Monday, July 22, 2024
Home » நீட் தேர்வை ரத்து செய்யாவிட்டால் தமிழ்நாட்டிற்கு விலக்கு அளிக்க வேண்டும்: மாநிலங்களவையில் திமுக கோரிக்கை

நீட் தேர்வை ரத்து செய்யாவிட்டால் தமிழ்நாட்டிற்கு விலக்கு அளிக்க வேண்டும்: மாநிலங்களவையில் திமுக கோரிக்கை

by Ranjith

புதுடெல்லி: ஜனாதிபதி உரைக்கு நன்றி தெரிவிக்கும் தீர்மானத்தின் மீதான விவாதத்தில் கலந்து கொண்டு மாநிலங்களவை திமுக எம்பி பி வில்சன் கூறியதாவது: 2021ம் ஆண்டு தமிழ்நாடு மருத்துவப் படிப்புகளுக்கான மாணவர் சேர்க்கை மசோதாவை மாநில சட்டப் பேரவையில் நிறைவேற்றி, அதைத் தொடர்ந்து நீட் தேர்வுக்கு எதிராக ஒருமனதாக தீர்மானம் நிறைவேற்றப்பட்டது. இருப்பினும், இந்த மசோதா ஒன்றிய அரசின் ஒப்புதலுக்காக கிட்டத்தட்ட மூன்று ஆண்டுகளாக நிலுவையில் உள்ளது.

மாநில அரசால் நிறைவேற்றப்பட்ட மசோதாவுக்கு ஒப்புதல் அளிக்க அல்லது தேசிய அளவில் நீட் மற்றும் அடுத்த தேர்வு முறையை ஒழிக்க தேசிய மருத்துவ ஆணையச் சட்டத்தில் திருத்தங்களை கொண்டு வரவேண்டும். நீட் உள்ளிட்ட முக்கியமான தேசிய அளவிலான தேர்வுகளை கையாளும் தேசிய தேர்வு முகமை ஹவுசிங் சொசைட்டியைப் போலவே சங்கங்கள் பதிவுச் சட்டத்தின் கீழ் பதிவு செய்யப்பட்டுள்ளது. 2014 முதல் 2024 வரை ஒன்றிய அரசு மக்களவையில் 427 மசோதாக்களையும், மாநிலங்களவையில் 365 மசோதாக்களையும் நிறைவேற்றியுள்ளது.

இருப்பினும் தேசிய தேர்வு முகமைக்கு சட்டப்பூர்வ அனுமதி வழங்குவதற்கான சட்டத்தை அறிமுகப்படுத்த ஒன்றிய அரசு ஆர்வம் காட்டவில்லை. இந்தச் சட்டம் இல்லாததால் தேசிய தேர்வு முகமையை பொறுப்புக்கூறலில் இருந்து பாதுகாக்க முடியும். நீட் தேர்வை 2010ம் ஆண்டு முதன்முதலில் அறிமுகப்படுத்தியபோது, ​​சென்னை உயர்நீதிமன்றத்தில் இருந்து தடையைப் பெற்ற திமுக நீண்ட காலமாக நீட் தேர்வை எதிர்த்து வந்துள்ளது.

தமிழ்நாட்டிற்கு நீட் தேர்வில் இருந்து விலக்கு அளிக்கும் சட்ட மசோதாவை ஒருமனதாக தமிழ்நாடு சட்டப்பேரவையில் நிறைவேற்றியுள்ளோம். மேலும் 12ம் வகுப்பு மதிப்பெண்கள் அடிப்படையில் மருத்துவ சேர்க்கையை நடத்த அனுமதி அளிக்கும் வகையில் நிறைவேற்றப்பட்டுள்ள மசோதா ஜனாதிபதியின் ஒப்புதலுக்காக அனுப்பப்பட்டுள்ளது. ஆனால் ஒப்புதல் இன்னும் நிலுவையில் உள்ளது. எனவே நீட் தேர்வை ரத்து செய்ய வேண்டும். அல்லது தமிழ்நாடு சட்டப்பேரவை நிறைவேற்றி அனுப்பியுள்ள மசோதாவுக்கு ஒப்புதல் அளித்து பிளஸ்2 மதிப்பெண் அடிப்படையில் மருத்துவ மாணவர் சேர்க்கையை நடத்த தமிழ்நாட்டிற்கு மட்டும் அனுமதி அளிக்க வேண்டும். இவ்வாறு பேசினார்.

You may also like

Leave a Comment

20 − 15 =

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Address

@2024-2025 – Designed and Developed by Sortd.Mobi