தமிழ்நாட்டின் தொன்மையான விநாயகர்!

ஆலகிராமம் பிள்ளையார்

சிற்பமும் சிறப்பும்

அமைவிடம்: அருள்மிகு எமதண்டீஸ்வரர் திருக்கோயில், ஆலகிராமம், திண்டிவனம் வட்டம், விழுப்புரம் மாவட்டம், தமிழ்நாடு.

காலம்: பொது ஆண்டு (கி.பி) 4-ஆம் நூற்றாண்டு முதல் 6-ஆம் நூற்றாண்டுக்கு இடைப்பட்டது.

தமிழகத்தில் விநாயகர் வழிபாடு என்பது பல்லவர் காலத்தில் வாதாபியில் இருந்து கொண்டுவரப்பட்டது என்ற ஒரு பொதுவான கருத்து நிலவி வந்தது. ஆனால், விழுப்புரம் மாவட்டம் ஆலகிராமத்தில் கண்டறியப்பட்ட விநாயகர் சிற்பம், இந்த வரலாற்றை மாற்றி அமைத்து, பல்லவர்களுக்கு முன்பே தமிழகத்தில் விநாயகர் வழிபாடு இருந்ததை உறுதிப்படுத்துகிறது.

காலத்தால் முந்தையவர்

தமிழகத்தின் மூத்த விநாயகர் என்று நீண்டகாலமாக பிள்ளையார்பட்டி கற்பக விநாயகர் கருதப்பட்டு வந்தார். இருப்பினும், திண்டிவனம் வட்டம் ஆலகிராமம் எமதண்டீஸ்வரர் கோயிலில் உள்ள விநாயகர் சிற்பம், பிள்ளையார்பட்டி சிற்பத்தில் உள்ள எழுத்து அமைதிக்கும் முந்தையது என ஆய்வாளர்கள் கருதுகின்றனர்.

சிறப்பு: இச்சிற்பம், தமிழகத்தின் மிகப் பழமையான விநாயகர் சிற்பங்களில் ஒன்றாக வரலாற்றில் முக்கிய இடம் பெறுகிறது.

கல்வெட்டுச் சான்றுகள் இங்குள்ள பலகைக்கல்லில் தமிழ் வட்டெழுத்து பொறிக்கப்பட்டுள்ளது.

``உள்ள பிரமிறை பன்னூற சேவிக... மகன் கிழார் கோன்... கொடுவித்து’’ என்ற வரிகள் இந்தச் சிற்பத்தின் பழமையையும், அதன் வரலாற்று முக்கியத்துவத்தையும் பறைசாற்றுகின்றன.

சிற்ப அமைப்பு மற்றும் தோற்றம்

இந்த மூத்த பிள்ளையார் சிற்பம் மிகவும் தனித்துவமான கலைநயத்துடன் செதுக்கப்பட்டுள்ளது:

அளவு: 75 செ.மீ உயரமும், 40 செ.மீ அகலமும் கொண்ட பலகைக்கல்லில் புடைப்புச் சிற்பமாக உள்ளது.

அமர்ந்த நிலை: பரியங்க ஆசனத்தில் அமர்ந்துள்ளார்.

கரங்கள்: இரண்டு கரங்கள் மட்டுமே உள்ளன. வலது கரத்தில் தடி ஆயுதமாகவும், இடது கரத்தில் ஒடித்த தந்தமும் காணப்படுகின்றன.

அலங்காரம்: மார்பில் புரிநூல், காலில் தண்டை, கைகளில் காப்பு மற்றும் தோளில் கடகம் அணிந்துள்ளார்.

மகுடம்: இவரது தலையலங்காரம் ஒரு பூக்கூடையைக் கவிழ்த்து வைத்தது போன்ற தனித்துவமான அமைப்பில் உள்ளது.

எமதண்டீஸ்வரர் திருக்கோயில்

இறைவன்: எமதண்டீஸ்வரர் (சிவலிங்க வடிவில் கிழக்கு நோக்கி அருள்பாலிக்கிறார்).

இறைவி: திரிபுரசுந்தரி அம்மன் (தெற்கு நோக்கிய சந்நதி).

தனிச் சந்நதி: முன்பு அர்த்தமண்டபத்தில் இருந்த மூத்த விநாயகர், தற்போது கோயில் புதுப்பிக்கப்பட்ட பிறகு தனிச் சந்நதியில் வீற்றிருக்கிறார்.

அரிய கண்டுபிடிப்புகள்: இக்கோயில் திருப்பணியின் போது நிலத்திற்கு அடியில் இருந்து லகுலீசர், மகாவிஷ்ணு, பல்லவர் கால அய்யனார், ஜேஷ்டாதேவி (தவ்வை / மூத்த தேவி - அருகில் உள்ள செல்லி அம்மன் கோயில்) ஆகியோரின் சிற்பங்களும் கண்டெடுக்கப்பட்டுள்ளன.

மது ஜெகதீஷ்