பூமி பூஜையை ஏன் வடகிழக்கில் செய்கிறார்கள்?

?பூமி பூஜையை ஏன் வடகிழக்கில் செய்கிறார்கள்?

- விஷ்ணுகுமார், திருக்கோவிலூர்.

வடகிழக்கு என்பது ஈசான்ய திசை. புனிதமான திசை வட கிழக்கு திசை. வீடு கட்டும் பொழுது அந்த இடத்தில் முதல் முதலில் பள்ளம் தோண்டி வாஸ்து பூஜை செய்வது வழக்கம். வாஸ்து தேவன் பூமியின் மீது தலை வைத்திருக்கும் பாகம் வடகிழக்கு திசை என்பதால் அங்கே பூமி பூஜையைச் செய்கிறார்கள். வடகிழக்கு சற்று பள்ளமானதாக இருக்க வேண்டும். வெளிச்சம் உள்ளதாக இருக்க வேண்டும். ஈசான்ய திசையை எப்பொழுதும் அடைக்கக் கூடாது. அது நமக்கு வருகின்ற நன்மையைத் தடுத்துவிடும். அதே நேரத்தில் அதற்கு நேர் இதை எதிர் திசையான தென்மேற்கு மூலையை அடைத்து விடலாம். இதற்கு கன்னி மூலை என்று பெயர்.

?எதில் விழிப்புணர்வு அதிகம் தேவை?

- அருண், திருவள்ளூர்.

எந்தெந்த செயலைச் செய்ய வேண்டும் என்பதைவிட எந்தெந்த செயலைச் செய்யக்கூடாது என்பதில் விழிப்புணர்வு தேவை. எந்தெந்த உணவைச் சாப்பிட வேண்டும் என்பதைவிட எதையெல்லாம் சாப்பிடக்கூடாது என்பதில் விழிப்புணர்வு தேவை. என்னென்ன பேச வேண்டும் என்பதை விட எதையெல்லாம் பேசக் கூடாது என்பதில் கவனமும் விழிப்புணர்வும் தேவை. எதையெல்லாம் பார்க்க வேண்டும் என்பதைவிட எதையெல்லாம் பார்க்கக் கூடாது என்பதில் விழிப்புணர்வு தேவை. எதையெல்லாம் கேட்க வேண்டும் என்பதை தவிர எதையெல்லாம் கேட்கக் கூடாது என்பதில் விழிப்புணர்வு தேவை. எதையெல்லாம் படிக்க வேண்டும் என்பதைவிட எதையெல்லாம் படிக்கக்கூடாது என்பதில் கவனம் தேவை. இதை எல்லாவற்றையும் செய்துதான் சேர்த்துத்தான் ஒரே வரியில் ஆண்டாள் ‘‘செய்யாதன செய்யோம்’’ என்று பாடிவிட்டார்.

?திருமணத் தடைக்கு அவசியம் செய்ய வேண்டிய ஒரு பரிகாரத்தைச் சொல்ல முடியுமா?

- சரவணன், திருச்சி.

நிச்சயமாக வெள்ளிக்கிழமை காலை பிரம்ம முகூர்த்தத்தில் அல்லது முடியாவிட்டால் காலை 7 மணிக்கு பசுவை வலம் வந்து வணங்குங்கள். அகத்திக்கீரை, பழம் கொடுங்கள். தொடர்ச்சியாக சில நாட்கள் செய்து வந்தால் கிரக தோஷங்கள் விலகி திருமணத் தடைகள் நீங்கும். காரணம் ஒரு பசுவை வணங்கும் பொழுது முப்பத்து முக்கோடி தேவர்களையும் ஒருசேர வணங்குவதாகவும், குறிப்பாக மகாலட்சுமியின் பேரருளைப் பிரார்த்திப்பதாகவும் பொருள். இது எளிமையான வழிபாடு. பெரும்பாலான தோஷங்களுக்கு பிராயச்சித்தமான வழிபாடு.

?சப்த மாதாக்கள் வேறு, சப்த கன்னியர்கள் வேறா?

- த.சத்தியநாராயணன், அயன்புரம்.

பிராம்மி, மகேஸ்வரி, கௌமாரி, வைஷ்ணவி, வாராஹி, இந்திராணி, சாமுண்டி ஆகிய தேவதைகளை சப்த மாதாக்கள் என்றும், கங்கா, யமுனா, சரஸ்வதி, காவேரி, கோதாவரி, துங்கபத்ரா, கிருஷ்ணா, சரயு ஆகிய ஏழு நதிகளை சப்த கன்னிகைகள் என்றும் சொல்லும் வழக்கம் உண்டு.

?கண்களால் பார்ப்பது கூட பல நேரங்களில் பொய்யாகப் போய் விடுகிறதே?.

- ரமேஷ், திருவள்ளூர்.

கண்ணால் காண்பதும் பொய், காதால் கேட்பதும் பொய், தீர விசாரிப்பது ஒன்றே மெய் என்று அந்த காலத்தில் சொல்லி வைத்தார்கள். “உன் கண் உன்னை ஏமாற்றினால்” என்ற திரைப்படப் பாடலிலும் இதை ஒரு கவிஞர் சொல்லி இருப்பார். கண்களால் பார்ப்பதை விட இதயத்தால் பாருங்கள். அது எப்பொழுதும் பொய் சொல்லாது..

?எனக்கு ‘‘சட் சட்’’ என்று கோபம் வந்து விடுகிறது. என்ன செய்வது?

- அம்பிகா, மும்பை.

பதில்: கோபம் என்பது ஒரு உணர்ச்சியின் பெருக்கு. அது வராமல் இருக்காது. கோபம் வரும்போது அதை நீங்கள் எப்படி கையாளுகிறீர்கள் என்பதில்தான் விஷயம் அடங்கி இருக்கிறது. சின்ன விஷயம் சொல்கிறேன். பயன்படுமா பாருங்கள். கோபமாக இருக்கும் போது பேசாதீர்கள். அதைப்போலவே கோபமாக இருப்பவர்கள் பேசுவதையும் சீரியஸ் ஆக எடுத்துக் கொள்ளாதீர்கள்.

?வாழ்க்கையில் கற்றுக் கொள்ள வேண்டிய உயர்ந்த பாடம் எது?

- செல்வகுமார், மதுரை.

விவேகானந்தர் இதற்கு சரியான விடையை அளித்திருக்கிறார். “செயலின் பலனில் செலுத்தும் அதே அளவு கவனத்தை, அக்கறையை அந்த செயலைச் செய்கின்ற முறையிலும் செலுத்த வேண்டும்” என்பது என் வாழ்வில் நான் கற்று உயர்ந்த பாடங்களில் ஒன்று என்பது விவேகானந்தர் வாக்கு. அதை நாமும் பின்பற்றலாம். வெற்றி என்பது முக்கியம்தான். ஆனால், அதைப் பெறுகின்ற வழி அதைவிட முக்கியம். தவறான வழியில் பெற்ற வெற்றியும் தோல்வியே. சரியான வழியில் நடந்து பெற்ற தோல்வியும். வெற்றியே.

?இறைவனை அடைய அடியார்கள் துணை வேண்டுமா? நாமாக நேரடியாக சென்று அடைய முடியாதா?

- திவ்யா, சென்னை.

பசுமாடு நம்முடையதாக இருந்தாலும், அது தானாகப் பால் கறப்பதில்லை. கன்றுக்குட்டி அருகில் இருந்தால்தான் கறக்கும். அதுபோல சில அடியார்களின் துணையில்லாமல் இறையருளைப் பெறுவது கடினம். இராமாயணத்தில் அசோகவனத்தில் சீதை, ராமானுஜம் லட்சுமண பூர்வஜா என்று சொல்லுகின்றாள். ராமனும் லக்ஷ்மணனும் என்று சொல்லலாம்.காட்டில் இருவரையும் பிரிந்த சீதைக்கு அவர்கள் இரண்டு பேரும் மானைத்தேடி போனபின் சந்தித்து கொண்டார்களா என்பதும் தெரியாது. ஆனாலும் லட்சுமணனைச் சொல்லி லட்சுமணனுக்கு முன்பிருந்த ராமன் என்று சொல்கிறாள். என்ன காரணம் என்றால் அடியாரை முன்னிட்டுச் சொல்ல வேண்டும், பலிக்கும். வேதம் வல்லார்களைக் கொண்டு விண்ணோர் பெருமான் திருப்பாதம் பணிந்து, என்பது பாசுரம். யானையின் மீது ஏற விரும்புபவர்கள் யானைப் பாகனுடைய அனுமதி கொண்டு புகவேண்டுமாபோலே அடியார்களின் துணை கொண்டே எம்பெருமானைப்பணிதல் வேண்டுமென்பது மரபு.

?எதனால் பகவானிடம் இருந்து விலகுகிறோம்?

- தேவி, விருதுநகர்.

மாயையால் பகவானிடமிருந்து விலகுகிறோம். மாயை பந்தங்களை ஏற்படுத்துகிறது. அந்த பந்தங்கள் பகவானை விட்டு நம்மை விலக வைக்கிறது.