பரபரப்பான இறுதிச் சுற்றில் சூப்பராய் வென்ற மேடிசன் ஆஸி ஓபன் சாம்பியன்: நம்பர் 1 சபலென்காவை வீழ்த்தி அபாரம்

மெல்போர்ன்: ஆஸ்திரேலியன் ஓபன் டென்னிஸ் மகளிர் ஒற்றையர் இறுதிப் போட்டியில் உலகின் முதல் நிலை வீராங்கனை அரைனா சபலென்காவை, அமெரிக்க வீராங்கனை மேடிசன் கீஸ் அற்புதமாக ஆடி வீழ்த்தி சாம்பியன் பட்டத்தை கைப்பற்றினார். ஆஸ்திரேலியன் ஓபன் டென்னிஸ் மகளிர் ஒற்றையர் இறுதிப் போட்டியில் நேற்று உலகின் முதல் நிலை வீராங்கனையான பெலாரசின் அரைனா சபலென்கா (26) - 19ம் நிலை வீராங்கனை மேடிசன் கீஸ் (29) மோதினர். முதல் செட்டை மேடிசனும், 2ம் செட்டை சபலென்காவும் கைப்பற்றியதால் 3ம் செட் போட்டி பெரும் பரபரப்பை ஏற்படுத்தியது. அந்த செட்டை கைப்பற்ற இருவரும் கடுமையாக போராடினர். கடும் இழுபறியில் நீடித்த அந்த செட்டையும் மேடிசன் கைப்பற்றினார். இதனால், 6-3, 2-6, 7-5 என்ற செட் கணக்கில் வென்ற மேடிசன் இந்தாண்டின் முதல் மகளிர் ஒற்றையர் கிராண்ட் ஸ்லாம் பட்டமான, ஆஸி ஓபன் டென்னிஸ் பட்டத்தை வென்று சாதனை படைத்துள்ளார்.

மேடிசன் கீஸுக்கு இது முதல் கிராண்ட் ஸ்லாம் பட்டம். இதற்கு முன், 2023ல் அமெரிக்க ஓபன் டென்னிஸ் அரை இறுதியில் சபலென்காவுக்கு எதிராக மோதிய மேடிசன் மோசமாக ஆடி தோல்வியை தழுவி கண்ணீர் மல்க அரங்கில் இருந்து வெளியேறினார். ஓராண்டு இடைவெளியில் ஆஸி ஓபன் டென்னிஸில் சபலென்காவுடன் மீண்டும் மோதி அபார ஆட்டத்தால் வென்று மேடிசன் புதிய சாதனை படைத்துள்ளார். இவர், 2017ம் ஆண்டு, அமெரிக்க ஓபன் டென்னிஸ் போட்டியில் இறுதிச் சுற்றில் ஸலோன் ஸ்டீபன்சிடம் தோற்றுள்ளார். கிராண்ட் ஸ்லாம் பட்டத்தை நான்காவது அதிக வயதில் பெறும் வீராங்கனையாக மேடிசன் திகழ்கிறார். இதற்கு முன் அதிக வயதில் கிராண்ட் ஸ்லாம் வென்ற வீராங்கனைகள் பட்டியலில் பிளேவியா பென்னெட்டா, ஆன் ஜோன்ஸ், பிரான்செஸ்கா ஷியாவோன் உள்ளனர்.

போட்டியில் தோற்ற சபலென்கா, கடந்த இரு ஆண்டுகள் தொடர்ச்சியாக ஆஸி ஓபன் டென்னிஸ் சாம்பியன் பட்டத்தை வென்று சாதனை படைத்தவர். நேற்றைய போட்டியில் வென்றிருந்தால் ஹாட்ரிக் வெற்றி சாதனையை அவர் படைத்திருப்பார். அவரது சாதனை ஓட்டத்துக்கு மேடிசன் கீஸ் தற்காலிக முற்றுப்புள்ளி வைத்துள்ளார். சாம்பியன் பட்டம் பெற்ற மேடிசனுக்கு ரொக்கப்பரிசாக, ரூ. 19 கோடியும், தோற்று 2ம் இடம் பிடித்த சபலென்காவுக்கு ரூ. 10 கோடியும் கிடைக்கும்.