அமீரகம், ஸ்வீடன், நார்வே உட்பட 5 நாடுகளுக்கு பிரதமர் மோடி பயணம்

புதுடெல்லி: பிரதமர் மோடி வரும் 15ம் தேதி முதல் 20ம் தேதி வரை ஐந்து நாடுகளில் ஆறு நாட்கள் அரசுமுறை சுற்றுப்பயணம் மேற்கொள்ள உள்ளார். தனது பயணத்தின் முதல் கட்டமாக வரும் 15ம் தேதி ஐக்கிய அரபு அமீரகம் செல்லும் அவர், அந்நாட்டு அதிபர் ஷேக் முகமது பின் சையத் அல் நஹ்யானை நேரில் சந்தித்து பேசுகிறார்.

இந்த சந்திப்பின் போது எரிசக்தி பாதுகாப்பு, அங்கு வசிக்கும் 45 லட்சம் இந்தியர்களின் நலன் மற்றும் பிராந்திய நிலைத்தன்மை குறித்து ஆலோசிக்கப்படுகிறது. தொடர்ந்து நெதர்லாந்து செல்லும் பிரதமர், அந்நாட்டு மன்னர் வில்லியம் அலெக்சாண்டர் மற்றும் பிரதமர் ராப் ஜெட்டனை சந்தித்து செமிகண்டக்டர், பசுமை ஹைட்ரஜன் மற்றும் நீர் மேலாண்மை துறைகளில் ஒத்துழைப்பை மேம்படுத்துவது குறித்து விவாதிக்கிறார்.

வரும் 17ம் தேதி முதல் 18ம் தேதி வரை ஸ்வீடன் நாட்டின் கோதன்பர்க் நகரில் பிரதமர் உல்ப் கிறிஸ்டர்சனை சந்திக்கும் பிரதமர் மோடி, ஐரோப்பிய ஆணைய தலைவருடன் இணைந்து தொழில் துறை மாநாட்டில் பங்கேற்கிறார். அதன்பின் 18ம் தேதி மற்றும் 19ம் தேதிகளில் நார்வே செல்லும் அவர், மன்னர் ஐந்தாம் ஹரால்டு மற்றும் பிரதமர் ஜோனாஸ் கர் ஸ்டோரை சந்தித்து சுமார் 2,35,000 கோடி ரூபாய் (28 பில்லியன் டாலர்) முதலீடுகளை இந்திய சந்தையில் ஈர்ப்பது குறித்து விரிவாக பேசுகிறார்.

ஓஸ்லோவில் நடைபெறும் 3வது இந்தியா-நோர்டிக் உச்சி மாநாட்டில் பங்கேற்று ஆர்க்டிக் ஆராய்ச்சி மற்றும் புதுப்பிக்கத்தக்க எரிசக்தி குறித்து ஐந்து நாட்டு தலைவர்களுடன் ஆலோசனை நடத்துகிறார். இறுதியாக 19ம் தேதி மற்றும் 20ம் தேதிகளில் இத்தாலி செல்லும் பிரதமர், அந்நாட்டு பிரதமர் ஜார்ஜியா மெலோனி மற்றும் அதிபர் செர்ஜியோ மேட்டரெல்லாவை சந்திக்கிறார்.