நெல்லை: அரசு உதவி பெறும் பள்ளிகளில் மாணவிகளிடம் பணம் வசூல் செய்து ரஜினி, விஜய் நடித்த திரைப்படங்கள் ஒளிபரப்பப்பட்டது. இதுகுறித்து மாவட்ட முதன்மை கல்வி அதிகாரி விசாரணை நடத்தி, பணத்தை திரும்ப வழங்க உத்தரவிட்டுள்ளார். நெல்லை மாவட்டம், அம்பாசமுத்திரம் அருகே விகேபுரத்தில் அரசு உதவி பெறும் மகளிர் மேல்நிலைப்பள்ளியில் சுற்றுவட்டார பகுதியைச் சேர்ந்த 1,780 மாணவிகள் படிக்கின்றனர். கடந்த 9ம் தேதி (சனி) மதியம் இந்த பள்ளியில் நடிகர் விஜய் நடித்த ‘கோட்’ திரைப்படம் ஒளிபரப்பப்பட்டுள்ளது. இதற்காக மாணவிகளிடம் தலா ரூ.25 வசூலிக்கப்பட்டுள்ளது.
சுமார் 600 மாணவிகள் திரைப்படத்தை பார்வையிட்டுள்ளனர். இதன்மூலம் சுமார் ரூ.15 ஆயிரம் வசூலாகி உள்ளது. இதேபள்ளி வளாகத்தில் 1 முதல் 8ம் வகுப்பு வரை செயல்படும் மற்றொரு பள்ளியில் ரஜினி நடித்த ‘வேட்டையன்’ திரைப்படம் ஒளிபரப்பப்பட்டுள்ளது. இதற்காக நூற்றுக்கணக்கான மாணவ, மாணவிகளிடம் தலா ரூ.10 வசூலிக்கப்பட்டுள்ளது. பள்ளிகளில் திரைப்படம் ஒளிபரப்பப்பட்டது மாணவிகளின் பெற்றோர் மத்தியில் அதிருப்தியை ஏற்படுத்தியுள்ளது. இந்த தகவல் வெளியில் கசிந்த நிலையில், சிலர் பள்ளி நிர்வாகம் மீது குற்றம் சாட்டி சமூக வலைதளங்களில் பதிவிட்டு மாவட்ட முதன்மை கல்வி அலுவலர் விசாரிக்க வேண்டும் என கோரிக்கை விடுத்தனர்.
இதையடுத்து மாவட்ட முதன்மை கல்வி அலுவலர் சிவக்குமார் அந்த பள்ளியில் தொலைபேசி மூலம் விசாரணை நடத்தி, மாணவிகளிடம் வசூலித்த 25 ரூபாயை திருப்பி கொடுக்குமாறு உத்தரவிட்டார். அதேபள்ளி வளாகத்தில் செயல்படும் மற்றொரு பள்ளியில் வட்டார கல்வி அலுவலர் ராணி நேரடியாக சென்று விசாரணை நடத்தி, மாணவர்களிடம் பணத்தை திரும்ப வழங்க தலைமை ஆசிரியருக்கு உத்தரவிட்டார்.
பள்ளிகளின் தலைமை ஆசிரியர்கள் கூறுகையில், ‘மாணவிகளின் மன அழுத்தத்தை குறைக்கவே திரைப்படம் ஒளிபரப்பப்பட்து. கல்வி அதிகாரிகள் கூறியபடி பணம் திரும்ப வழங்கப்படும்’ என தெரிவித்தனர். இதேபோல் பாளையங்கோட்டையில் உள்ள ஒரு அரசு உதவி பெறும் பள்ளியிலும் கடந்த சில தினங்களுக்கு முன்பு மாணவிகளிடம் தலா ரூ.50 வசூலித்து ஒரு திரைப்படம் ஒளிபரப்பப்பட்டதாக புகார் எழுந்துள்ளது.
