திருவெண்ணெய்நல்லூர், மே 25: ஊருக்குள் புகுந்த காட்டுப்பன்றி 10க்கும் மேற்பட்டோரை துரத்தி துரத்தி கடித்ததால் பொதுமக்கள் அச்சத்தில் உள்ளனர். விழுப்புரம் மாவட்டம் திருவெண்ணெய்நல்லூர் அருகே உள்ள சித்தானங்கூர் கிராமத்தில் நேற்று காலை 9 மணியளவில் காட்டுப்பன்றி ஒன்று ஊருக்குள் புகுந்தது. இதை கண்ட பொதுமக்கள் அலறி அடித்து கொண்டு ஓடினர். அப்போது அப்பகுதியை சேர்ந்த ஏழுமலை மனைவி செல்வி(38) என்பவரை காட்டுப்பன்றி கடித்தது.
அவரது கணவர் ஏழுமலை (42) பன்றியை துரத்த முயன்றபோது அவரது கால்களை கடித்து குதறியது. தொடர்ந்து அதே பகுதியை சேர்ந்த சிவகுமார் (45), ஜெகநாதன் (50), விருத்தாம்பாள் (60), விக்னேஷ் (25), ராமமூர்த்தி(43) ஆகியோரையும் கடித்தது. இதையடுத்து தடி மற்றும் கம்புகளை கொண்டு பன்றியை துரத்தியபோது, அருகில் உள்ள மாமந்தூர் கிராமத்திற்கு சென்று பரசுராமன் (48) என்பவரை கடித்தது. பொதுமக்கள் துரத்தியதில், மீண்டும் சித்தானங்கூரில் உள்ள கரும்பு தோட்டத்தில் புகுந்து கொண்டது.
கிராமமக்கள் தடி மற்றும் கம்புகளுடன் கரும்பு தோட்டத்தை சுற்றி வளைத்து பன்றியை பிடிக்க முயன்றபோது ஆலங்குப்பம் கிராமத்தைச் சேர்ந்த பிரபு (20) என்பவரை கடித்தது. தகவல் அறிந்த விழுப்புரம் மாவட்ட வனத்துறை அலுவலர் சோமேஷ் சோமன், உளுந்தூர்பேட்டை வனச்சரகர் ரவி, திருவெண்ணெய்நல்லூர் தாசில்தார் ராஜ்குமார், தீயணைப்பு மற்றும் மீட்பு படை நிலைய அலுவலர் தலைமையிலான தீயணைப்பு படையினர், திருவெண்ணெய்நல்லூர் காவல் ஆய்வாளர் மைக்கேல் இருதயராஜ் மற்றும் போலீசார் வந்து காட்டுப்பன்றியை பிடிக்க முயன்றபோது, அதில் ஒருவரின் காலில் கடித்தது.
இதனால் அச்சமடைந்த பொதுமக்கள், அதிகாரிகளை முற்றுகையிட்டு, காட்டுப்பன்றியை உடனடியாக பிடிக்க வேண்டும் என வாக்குவாதத்தில் ஈடுபட்டனர். பின்னர் டிரோன்கள் கொண்டு வரப்பட்டு கரும்பு தோட்டத்தின் மேலே பறக்கவிட்டு காட்டுப்பன்றியை கண்காணித்து அதை பிடிக்கும் பணியில் ஈடுபட்டனர். சுமார் 5 மணி நேர போராட்டத்திற்கு பிறகு வலை வீசி காட்டுப்பன்றியை பிடித்தனர். இதை தொடர்ந்து அப்பகுதி மக்கள் நிம்மதி அடைந்தனர்.