இந்த வார விசேஷங்கள்

30-11-2025 - ஞாயிறு அண்ணாமலையார் ரதம்

திருவண்ணாமலை அண்ணாமலையார் கோயிலில் இன்று நடைபெறும் கார்த்திகை தீபத் திருவிழாவில் ‘மகா தேரோட்டம்’ உலக பிரசித்தி பெறும். விநாயகர், வள்ளி தெய்வானை சமேத முருகர், உண்ணாமுலை அம்மன் சமேத அண்ணாமலையார், பராசக்தி அம்மன், சண்டிகேஸ்வரர் ஆகியோர் தனித்தனித் திருத்தேர்களில் எழுந்தருளி மாட வீதியில் வலம் வந்து அருள் பாலிப்பர். ஒவ்வொரு திருத்தேரும் நிலையை வந்தடைந்த பிறகு, அடுத்த திருத்தேரின் புறப்பாடு இருக்கும். ஒரே நாளில் 5 திருத்தேர்கள் பவனி வருவது சிறப்புமிக்கது. காலையில் தொடங்கி நள்ளிரவு வரை மகா தேரோட்டம் நடைபெறும்.

1-12-2025 - திங்கள் கைசிக ஏகாதசி

நம்பாடுவான் என்ற பெருமாள் பக்தர் திருநெல்வேலிக்கு அருகில் திருக்குறுங்குடி என்ற திவ்ய தேசத்தில் வாழ்ந்து வந்தார். பாணர் குலத்தைச் சேர்ந்தவர். ஆனால் ஏகாதசி விரதத்தை விடமாட்டார். இறைவனுக்கு முன்னால் நின்று கண்ணில் நீர் மல்க உருக்கமாகப்பாடி ஏகாதசி விரதத்தை முடிப்பார்.கார்த்திகை மாத வளர்பிறை ஏகாதசியில் ஒருமுறை கைசிகப் பண்பாடி, அந்தப் பண்ணினுடைய பலனை பிரம்மராட்சஸ் சாபம் பெற்ற ஒருவருக்கு அளித்து சாப விமோசனம் தந்தார். இன்றைக்கும் கைசிக ஏகாதசி நாளன்று திருக்குறுங் குடியில் கைசிக புராண நாடகம் நடைபெறுகின்றது. ஆயிரக்கணக்கான மக்கள் அதனை கண்டு களிப்பார்கள். அடுத்த நாள் துவாதசி பாரணை நடைபெறும்.

1-12-2025 - திங்கள் கும்பேஸ்வரர் கோயில் குடமுழுக்கு

கும்பேஸ்வரர் கோயில் தஞ்சை மாவட்டம், கும்பகோணம் நகரத்தின் மத்தியில் அமைந்துள்ளது. சம்பந்தர், அப்பர் பாடல் பெற்ற சிவாலயமாகும். பன்னிரண்டு ஆண்டுகளுக்கு ஒருமுறை நிகழும் மகாமகம் இத்தலத்தில் சிறப்பாக நடைபெறுகிறது. இக்கோயில் 30,181 சதுர அடி (2,803.9 சதுர மீட்டர்) பரப்ப ளவுடையது. 1300 ஆண்டுகள் பழமையானது. தேவாரப் பாடல் பெற்ற தலங்களில் சோழ நாடு காவிரி தென்கரைத் தலங்களில் அமைந்துள்ள 26ஆவது சிவத்தலமாகும். கல் நாதசுவரம் உள்ள பெருமையினையும் இக்கோயில் பெற்றுள்ளது.

பிரம்மனின் வேண்டுகோளுக்கிணங்கி இறைவன் தந்த அமுத கலசம் தங்கியதால் இத்தலம் கும்பகோணம் எனப் பெயர் பெற்றது. கும்பத்தில் இருந்த அமுதத்தினின்றும் வெளிப்பட்டவ ராதலால், இக்கோயிலில் குடிகொண்டுள்ள இறைவன் கும்பேசர் என அழைக்கப்படுகிறார். அமுத குடத்தை அலங்கரித்திருந்த பொருட்களான மாயிலை, தர்ப்பை, உறி, வில்வம், தேங்காய், பூணூல், முதலிய பொருட்கள் காற்றினால் சிதைக்கப்பட்டு, அவை விழுந்த இடங்களில் எல்லாம் தனித்தனி லிங்கங்களாய்க் காட்சியளித்தன. அவை தனிக்கோயில் களாக விளங்குகின்றன.

இத்தலத்து இறைவன் ஆதிகும்பேஸ்வரர், அமுதகும்பேஸ்வரர், அமுதேசர் என அழைக்கப்படுகிறார். இத்தலத்து இறைவி மங்கள நாயகி, மந்திர பீடேஸ்வரி, மந்திரபீட நலத்தள், வளர்மங்கை என அழைக்கப்படுகிறார். தம்மை அன்போடு தொழுவார்க்குத் திவ்விய மங்களத்தை அருளும் மாட்சியமையால் மங்களநாயகி என்றும், சக்திபீடங்களுள் ஒன்றான மந்திரபீடத்தில் விளங்குவதால் மந்திர பீடேஸ்வரி என்றும், தம் திருவடிகள் அடைந்தவர் களுக்கு மந்திரபீடத்தில் இருந்து நலம் தருவலால் மந்திரபீட நலத்தள் என்றும் பெயர்கள் வழங்கப்படுகின்றன. இத்தலத்து அம்பாள், 51 சக்தி வடிவங்களையும் தன்னகத்தே ஒன்றாய் உள்ளடக்கி சக்தி பீடங்களுக்கெல்லாம் தலையாயதாக விளங்கி அருள் பாலிக்கின்றாள். இத்தனைச் சிறப்புமிக்க இத்தலத்தில் இன்றைய தினம் மஹா கும்பாபிஷேகம் நடைபெறுகிறது.

1-12-2025 - திங்கள் யோகிராம் சுரத்குமார் ஜெயந்தி

இன்று உலகெங்கும் யோகி ராம் சுரத்குமார், அவதார தினம் அவரது பக்தர்களால் கொண்டாடப்படுகிறது. ஒரு ஞானியை தங்கள் வாழ்நாளிலேயே சந்திப்பவர்கள் அதிர்ஷ்டசாலிகள். அவரை உணர்ந்து அவரது தெய்வீகத் தொடர்பிலிருந்து பயனடைபவர்கள் இன்னும் அதிர்ஷ்டசாலிகள். அத்தகைய பிரம்ம ஞானிகளில் ஒருவர் யோகி ராம்சுரத்குமார், அவரிடமிருந்து ஆயிரக்கணக்கான மக்கள் வாழ்க்கையில் ஆறுதல், ஆதரவு மற்றும் சாந்தியைக் கண்டுள்ளனர். டிசம்பர் 1, 1918 அன்று பிறந்தவர். யோகி ராம்சுரத்குமார், தமிழ்நாட்டின் திருவண்ணாமலையின் தெருக்களில் ஒரு பிச்சைக்காரராக வாழ்ந்தவர். குருவையும் சத்தியத்தையும் தேடினார். தனது மூன்று குருக்களான ஸ்ரீ அரவிந்தர், ரமண மகரிஷி மற்றும் பப்பா ராம்தாஸ் ஆகியோரைச் சந்தித்தார். பப்பா ராம்தாஸ் அவருக்கு ‘‘ஓம் ஸ்ரீ ராம் ஜெய் ராம் ஜெய் ஜெய் ராம்’’ என்று தீட்சை அளித்தார். இப்படி சாதுவாக வாழ்ந்த யோகிராம் சுரத் குமாரின், ஜெயந்தி விழா, திருவண்ணாமலையில் உள்ள ஆசிரமத்தில் காலை, 7:00 மணிக்கு மஹா அபிஷேகம், பஜனை, பக்தி இசை, அன்னதானம் என நடக்கும். இரவு, 7:45 மணிக்கு, கிரிவலப்பாதையில் பகவான் வெள்ளி ரத உலா மற்றும் ஆரத்தி நடக்கும்.

2-12-2025 - செவ்வாய் கைசிக துவாதசி

இன்று மஹாலஷ்மி உற்பத்தி தினம் என்று சொல்கிறார்கள். பாற்கடலைக் கடைந்தபோது பல்வேறு பொருட்கள் உற்பத்தி ஆயின. நிறைவாக மகாவிஷ்ணு மார்பில் அமர்வதற்காக கமல மலரில் லட்சுமித் தாயார் பாற்கடலில் தோன்றிய நாள்.

இன்று ஷீராப்தி சயன விரதம் சிலர் அநுஷ்டிப்பர். திருமாலுக்குரிய பற்பல விரதங்களில் ஒரு முக்கியமான விரதம் கார்த்திகை மாதம் வளர்பிறை துவாதசியில் இந்த விரதம் அனுஷ்டிக்கப்படுகிறது. இந்த துவாதசியை “உல்கா துவாதசி” அல்லது “மத்ஸ்ய துவாதசி” என்று அழைப்பர். இதில் சிறப்பாக செய்ய வேண்டிய பூஜை லட்சுமி நாராயணருக்கு உரியது. ஆதிசேஷன் மீது, நாராயணனாக திருமகளோடு சயனித் திருக்கும் இருப்பை நினைத்துக்கொண்டே இந்த விரதத்தை இருக்க வேண்டும். இந்த விரதம் இருப்பவர்களின் மன ஆசைகளை எல்லாம் பகவான் விஷ்ணு மூர்த்தி பூர்த்தி செய்து வைப்பர். துவாதசி பாரணைக்கு முன், விஷ்ணு மூர்த்தியை துளசியாலும் வாசனையுள்ள மலர்களாலும் அர்ச்சனை செய்ய வேண்டும். மாலை பள்ளி கொண்ட பெருமாள் கோயில் ஏதேனும் அருகாமையில் இருந்தால், அங்கு சென்று பகவான் ஸ்ரீ மன் நாராயணனை வணங்கி அருள் பெறலாம்.

2-12-2025 - செவ்வாய் பரணி தீபம் பிரதோஷம்

இன்று பிரதோஷம். பரணி தீபம். அதிகாலை 4.00 மணிக்கு, திருவண்ணாமலை மூலவர் கருவறை முன் மிகப்பெரிய கற்பூரக் கட்டியில் ஜோதி ஒளி ஏற்றி, தீபாராதனை காட்டி, அதில் ஒற்றை தீபம் ஏற்றுவார்கள். இந்த ஒற்றை நெய்தீபத்தால் நந்திமுன் ஐந்து பெரிய அகல் விளக்கு ஏற்றுவார்கள். அதன்பின் உண்ணாமுலை அம்மன் சந்நதியிலும் ஐந்து பெரிய அகல் விளக்கில் தீபம் ஏற்றுவார்கள். இதுவே பரணி தீபம். (அன்று காலை 10 மணி வரை பரணி நட்சத்திரம்). பரணி தீபம் ஏற்றப்பட்ட பிறகு, அதைக் கொண்டு பஞ்சமுகதீபம் ஏற்றப்படுகிறது. பரணி தீபத்தினை இறுதியாக பைரவர் சந்நதியில் வைக்கின்றனர்.

3-12-2025 - புதன் கார்த்திகை தீபம் திருப்பரங்குன்றம் ரதம்

திருப்பரங்குன்றம் மலையில் கார்த்திகை தீபம் ஏற்றப்படுவது வழக்கம். இந்த தீபம் கார்த்திகை மாதத்தின் பௌர்ணமி அல்லது கார்த்திகை நட்சத்திரத்தில் ஏற்றப்படுகிறது, இது திருப்பரங்குன்றம் கோயிலின் முக்கிய நிகழ்வுகளில் ஒன்றாகும். திருப்பரங்குன்றம் கோயிலில் திருக்கார்த்திகை தீபத்திருவிழா 10 நாள் உற்சவமாக நடைபெறும். திருக்கார்த்திகை தீபத்திருவிழா கொடியேற்றத்துடன் தொடங்கும். திருவிழாவையொட்டி தினமும் காலையில் தங்க சப்பரத்திலும், இரவில் தினமும் ஒரு வாகனத்திலுமாக தெய்வானையுடன் முருகப்பெருமான் எழுந்தருளி நகர் உலா வந்து பக்தர்களுக்கு அருள்பாலிப்பார். திருவிழாவின் முக்கிய நிகழ்ச்சியாக தீபத்துக்கு முதல் நாள் இரவு 6:30 மணி முதல் 7.30 மணிக்குள் கோயிலுக்குள் உள்ள 6 கால் மண்டபத்தில் முருகப் பெருமானுக்கு நவரத்தினங்களிலான செங்கோல் சாற்றி பட்டா பிஷேகம் நடக்கும். திருவிழாவின் விசேஷ நிகழ்ச்சி திருக்கார்த்திகை தினமாகும். அன்று காலை 9.00 மணிக்கு மேல் 9.30 மணிக்குள் தேரோட்டம் நடக்கிறது. சன்னதி தெருவில் உள்ள 16 கால் மண்டபம் அருகில் இருந்து நகரின் நான்கு முக்கிய வீதிகளில் தேர் வலம் வர உள்ளது விழாவின் சிகர நிகழ்ச்சியாக அன்று மாலை 6 மணிக்கு மலையில் உள்ள உச்சிப்பிள்ளையார் கோயில் வளாகத்தில் தீப மேடையில் கார்த்திகை மகா தீபம் ஏற்றப்படுகிறது. இதற்காக கோயிலில் 3½ அடி உயரமும் 2½ அடி அகலமும் கொண்ட தாமிரகொப்பரை மெருகு ஏற்றப்பட உள்ளது. மேலும் 100 மீட்டர் காடா துணியிலான திரி, 300 லிட்டர் நெய் பயன்படுத்தப்பட உள்ளது. மேலும் இரவு 8 மணி அளவில் 16 கால் மண்டபம் அருகே சொக்கப்பனை கொளுத்துதல் நடக்கும்.

4-12-2025 - வியாழன் வைகானச தீபம்

வைகானசம் வைணவ சமயத்தினர் பின்பற்றும் இரண்டு ஆகமங்களின் தொன்மையான ஒன்றாகும். விகநச முனிவரால் உருவாக்கப்பட்ட இந்த ஆகம நெறியினைப் பின்பற்றுவோர் வைகானசர் ஆவர். திருவேங்கடம் (திருப்பதி) திருமாலிருஞ்சோலை, சிதம்பரம் தில்லை திருச்சித்ரகூடம் போன்ற திவ்யதேசங்களில் வைகானச அர்ச்சகர்கள்தாம் பெருமாளுக்கு ஆராதனம் செய்கிறார்கள். இங்கு இன்றைய தினம் கார்த்திகை தீப உற்சவம் நடைபெறும்.

4-12-2025 - வியாழன் திருமங்கை ஆழ்வார் நட்சத்திரம்

இன்று கார்த்திகை மாதம் கார்த்திகை நட்சத்திரம். திருமங்கையாழ்வார் அவதார தினம். அவர் சீர்காழிக்கு அருகில் திருக் குறையலூரில் அவதரித்தார். சீர்காழி அருகே திருநகரியில் அவருடைய எழில் உருவத்தையும் அவர் பூஜை செய்த சிந்தனைக்கினியான் என்ற திருநாமமுடைய பெருமாளையும் இன்றும் நாம் காணலாம். இவருக்கு தனி சந்நதி உண்டு. தனி கொடி மரம் உண்டு. கார்த்திகையில் இவருடைய அவதார உற்சவம் நடைபெறும். இன்று ஸ்ரீவைஷ்ணவர்கள் கார்த்திகை தீபத் திருநாளை வைகானச ஆகம சாஸ்திரப்படி அனுஷ்டிப்பார்கள்.

இன்று செங்கல்பட்டு காயார் கிராமம் பிரசித்தி பெற்ற வரதராஜ பெருமாள் கோயிலில் 42 அடி உயர கல் தீபம் ஏற்றப்படும். சிவாலயங்களில் சொக்கப் பனையை கொளுத்துவார்கள்.

கார்த்திகை மாதத்தில் கார்த்திகை நட்சத்திரமான இன்று கணம்புல்லர் நாயனார் குருபூஜை நடைபெறும். சோழ நாட்டில் உள்ள வடவெள்ளாற்றின் தென் கரையில் உள்ள இருக்குவேளூர் என்ற ஊரைச் சேர்ந்தவர். சிவபக்தியில் சிறந்த இவருடைய சிறப்பு, தனது முடியைக் கொண்டு சிவபெருமானின் கோயிலில் விளக்கு ஏற்றி, இறுதியில் சிவலோகப் பதவியை அடைந்தார்.

5-12-2025 - வெள்ளி பாஞ்சராத்திர தீபம் திருப்பாணாழ்வார் திருநட்சத்திரம்

இன்று பாஞ்சராத்ர தீபத் திருநாளாக கொண்டாடுவார்கள். மூன்று நாட்களும் தீபமேற்றினாலும் இன்றைய தினம் ஸ்ரீ பாஞ்சராத்ர ஆகம வைணவக் கோயில்களுக்கு திருக் கார்த்திகை தீபத் திருநாள். பகவான் வாமன அவதாரம் எடுத்து மகாபலியிடம் மூன்றடி மண் கேட்டார். மூன்று உலகங்களையும் அளந்த பின், மகாபலியை பாதாள உலகத்துக்கு அனுப்பினார். அப்போது மகாபலியின் யாகமும் தடைபட்டது. கார்த்திகை மாதம் பாஞ்சராத்திர தீபம் அன்று தீபங்கள் ஏற்றுவதன் மூலமாக மகாபலியின் யாகம் நிறைவேறும் அதன் பலன் எல்லோருக்கும் கிடைக்கும் அது மட்டுமில்லை பெருமாளே விளக்கொளி பெருமாளாக ஜோதி ஸ்வரூபமாக பிரம்மனின் யாகத்தைப் பூர்த்தி செய்வதற்காக தோன்றிய நாள் என்பதால் எல்லா இடங்களிலும் விளக்கு ஏற்றுகிறார்கள்.

அது தவிர இன்று ரோகிணி நட்சத்திரமாக இருப்பதால் திருப்பாணாழ்வார் அவதாரத் திருநாள் ஆகும். திருப்பாணாழ்வார் அவதாரதினத்தை பல கோயில்களில் சிறப்பாகக் கொண்டாடுவார்கள்.