Thursday, February 29, 2024
Home » தெலங்கானா மாநில அரசு சின்னம், வாகன பதிவு மாற்ற முடிவு வீட்டு தேவைக்கு 200 யூனிட் இலவச மின்சாரம், ₹500க்கு காஸ் சிலிண்டர் திட்டம்

தெலங்கானா மாநில அரசு சின்னம், வாகன பதிவு மாற்ற முடிவு வீட்டு தேவைக்கு 200 யூனிட் இலவச மின்சாரம், ₹500க்கு காஸ் சிலிண்டர் திட்டம்

by Lakshmipathi
Published: Last Updated on

*அமைச்சரவை கூட்டத்தில் ஒப்புதல்

திருமலை : தெலங்கானா அமைச்சரவை கூட்டத்தில் மாநில அரசு சின்னம், வாகன பதிவு மாற்ற முடிவு செய்யப்பட்டுள்ள நிலையில், வீட்டு தேவைக்கு 200 யூனிட் இலவச மின்சாரம், ₹500க்கு காஸ் சிலிண்டர் திட்டத்திற்கு ஒப்புதல் அளிக்கப்பட்டது. தெலங்கானா மாநில முதல்வர் ரேவந்த் தலைமையில் அமைச்சரவை கூட்டம் நேற்று நடந்தது. இந்த கூட்டத்தில் காங்கிரஸ் அரசு கொடுத்த வாக்குறுதியில் ஏற்கனவே 2 உத்திரவாத திட்டங்களை செயல்படுத்தி வரும் ரேவந்த் அரசு, மேலும் இரண்டு திட்டங்களை செயல்படுத்த முடிவு செய்துள்ளது. அதில் 200 யூனிட் வரை இலவச மின்சாரம் மற்றும் வீட்டுத் தேவைகளுக்கு ₹500க்கு காஸ் சிலிண்டர் வழங்கும் திட்டங்களை செயல்படுத்த அமைச்சரவையில் ஒப்புதல் அளிக்கப்பட்டது.

மேலும், இம்மாதம் 8ம் தேதி முதல் சட்டப்பேரவை கூட்டத்தை நடத்தவும், 10ம் தேதி பட்ஜெட் தாக்கல் செய்யவும் முடிவு செய்யப்பட்டுள்ளது. இந்த கூட்டங்களில் இரண்டு திட்டங்கள் செயல்படுத்தப்படும் என அரசு அறிவிக்க உள்ளது. கவர்னர் உரைக்கு நன்றி தெரிவித்த பின், கூட்டத்தொடர் எத்தனை நாட்கள் நடத்துவது என்பது குறித்து பிஏசி கூட்டத்தில் முடிவு செய்யப்பட உள்ளது.

சட்டசபை கூட்டத்தொடரில், முதல் நாள் இரு அவைகளின் கூட்டுக் கூட்டத்தில் கவர்னர் உரை நிகழ்த்த உள்ளார். பின்னர் ஆளுநரின் உரைக்கு அமைச்சர்கள் குழு ஒப்புதல் அளித்து மேலும், தெலங்கானாவின் கலாச்சாரம், வாழ்க்கை முறை, கலை வடிவங்களை புதுப்பிக்கவும், தெலங்கானாவை அதன் மறுசீரமைப்புடன் மறுவரையறை செய்யவும் அமைச்சரவையில் முடிவு செய்துள்ளது.

தற்போதைய சின்னம் அரச ஆட்சியை நினைவூட்டுவதாக உள்ளதால் தெலங்கானா மாநில சின்னத்தை மாற்ற அமைச்சரவையில் முடிவு செய்யப்பட்டுள்ளது. பிரஜாகவி ஆண்டே எழுதிய ஜெய ஜெயே பாடலை தெலங்கானா மாநிலத்தின் அதிகாரப்பூர்வ கீதமாக மாற்ற மற்றொரு முக்கிய முடிவு எடுக்கப்பட்டது. அதேபோல் தெலங்கானா இயக்கத்தின் போது பிரபலமாகி தெலங்கானா சமூகத்தில் மிகவும் பிரபலமாகிய இந்தப் பாடலுக்கு உரிய மரியாதை வழங்க மாநில அரசு முடிவு செய்துள்ளது.

மேலும் வாகனப் பதிவில் TSக்கு பதிலாக TG யாக மாற்ற அமைச்சரவை முடிவு செய்தது. இதற்காக வாகனப் பதிவுச் சட்டத்தில் திருத்தம் கொண்டு வரப்படும் என்று அமைச்சர்கள் தெரிவித்தனர். அரசு வேலைக்காக காத்திருக்கும் வேலையில்லாதவர்களுக்காக குரூப் 1, குரூப் 2, குரூப் 4 பதவிகள் மற்றும் மெகா டிஎஸ்சி, வேளாண் துறையில் ஏ.இ.ஓ., பணியிடங்களை நிரப்ப முடிவு செய்யப்பட்டுள்ளது. ஜனவரி 26ம் தேதி குடியரசு தினத்தையொட்டி கைதிகளுக்கு பொதுமன்னிப்பு அமுல்படுத்துவது குறித்து அமைச்சரவையில் விவாதம் நடைபெற்றது.

பொதுமன்னிப்பில் கைதிகளை விடுதலை செய்வதற்கு தேவையான சட்ட நடவடிக்கைகளை மேற்கொள்ளுமாறு அமைச்சரவை சம்பந்தப்பட்ட அதிகாரிகளுக்கு பணிப்புரை விடுத்துள்ளது.
மாநிலத்தில் உள்ள அனைத்து (65) அரசு ஐடிஐ கல்லூரிகளையும் மேம்பட்ட தொழில்நுட்ப மையங்களாக தரம் உயர்த்த முடிவு செய்யப்பட்டுள்ளது. இளைஞர்களுக்கு அதிக வேலை வாய்ப்பு அளிக்கும் வகையில் திறன் மேம்பாட்டு படிப்புகள் அறிமுகப்படுத்தப்படும் என்றும் அமைச்சரவையில் தெரிவிக்கப்பட்டது. மாநிலத்தில் மூடப்பட்டுள்ள நிஜாம் சர்க்கரை ஆலைகளை மீட்டெடுப்பது குறித்து விரிவான அறிக்கையை விரைவில் அளிக்குமாறு அமைச்சரவை துணைக் குழுவுக்கு முதல்வர் ரேவந்த்க்கு உத்தரவிட்டுள்ளார்.

போதன் மற்றும் முட்டியம்பேட்டையில் மூடப்பட்ட நிஜாம் சர்க்கரை ஆலைகள் தொடர்பான பழைய பாக்கிகள் மற்றும் நிதி நெருக்கடிகள் குறித்து விவாதித்தனர். அப்பகுதிகளில் உள்ள கரும்பு விவசாயிகளின் தேவைகள் மற்றும் தற்போதைய பிரச்னைகள் குறித்து விவாதிக்கப்பட்டது. மூடப்பட்ட தொழிற்சாலைகளை திறக்க என்ன செய்ய வேண்டும், என்ன வழிமுறைகளை பின்பற்ற வேண்டும் என்பதை ஆராய்ந்து உரிய ஆலோசனைகள் வழங்குமாறு அமைச்சரவை துணைக் குழுவுக்கு முதல்வர் ரேவந்த் உத்தரவிட்டார்.

You may also like

Leave a Comment

four × 2 =

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Address

@2023 – Designed and Developed by Sortd.Mobi