சென்னை: அயோத்திதாச பண்டிதர் குடியிருப்புகள் மேம்பாட்டு திட்டத்தை செயல்படுத்த இந்த நிதியாண்டிற்கு ரூ.200 கோடி நிதி ஒதுக்கீடு செய்து தமிழக அரசு உத்தரவிட்டுள்ளது. இதுகுறித்து ஆதிதிராவிடர் மற்றும் பழங்குடியினர் நலத்துறை செயலாளர் நேற்று வெளியிட்டுள்ள அறிக்கை: பேரவையில் நிதி அமைச்சர் 2023-24ம் ஆண்டிற்கான வரவு செலவு திட்ட உரையில், “நகர்ப்புற பகுதிகளிலும் ஊரக பகுதிகளிலும் ஆதிதிராவிடர் குடியிருப்புகளில் அடிப்படை வசதிகளை உறுதி செய்து, முழுமையான சமூக, பொருளாதார வளர்ச்சியை ஏற்படுத்த அயோத்திதாச பண்டிதர் குடியிருப்புகள் மேம்பாட்டு திட்டம் 5 ஆண்டுகளில் ரூ.1000 கோடி செலவில் செயல்படுத்தப்பட உள்ளது” என்று அறிவித்தார். இதற்கிணங்க, இத்திட்டத்தை செயல்படுத்தும் வகையில் 5 ஆண்டுகளுக்கு ரூ.1000 கோடிக்கான நிர்வாக அனுமதியும், 2023-24ம் நிதியாண்டிற்கு ரூ.200 கோடி நிதி ஒதுக்கீடும் செய்து ஆதிதிராவிடர் மற்றும் பழங்குடியினர் நலத்துறை சார்பில் ஆணைகள் வெளியிடப்பட்டுள்ளன.