*அதிகாரிகளுக்கு கலெக்டர் அறிவுரை
திருப்பதி : திருப்பதியில் நடந்த ஆலோசனை கூட்டத்தில் பள்ளிகளில் மாணவர் சேர்க்கை சதவீதத்தை அதிகரிக்க நடவடிக்கை எடுக்க வேண்டும் என அதிகாரிகளுக்கு கலெக்டர் அறிவுரை வழங்கினார். திருப்பதி கலெக்டர் அலுவலக கூட்டரங்கில் நேற்று, கல்வித் துறையின் மொத்தப் பதிவு விகிதக் கணக்கெடுப்பு அறிக்கையின் அடிப்படையில், மாவட்டக் கல்வித் துறை அலுவலர், மண்டலக் கல்வித் துறை அலுவலர்கள், மாவட்ட கிராம வார்டு செயலக அலுவலர் ஆகியோருடன் ஆலோசனை கூட்டம் கலெக்டர் வெங்கட ரமணா தலைமையில் நடைபெற்றது.
கூட்டத்தில் கலெக்டர் வெங்கட ரமணா பேசியதாவது: மாநில அரசின் வழிகாட்டுதலின்படி, ஒவ்வொரு பள்ளியிலும் மாணவர் சேர்க்கை சதவீதத்தை அதிகரிக்க சம்பந்தப்பட்ட அதிகாரிகள் நடவடிக்கை எடுக்க வேண்டும். பள்ளியில் சேராத மாணவர்களை சேர்க்க திட்டமிட்டு நடவடிக்கை எடுக்க வேண்டும்.
கள அளவில், அனைத்து மண்டலக் கல்வித் துறை அலுவலர்களும் தினமும் தலைமைச் செயலகங்களுக்குச் சென்று நல உதவியாளர்கள் மற்றும் தன்னார்வலர்களை ஒருங்கிணைந்து கணக்கெடுப்பை முடித்த பின், 10ம் வகுப்பு தேர்ச்சி பெற்றவர்கள், இடைநின்ற மாணவர்கள் உட்பட, எத்தனை மாணவர்கள் படிக்கின்றனர், பள்ளி கல்லூரியில் சேர்ந்த குழந்தைகள், புலம் பெயர்ந்த மாணவர்கள் விவரங்களை பதிவு செய்ய வேண்டும்.
சம்பந்தப்பட்ட பள்ளி மற்றும் கல்லூரி நிர்வாகம் குழந்தை தகவல் போர்ட்டலில் 100 சதவீதம் பதிவு செய்ய வேண்டும். ஒவ்வொரு பள்ளி குழந்தையும் பள்ளியில் இருப்பதை உறுதி செய்ய அனைவரும் ஒன்றிணைந்து செயல்பட வேண்டும். இவ்வாறு அவர் பேசினார்.
