மாட்ரிட்: ஸ்பெயினில் நடந்த மாட்ரிட் ஓபன் டென்னிஸ் தொடரின் மகளிர் ஒற்றையர் பிரிவில், நம்பர் 1 வீராங்கனை இகா ஸ்வியாடெக் (போலந்து) முதல் முறையாக சாம்பியன் பட்டம் வென்றார். பரபரப்பான இறுதிப் போட்டியில் 2வது ரேங்க் வீராங்கனை அரினா சபலென்காவுடன் (பெலாரஸ், 26 வயது) மோதிய ஸ்வியாடெக் (22 வயது) 7-5 என்ற கணக்கில் முதல் செட்டை கைப்பற்றி முன்னிலை பெற்றார்.
2வது செட்டில் கடும் நெருக்கடி கொடுத்த சபலென்கா 6-4 என வென்று பதிலடி கொடுக்க சமநிலை ஏற்பட்டது. இதைத் தொடர்ந்து, 3வது மற்றும் கடைசி செட் ஆட்டத்தில் அனல் பறந்தது. இரு வீராங்கனைகளும் விடாப்பிடியாக தங்கள் சர்வீஸ் ஆட்டத்தில் புள்ளிகளைக் குவித்து முன்னேற, ஆட்டம் டை பிரேக்கர் வரை இழுபறியாக நீடித்தது.
3 மணி, 11 நிமிடத்துக்கு நடந்த இப்போட்டியில் ஸ்வியாடெக் 7-5, 4-6, 7-6 (9-7) என்ற செட் கணக்கில் போராடி வென்று முதல் முறையாக மாட்ரிட் ஓபனில் பட்டம் வென்று சாதனை படைத்தார். சபலென்கா 3 முறை சாம்பியன்ஷிப் பாயின்ட் வரை சென்றும், அதை இகா முறியடித்து கோப்பையை கைப்பற்றியது குறிப்பிடத்தக்கது. நடப்பு சீசனில் 3வது சாம்பியன் பட்டம் வென்றுள்ள ஸ்வியாடெக், மொத்தம் 20 பட்டங்களை வசப்படுத்தி உள்ளார்.