ஆடிப் பூரத்தின் ஆலய அற்புதங்கள்

ஆடி மாதம் என்பது விவசாயத்திற்கு மட்டுமல்ல, ஆன்மிக வாழ்க்கைக்கும் மிகவும் ஏற்ற மாதமாகும். ``ஆடிப்பட்டம் தேடி விதைத்தால்’’ நல்ல விளைச்சல் கிடைக்கும் என்று முன்னோர் கூறியது போல, ஆடி மாதத்தில் மனதில் பக்தி என்னும் விதையை விதைத்தால், வாழ்வில் முக்தி என்னும் உயர்ந்த விளைச்சலை அறுவடை செய்யலாம். இந்த மாதத்தில் இயற்கையும் இறையருளும் ஒன்றிணைந்து மனிதனை உயர்த்துகின்றன. ஆறுகளில் புதுவெள்ளம் பெருக்கெடுத்து ஓடுகிறது. அந்த நீர்ப்பெருக்கு நிலத்தை வளமாக்குவது போல, இறைநினைவு என்னும் பெருக்கு நம் உள்ளத்தையும் வளமாக்குகிறது. ஆற்றுநீர் நம் உடலையும், புறத்தையும் தூய்மைப் படுத்துகிறது; இறைபக்தி நம் அகத்தையும் எண்ணங்களையும் தூய்மைப்படுத்துகிறது.

அதனால்தான், ஆடி மாதத்தில் அம்மன் வழிபாடு, ஆடிப்பூரம், ஆடிப் பெருக்கு, ஆடி வெள்ளி, ஆடிச் செவ்வாய் போன்ற திருவிழாக்கள் அமைக்கப்பட்டுள்ளன. இவை வெறும் பண்டிகைகள் அல்ல; மனிதன் இயற்கையோடும், இறையோடும், தன்னுள்ளும் மீண்டும் இணைவதற்கான ஆன்மிக வாய்ப்புகளாகும்.

ஆடி மாதப் பெயருக்குப் பின்னால் ஒரு சுவையான புராணக்கதை:

எப்படி ஏகாதசி என்னும் திதி, ஏகாதசி என்ற பெண்ணின் பெயருடன் தொடர்புப் படுத்தப்பட்டு, ஒரு புராணக் கதை சொல்லப்படுகிறதோ, அதைப் போலவே ஆடி மாதத்தின் பெயருக்கும் ஒரு சுவையான புராணக் கதை கூறப்படுகிறது. இக்கதைகளுக்கு உறுதியான வேத, ஆகம அல்லது புராண ஆதாரங்கள் இல்லை என்றாலும், அவை பக்தி இலக்கியங்களில் மக்களின் கற்பனையையும் ஆன்மிகச் சிந்தனையையும் வளப்படுத்தியவை என்பதால் சுவாரசியமான இடத்தைப் பெற்றுள்ளன.அக்கதையின்படி, சிவபெருமானை அடைய வேண்டும் என்ற தீவிர விருப்பம் கொண்ட ஒரு அரக்கன் இருந்தான்.

இறைவனை எப்படியாவது நெருங்க வேண்டும் என்ற ஆசையில், அவன் அம்பிகையான பார்வதிதேவியின் வடிவத்தை எடுத்துக் கொண்டு, சிவபெருமானின் சந்நதியை அடைந்தான். சர்வஜ்ஞரான (முழுதும் அறிந்தவர்) சிவபெருமான், அது பார்வதி அல்ல; வேறு உருவில் வந்த அரக்கன் என்பதை உடனே அறிந்தார். தம்மை அடைய வந்திருந்தாலும், தெய்வீகமான பார்வதிதேவியின் திருக்கோலத்தை ஏமாற்றத்திற்காக, ஏற்றுக் கொண்டதை ஏற்றுக்கொள்ளாமல், தமது ஞான அக்னியால் அவனைச் சாம்பலாக்கினார்.

அப்போது பார்வதிதேவி, ``இவன் செய்தது தவறு என்றாலும், உம்மை அடைய வேண்டும் என்ற ஏக்கத்தோடு வந்தான். அவனது நினைவு முற்றிலும் அழிந்துபோகாமல் ஏதாவது அருள் செய்ய வேண்டும்’’ என்று வேண்டிக் கொண்டதாகக் கூறப்படுகிறது. அம்பிகையின் கருணைமிகு வேண்டுகோளை ஏற்ற சிவபெருமான், அந்த அரக்கனின் பெயர் காலத்தால் மறையாமல் இருக்க,

`ஆடி’ என்ற பெயரை அவனுக்கு வழங்கி, அந்தப் பெயர் ஒரு தமிழ் மாதத்தின் பெயராக நிலைத்திருக்க அருளியதாக இந்தக் கதை கூறுகிறது.

ஆடி மாதம் - தேவர்களின் பிரதோஷகாலம்:

பொதுவாக பிரதோஷகாலம் என்பது இறைவழிபாட்டிற்கு மிகவும் உகந்த, புனிதமான நேரமாகக் கருதப்படுகிறது. அந்த வேளையில் சிவபெருமானை வழிபட்டால் பாவங்கள் நீங்கி, புண்ணியம் பெருகும். சமய நூல்களின்படி, மனிதர்களின் ஒரு ஆண்டு என்பது தேவர்களுக்கு ஒரு நாள் ஆகும். அந்தக் கணக்கின்படி, மனிதர்களின் ஒவ்வொரு மாதமும் தேவர்களுக்கு இரண்டு மணி நேரத்திற்கு இணையானதாகக் கருதப்படுகிறது. இவ்வாறு கணக்கிடும்போது, ஆடி மாதம் தேவர்களின் பிரதோஷ காலத்திற்கு ஒப்பான காலமாக அமைகிறது என்று ஆன்மிக மரபு விளக்குகிறது.

அதனால்தான் ஆடி மாதம் முழுவதும் இறைவழிபாட்டிற்கு தனிச் சிறப்பு வழங்கப்பட்டுள்ளது.

இந்த மாதத்தில் செய்யப்படும் ஜபம், தியானம், விரதம், தானம், ஆலய தரிசனம் ஆகியவை பல மடங்கு பலனைத் தரும் என்று பெரியோர்கள் கூறியுள்ளனர். குறிப்பாக, சிவாலயங்கள் மட்டுமல்லாமல், சக்தி, விஷ்ணு, முருகன் உள்ளிட்ட அனைத்து ஆலயங்களிலும் ஆடி மாதம் முழுவதும் சிறப்பு வழிபாடுகள், திருமஞ்சனங்கள், உற்சவங்கள், திருவீதியுலாக்கள், இசை மற்றும் ஆன்மிக நிகழ்ச்சிகள் சிறப்பாக நடைபெறுகின்றன.

ஆடிப்பூரம் - அம்பாளுக்கு வளைகாப்பு நடத்தப்படுவதன் தத்துவம்:

ஆடி மாதத்தில் பெரும்பாலான அம்மன் ஆலயங்களில் நடைபெறும் சிறப்பு நிகழ்வு களில் மிகவும் முக்கியமானது, அம்பாளுக்கு வளைகாப்பு உற்சவம் ஆகும். குறிப்பாக ஆடிப்பூரம் அன்று, தமிழகம் முழுவதும் எண்ணற்ற சக்தி ஆலயங்களில் இந்த வைபவம் மிகுந்த பக்தி உணர்வுடன் கொண்டாடப்படுகிறது. இதற்குப் பின்னால் ஒரு சுவையான ஐதீகம் கூறப்படுகிறது. இதற்கு உறுதியான ஆகம அல்லது புராண ஆதாரங்கள் இல்லை என்றாலும், அம்பாளின் தாய்மைப் பெருமையை இக்கதை எடுத்துரைக்கும்.

அகில ஜெகன்மாதா என்று போற்றப்படும் பராசக்தி, உலகில் உள்ள ஒவ்வொரு உயிரையும் தன் குழந்தையாகவே கருதுகிறாள். எல்லா உயிர்களுக்கும் தாயாக இருந்தாலும், ஒரு நிறைமாத கர்ப்பிணித் தாய் தன் கருவில் குழந்தையைத் தாங்கும் அந்த அரிய ஆனந்த அனுபவத்தையும், தாய்மையின் பேருணர்வையும் தானும் உணர வேண்டும் என்று அம்பாள் விரும்பினாளாம்.

அந்த விருப்பத்தை சிவபெருமானிடம் அம்பாள் தெரிவித்தபோது, பரமேஸ்வரன் ஆடி மாதம் பூரம் நட்சத்திர நாளில், கைலாயத்தில் அம்பாளுக்கு கர்ப்பிணிப் பெண்ணுக்கு நடத்தப்படுவது போன்று மங்களகரமான வளைகாப்பு வைபவத்தை நடத்தி அருளியதாக ஐதீகம் கூறுகிறது. அந்த தெய்வீக நிகழ்வின் நினைவாகவே, ஆண்டுதோறும் ஆடிப்பூரம் அன்று அம்மன் ஆலயங்களில் வளைகாப்பு உற்சவம் நடத்தப்படுகிறது.

வண்ணமயமான கண்ணாடி வளையல்கள், மஞ்சள், குங்குமம், மலர்கள் ஆகியவற்றால் அம்பாள் அலங்கரிக்கப்படுகிறாள். பின்னர் அம்பாளுக்கு அணிவிக்கப்பட்ட வளையல்கள் பிரசாதமாக பக்தர்களுக்கு வழங்கப்படுகின்றன. இந்த வளையல் பிரசாதத்தை பெண்கள் பக்தியுடன் அணிந்துகொண்டால், திருமணத்தடை நீங்கும், மகப்பேறுகிட்டும், தீர்க்க சுமங்கலி பாக்கியம் நிலைக்கும், குடும்பத்தில் மங்களம் பெருகும். இந்த ஐதீகத்தின் மையச் செய்தி ஒன்றே, உலகிலுள்ள ஒவ்வொரு உயிரையும் தன் பிள்ளையாக அரவணைக்கும் பராசக்தியின் எல்லையற்ற தாய்மையை நினைவூட்டுவதே ஆடிப்பூர வளைகாப்பு விழாவின் ஆன்மிகப் பொருளாகும்.

நாகை நீலாயதாட்சி அம்மன் திருக்கோயிலில் `பூரம் கழித்தல்’:

நாகப்பட்டினத்தில் அமைந்துள்ள பிரசித்தி பெற்ற சக்தி தலங்களில் ஒன்று அருள்மிகு நீலாயதாட்சி அம்மன் திருக்கோயில். இத்தலத்தில் அம்பாள் கன்னித் தெய்வமாக அருள்பாலிப்பதால், ஆடிப்பூரத் திருநாளில் `பூரம் கழித்தல்’ எனப்படும் வைபவம் வெகு விமரிசையாக நடைபெறுகிறது.

இந்த உற்சவத்தின் போது அம்பாள் தினமும் சிறப்பான அலங்காரத்தில் திருவீதியுலா எழுந்தருளி பக்தர்களுக்கு அருள்பாலிக்கிறாள். மேலும், ஒன்பது கன்னிப் பெண்களை வரவழைத்து, அவர்களுக்கு வெற்றிலை, பாக்கு, குங்குமம், கண்ணாடி வளையல்கள், சீப்பு, கண்ணாடி மற்றும் பிற மங்கலப் பொருட்களை வழங்கி கௌரவிக்கும் வைபவமும் நடைபெறுகிறது.இவ்விழாவில் புட்டு, சிறப்பு நிவேதனமாகப் படைக்கப்படுகிறது. பின்னர் அது பக்தர்களுக்கு பிரசாதமாக வழங்கப்படுகிறது.

திருநெல்வேலி காந்திமதி அம்மன் திருக்கோயிலின் ஆடிப்பூர சீமந்த உற்சவம்:

திருநெல்வேலியில் உள்ள புகழ்பெற்ற அருள்மிகு காந்திமதி அம்மன் திருக்கோயிலில், ஆடிப்பூரத் திருவிழா சீமந்த (வளைகாப்பு) உற்சவமாக மிகுந்த சிறப்புடன் நடைபெறுகிறது.

ஆடிப்பூர நாளில், அம்பாள் அலங்கரிக்கப்பட்ட ஊஞ்சலில் எழுந்தருளச் செய்து, கர்ப்பிணித் தாய்க்கு நடத்தப்படும் சீமந்தம் போலவே மங்கள கரமான வளைகாப்பு வைபவம் நடத்தப்படுகிறது. அப்போது வளையல்கள் அணிவித்தல், மங்கள இசை, மங்களப் பொருட்கள் சமர்ப்பித்தல் போன்ற நிகழ்ச்சிகள் பக்தி பூர்வமாக நடைபெறுகின்றன.

இந்த உற்சவத்தின் தனிச் சிறப்பாக, அம்பாளின் வயிற்றுப் பகுதியில் ஊறவைத்த நவதானியங்கள் அல்லது பயிர் வகைகள் அடங்கிய துணியை கட்டும் வழக்கம் உள்ளது. இது கருவின் வளர்ச்சியையும், உயிர்களின் செழிப்பையும், உலக நலனையும் குறிக்கும் மங்கலச் சின்னமாகக் கருதப்படுகிறது. விதைகள் முளைத்து வளர்வதைப் போல, உயிர்கள் அனைத்தும் வளமுடன் வளர வேண்டும் என்ற தத்துவத்தை இந்த வழிபாடு எடுத்துரைக்கிறது.

இந்த சீமந்த உற்சவத்தை தரிசிக்கும் பெண்களுக்கு மகப்பேறு, சுமங்கலி பாக்கியம், குடும்ப நலம் மற்றும் வளமான வாழ்வு கிடைக்கும் என்பது பக்தர்களின் நம்பிக்கையாகும்.

தமிழகத்தில் ஆடிப்பூரம் மிகவும் சிறப்பாகக் கொண்டாடப்படும் இன்னும் சில முக்கியத் தலங்கள்:

* ஸ்ரீ வில்லிபுத்தூர் ஆண்டாள் திருக்கோயில்:

ஆடிப்பூரம் என்றாலே முதலில் நினைவிற்கு வருவது ஆண்டாள் அவதரித்த ஸ்ரீ வில்லிபுத்தூர். ஆடிப்பூரம் இங்கு ஆண்டாளின் அவதார மகோற்சவமாகக் கொண்டாடப்படுகிறது. பல நாட்கள் நடைபெறும் பிரம்மோற்சவம், திருத்தேர், திருமஞ்சனம், முத்துக்குறி, திருமண வைபவம் ஆகியவை மிகவும் பிரசித்தம்.

* ஸ்ரீ ரங்கம் ரங்கநாயகி தாயார் சந்நதி:

ஆடிப் பூரத்தன்று ரங்கநாயகி தாயாருக்கு சிறப்பு திருமஞ்சனம், அலங்காரம், வளைகாப்பு வைபவம் மற்றும் புட்டு நிவேதனம் நடைபெறும்.

* திருவாரூர் தியாகராஜர் திருக்கோயில்:

யோக கமலாம்பாளுக்கு ஆடிப் பூரத்தன்று வளைகாப்பு, திருமஞ்சனம், சிறப்பு அலங்காரம் நடைபெறும். புட்டு நிவேதனம் இத்தலத்தின் சிறப்புகளில் ஒன்றாகும்.

* மதுரை மீனாட்சி அம்மன் திருக்கோயில்:

மீனாட்சி அம்மனுக்கு சிறப்பு அபிஷேகம், அலங்காரம், வீதியுலா ஆகியவை நடைபெறுகின்றன. சக்தி வழிபாட்டிற்கு ஆயிரக்கணக்கான பக்தர்கள் தரிசனம் செய்கின்றனர்.

* மாங்காடு காமாட்சி அம்மன் திருக்கோயில்:

ஆடிப் பூரத்தன்று காமாட்சிக்கு வளைகாப்பு, லட்சார்ச்சனை, குங்குமம் அர்ச்சனை, சுமங்கலி பூஜை ஆகியவை சிறப்பாக நடைபெறுகின்றன.

* சமயபுரம் மாரியம்மன் திருக்கோயில்:

ஆடி மாதம் முழுவதும் பக்தர்கள் பெருந்திரளாக வந்து வழிபடுகின்றனர். ஆடி வெள்ளி, ஆடிப்பூரம் ஆகிய நாட்களில் விசேஷ அலங்காரங்களும்,

அபிஷேகங்களும் நடைபெறும்.

* மேல்மலையனூர் அங்காள பரமேஸ்வரி திருக்கோயில்:

ஆடிப்பூரம், ஆடி வெள்ளி, அமாவாசை வழிபாடுகள் மிகுந்த சிறப்புடன் நடைபெறுகின்றன.

* உறையூர் வளைகாப்பு அம்மன் திருக்கோயில்:

வளைகாப்பு வைபவத்திற்கே புகழ்பெற்ற தலம். மகப்பேறு வேண்டி ஏராளமான பெண்கள் வளையல் சமர்ப்பித்து வழிபடுகின்றனர்.

மேலும் குறிப்பிடத்தக் கதலங்கள்:

* திருவானைக்காவல் அகிலாண்டேஸ்வரி திருக்கோயில்,

* காஞ்சிபுரம் காமாட்சி அம்மன் திருக்கோயில்,

* திருக்கடையூர் அபிராமி அம்மன் திருக்கோயில்,

* புன்னைநல்லூர் மாரியம்மன் திருக்கோயில்,

* திருக்கருகாவூர் கர்ப்பரட்சாம்பிகை திருக்கோயில் (மகப்பேறு அருளுக்குப் புகழ்பெற்றதால் ஆடிப்பூர வழிபாடு சிறப்பு பெறுகிறது)

இவற்றில், ஸ்ரீ வில்லிபுத்தூர் ஆண்டாள், திருவாரூர் கமலாம்பாள், நாகை நீலாயதாட்சி, திருநெல்வேலி காந்திமதி, உறையூர் வளைகாப்பு அம்மன் ஆகிய ஐந்து தலங்களின் ஆடிப்பூர வைபவங்கள், தனித்துவமான ஐதீகங்களாலும், மரபுகளாலும் மிகவும் புகழ்பெற்றவை. எனவே, ஆடி மாதத்தில் இறைநாமம், ஆலய தரிசனம், விரதம், தானம், வேத - திவ்யப் பிரபந்த பாராயணம் போன்ற நற்செயல்களில் ஈடுபடுவோம். விவசாயி நிலத்தில் விதை விதைப்பது போல, நாமும் நம் மனத்தில் பக்தி என்னும் விதையை விதைப்போம். அந்த விதை வளர்ந்து, இறையருளால் முக்தி என்னும் பேரின்பப் பயிராக மலரட்டும்.

பராசரன்