கரகாட்: பாம்பைப்போன்றது பயங்கரவாதம். அது மீண்டும் தலைதூக்கினால் முற்றிலும் ஒழிக்கப்படும் என்று பிரதமர் மோடி பேசினார்.பிரதமர் மோடி நேற்று பீகார் மாநிலத்தில் சுற்றுப்பயணம் மேற்கொண்டார். கரகாட்டில் ரூ.48,520 கோடிக்கும் அதிகமான மதிப்புள்ள வளர்ச்சித் திட்டங்களை தொடங்கி வைத்து அவர் பேசியதாவது: ஆபரேஷன் சிந்தூர் இந்தியாவின் அம்பறாத்தூணில் இருந்து வெளிவந்த ஒரு அம்புதான். எனவே பயங்கரவாதத்திற்கு எதிரான போராட்டம் இன்னும் முடிவடையவில்லை, நிறுத்தப்படவில்லை.
பஹல்காமில் நடந்த கொடூரமான தாக்குதலுக்கு ஒரு நாள் கழித்து நான் பீகாருக்கு வந்தேன், பஹல்காமில் எங்கள் சகோதரிகள் பலர் தங்கள் கணவர்களை இழந்தனர். குற்றவாளிகளுக்கு அவர்கள் கனவில் கூட நினைக்காத தண்டனை கிடைக்கும் என்று நான் உறுதியளித்திருந்தேன். இன்று, வாக்குறுதியை நிறைவேற்றிய பிறகு, நான் பீகாரில் திரும்பி வந்துள்ளேன்.
இந்திய மகள்கள் அணியும் குங்குமத்தின் சக்தியை பாகிஸ்தான் மற்றும் முழு உலகமும் கண்டது. பயங்கரவாதிகள் பாகிஸ்தான் ராணுவத்தின் பாதுகாப்பின் கீழ் பாதுகாப்பாக உணர்ந்தனர். ஆனால் நாங்கள் அவர்களை மண்டியிட வைத்தோம். பாகிஸ்தானின் விமானப்படை தளங்களையும் அவர்களின் ராணுவ தளங்களையும் அழித்தோம். இது புதிய இந்தியா. அதன் சக்தி அனைவரும் பார்க்கக்கூடியது.
பாம்பை்போன்றது பயங்கரவாதம். அது மீண்டும் தனது கவசத்தை உயர்த்த முயன்றால், அது அதன் குழியிலிருந்து வெளியே இழுக்கப்பட்டு மிதிக்கப்படும். நாட்டின் அனைத்து எதிரிகளுக்கும் எதிராக, அவர்கள் எல்லைகளைத் தாண்டியவர்களாக இருந்தாலும் சரி, உள்ளே இருந்தாலும் சரி, எங்கள் நடவடிக்கை தொடரும். எங்கள் முயற்சிக்கு பீகார் மக்கள் சாட்சியாக உள்ளனர். இங்கு மக்கள் தெருக்களில் இறங்க பயந்த காலங்கள் இருந்தன. இன்று நக்சல் வன்முறையால் பாதிக்கப்பட்ட மாவட்டங்களின் எண்ணிக்கை 125 லிருந்து 18 ஆகக் குறைந்துள்ளது என்றார்.
* கான்பூரில் சுபம் திவேதி குடும்பத்தினருடன் சந்திப்பு
ஏப்ரல் 22 ஆம் தேதி பஹல்காமில் நடந்த பயங்கரவாத தாக்குதலில் கொல்லப்பட்ட 26 பேரில் ஒருவரான சுபம் திவேதியின் குடும்பத்தினரை பிரதமர் மோடி நேற்று கான்பூரில் சந்தித்து பேசினார். அங்குள்ள சகேரி விமான நிலையத்தில் குடும்பத்தினரை சந்தித்து ஆறுதல் கூறினார்.
* இளம் கிரிக்கெட் வீரர் சூரியவன்ஷியை சந்தித்தார்
பிரதமர் மோடி நேற்று பீகாரைச் சேர்ந்த கிரிக்கெட் வீரர் வைபவ் சூரியவன்ஷியை சந்தித்தார். இவர் தற்போது நடந்து வரும் ஐபிஎல் தொடரில் சதம் அடித்த இளைய வீரர் என்ற பெருமையைப் பெற்றார். பாட்னா விமான நிலையத்தில் சூரியவன்ஷியுடனான சந்திப்பின் படங்களை தனது எக்ஸ் பக்கத்தில் பிரதமர் மோடி பகிர்ந்து கொண்டார். அதில்,’பாட்னா விமான நிலையத்தில், இளம் கிரிக்கெட் வீரர் வைபவ் சூரியவன்ஷி மற்றும் அவரது குடும்பத்தினரை சந்தித்தேன். அவரது கிரிக்கெட் திறமைகள் நாடு முழுவதும் போற்றப்படுகின்றன. அவரது எதிர்கால முயற்சிகளுக்கு எனது வாழ்த்துக்கள்’ என்று குறிப்பிட்டு இருந்தார்.
* பீகாரில் என்ன நடக்கிறது என்பது மோடிக்கு தெரியுமா?
பீகாரில் இரண்டு நாள் சுற்றுப்பயணம் மேற்கொண்ட பிரதமர் மோடியின் குற்றச்சாட்டு குறித்து எதிர்க்கட்சி தலைவர் தேஜஸ்வி யாதவ் கூறுகையில்,’பீகாரில் தற்போது என்ன நடக்கிறது என்பது பிரதமருக்கு தெரியுமா?. முதல்வர் நிதிஷ்குமாரின் உடல் நிலை, மனஆரோக்கியம் பற்றி மோடி பேசவில்லை. மேலும் மாநிலத்திற்கான சிறப்பு அந்தஸ்து, வேலைவாய்ப்பு, மோசமான சுகாதார அமைப்பு, மோசமான சட்டம் ஒழுங்கு பற்றி பேசவில்லை. ஆனால் 2015 ஆம் ஆண்டில் அறிவிக்கப்பட்ட திட்டங்கள் மற்றும் பணிகளுக்கு 2025ல் அடிக்கல் நாட்டப்பட்டது. பீகாரில் 20 ஆண்டுகால தேசியஜனநாயக கூட்டணி ஆட்சி சாதனை படைக்கும் வேலையின்மை, வறுமை மற்றும் இடம்பெயர்வுக்கு முக்கிய காரணம்’ என்றார்.
