தமிழ்நாட்டில் பொது இடங்களில் முகக்கவசம் கட்டாயம் இல்லை; பொது சுகாதாரத்துறை விளக்கம்
ஹாங்காங், சிங்கப்பூர் மற்றும் தாய்லாந்து போன்ற ஆசிய நாடுகளில் கொரோனா பரவல் மீண்டும் அதிகரித்து வருகிறது. மேலும் இந்தியாவிலும் கொரோனா பரவல் அதிகரிக்க தொடங்கி உள்ளது. குறிப்பாக மும்பை, சென்னை, கேரளா, குஜராத் மற்றும் அகமதாபாத் போன்ற நகரங்களில் தொற்றுகள் அதிகரித்து வருகின்றன. மே மாதத்தில் இதுவரை மும்பையில் 106 பேர் கொரோனா தொற்றால் பாதிக்கப்பட்டு மருத்துவமனையில் அனுமதிக்கப்பட்டுள்ளனர்.
அரியானாவின் குர்கான் மற்றும் பரிதாபாத்தில் மூன்று கொரோனா வைரஸ் தொற்று பாதிப்பு இருப்பது கண்டறியப்பட்டது. மேலும் பரிதாபாத்தில் பல்லா பகுதியில் உள்ள சேத்பூரில் வசிக்கும் 28 வயதுடைய பாதுகாப்பு காவலராக பணியாற்றி வந்தவருக்கு கோவிட் தொற்று இருப்பது கண்டறியப்பட்டுள்ளது. புனேயில் பொது மருத்துவமனைகளில் கொரோனா வைரஸ் தொற்று பாதிப்பு இல்லை என்றாலும், மருத்துவமனையில் நகராட்சி அதிகாரிகள் முன்கூட்டியே 50 படுக்கைகளை ஒதுக்கியுள்ளனர். இந்த வரிசையில் புதுச்சேரியில் 12 பேர் பாதிக்கப்பட்டுள்ளனர். அண்டை மாநிலமான கேரளாவில் கொரோனா வைரஸ் தொற்று பாதித்த இரண்டு பேர் உயிரிழந்துள்ளனர்.
தமிழ்நாட்டில் 66 பேர் பாதிக்கப்பட்டு இருந்த நிலையில், நேற்று ஒன்பது மாத குழந்தைக்கு கொரோனா வைரஸ் தொற்று பாதிப்பு இருப்பது கண்டறியப்பட்டுள்ளது. இதனால் மக்கள் அச்சமடைந்துள்ளனர். இந்த சூழலில் தமிழகத்தில் கொரோனா தொற்று மீண்டும் அதிகரித்து வருவதாகவும், இதை தொடர்ந்து பல்வேறு மாவட்டங்களில் புதிய கட்டுப்பாடுகள் விதிக்கப்போவதாகவும் சமூக வலைதளங்களில் தகவல்கள் வேகமாக பரவி வருகின்றன. இந்நிலையில், தமிழ்நாடு பொது சுகாதாரத்துறை விளக்கம் அளித்துள்ளது.
* கொரோனா பரவுவதாகவும் கட்டாயம் முகக் கவசம் அணிய வேண்டும் என அறிவுறுத்தப்பட்டிருப்பதாகவும் சமூக வலைதளங்களில் செய்திகள் வருகின்றன.
* இது முற்றிலும் தவறான தகவல்.
* தமிழ்நாடு அரசின் சார்பில் எந்த அறிவிப்பும் இதுவரை வெளியிடப்படவில்லை.
* கொரோனா குறித்து பொதுமக்கள் யாரும் அச்சப்பட வேண்டாம்.
