தர்மபுரி, மார்ச் 24: பாலக்கோடு அண்ணாநகர் பகுதியைச் சேர்ந்த செந்தில்குமார் மகன் சக்திவேல்(21). பிஎஸ்சி பட்டதாரியான இவர், கல்லூரியில் படிக்கும்போது இருந்து கடந்த 3 ஆண்டுகளாக கிரிக்கெட் போட்டியில் பங்கேற்று வருகிறார். ரெட் டென்னிஸ் பால் கிரிக்கெட் போட்டியில் பல்வேறு பதக்கங்களை பெற்றுள்ளார். இதையடுத்து, வரும் 25ம் தேதி நேபாளத்தில் நடைபெறும் 2023-2024ம் ஆண்டுக்கான 3வது தெற்காசிய சாம்பியன்ஷிப் கிரிக்கெட் போட்டியில் விளையாட சக்திவேல் தேர்வு செய்யப்பட்டுள்ளார். இப்போட்டியில் இந்தியா, இலங்கை, நேபாளம் நாடுகள் பங்கேற்கின்றன. இந்திய அணிக்காக சக்திவேல் விளையாட உள்ளார் என்பது குறிப்பிடத்தக்கது.