை அறையில் தூக்கு மாட்டிக் கொண்டார்.
இரவு 8 மணியளவில் அவரது சித்தப்பா வீட்டிற்கு வந்து பார்த்தபோது, தூக்கில் தொங்கிய நிலையில் இருந்த பத்மஸ்ரீயை மீட்டு ஆவடி அரசு மருத்துவமனைக்கு கொண்டு சென்றார். அங்கு அவரை பரிசோதித்த மருத்துவர்கள் ஏற்கனவே பத்மஸ்ரீ இறந்து விட்டதாக தெரிவித்தனர். இது குறித்த புகாரின் பேரில் பட்டாபிராம் போலீசார் வழக்குப்பதிவு செய்து பத்மஸ்ரீயின் உடலை மீட்டு பிரேத பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்து விசாரித்து வருகின்றனர். கல்லூரி மாணவி தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது.