ஒரு மாதத்தில் இரண்டு அமாவாசை வந்தால் எதை ஏற்றுக் கொள்வது?

?இத்தனை நாட்கள் ஒரு வருடத்தில் விரதம் இருக்க வேண்டும் என்று ஏதாவது கணக்கு இருக்கிறதா? அப்படி இருக்க முடியுமா?

- ரேவதி ராம்குமார், திருப்பூர்.

சாஸ்திரங்களிலும் ஆகமங்களிலும் ``ஒரு மனிதன் இத்தனை நாட்கள் கண்டிப்பாக விரதம் இருக்க வேண்டும்’’ என்ற கணக்கு எதுவுமில்லை. அது சாத்தியமும் இல்லை. அவரவர் உடல்நிலை, பக்தி, மற்றும் வாழும் சூழ்நிலைக்கு ஏற்ப விரதங்களைத் தேர்ந்தெடுக்கவே சாஸ்திரங்கள் வழிகாட்டுகின்றன. ஏகாதசி இருப்பவர்கள், பிரதோஷம் இருக்க மாட்டார்கள். சிலர் வெள்ளிக்கிழமை விரதம் இருப்பார்கள். சிலர் சனிக்கிழமை இருப்பார்கள். சிலர் கிருத்திகை விரதம் இருப்பார்கள். சிலர் பூசத்தில் இருப்பார்கள். உங்களால் என்று முடியுமோ, அந்த நாளில் விரதம் இருக்கலாம்.

மாதம் ஒரு நாள், இரண்டு நாள் உபவாசம் இருப்பது உடலுக்கும் நல்லது. உள்ளத்துக்கும் நல்லது. நவீன மருத்துவ அறிவியலின் படி, மாதம் 2 முறை (சுமார் 15 நாட்களுக்கு ஒருமுறை - ஏகாதசி / பிரதோஷம் போல) உபவாசம் இருப்பது உடலின் செல்களைப் புதுப்பிக்கிறது. இது செரிமான மண்டலத்திற்கு ஓய்வு தந்து, கழிவுகளை வெளியேற்ற உதவுகிறது. உபவாசம் இருக்கும் நாளில் மனதின் தேவையற்ற எண்ணங்கள் குறைந்து, அமைதியும் கவனக் குவிப்பும் கூடுகிறது. விரதம் என்பது உடலையும் மனதையும் தூய்மைப்படுத்தும் ஒரு சுய - கட்டுப்பாடே தவிர, நாட்களைக் கணக்கிட்டு நிரப்ப வேண்டிய கட்டாயக் கடமை அல்ல.

?ஒரு மாதத்தில் இரண்டு அமாவாசை வந்தால் எதை ஏற்றுக் கொள்வது?

- புண்ணியகோடி, நாமக்கல்.

ஒரு தமிழ் மாதத்திற்குள் இரண்டு அமாவாசைகள் வந்தால், அந்த மாதம் `மல’ மாதம் அல்லது `அதிக மாதம்’ என்று அழைக்கப்படுகிறது. சூரிய மாதக் கணக்கீட்டின்படி, ஒரு மாதத்தில் பஞ்சாங்க ரீதியாக இரண்டு அமாவாசைகள் அமைவது அபூர்வம். இத்தகைய மாதங்களில் சுப காரியங்களைத் (திருமணம், கிரகப்பிரவேசம் போன்றவை) தவிர்க்கும் வழக்கம் உள்ளது. இரண்டு அமாவாசைகள் வந்தாலும், இரண்டிலுமே முன்னோர்களுக்கான பிதுர் தர்ப்பணம் மற்றும் வழிபாடுகளைச் செய்வது அவசியம். இதில் முதல் அமாவாசையைவிட இரண்டாவது வரும் அமாவாசை மிகவும் விசேஷமாகக் கருதப்படுகிறது.

?எத்தனை கோயில்களில் சுவாமி தெற்கே பார்த்தபடி இருக்கிறார்?

- ராஜூசுந்தரம், ஸ்ரீ ரங்கம்.

`தட்சிணம்’ என்றால் தெற்கு. பெரும்பாலான கோயில்களில் மூலவர் (சுவாமி) கிழக்கு அல்லது மேற்கு திசை நோக்கியே எழுந்தருளியிருப்பார். இருப்பினும், சில குறிப்பிட்ட தத்துவங்கள் மற்றும் அம்சங்களின் அடிப்படையில், தெற்கு திசை நோக்கி சுவாமி காட்சி தரும் கோயில்களும் அமைக்கப்பட்டிருக்கின்றன. சிதம்பரம் நடராஜர் கோயில், உத்திரகோசமங்கை, மதுரை வெள்ளியம்பலம், திருவாலங்காடு உள்ளிட்ட அனைத்து சிவன் கோயில்களிலும் உள்ள நடராஜர் சந்நதிகள், தெற்கு நோக்கியே அமைக்கப்பட்டிருக்கும். தமிழ்நாட்டின் அனைத்துச் சிவன் கோயில்களிலும் கோஷ்ட தெய்வமாக விளங்கும் தட்சிணாமூர்த்தி தெற்கு நோக்கியே இருப்பார். குறிப்பாக தென்குடித்திட்டை, பட்டமங்கலம், சுருட்டப் பள்ளி (சயன தட்சிணாமூர்த்தி) ஆகிய கோயில்கள் சிறப்பு வாய்ந்தவை.

ஸ்ரீ ரங்கம் ரங்கநாதசுவாமி கோயில் (பூலோக வைகுண்டம்). இங்கு மூலவர் அரங்கநாதர் மேற்கு திசையில் தலைவைத்து, தெற்கு நோக்கியே பள்ளி கொண்டுள்ளார். திருக்கடையூர் அமிர்த கடேஸ்வரர் கோயில் - எமனைச் சம்ஹாரம் செய்த தலம் என்பதால் தெற்கு திசைக்கு முக்கியத்துவம் உண்டு. காளஹஸ்தி ( ஸ்ரீ காளஹஸ்தீஸ்வரர் கோயில்) - இங்குள்ள தட்சிணமுகாளேஸ்வரர் வடிவம் தெற்கு நோக்கி உள்ளது. எதிர்மறை ஆற்றல்கள், செய்வினை மற்றும் பயத்தைப் போக்க ஸ்ரீ ஆஞ்சநேயர் (எ.கா: முள்படப்பை சஞ்சீவி ஆஞ்சநேயர்) மற்றும் பத்ரகாளியம்மன் / பிரத்யங்கிரா தேவி கோயில்களில் பல தெற்கு நோக்கி இருக்கின்றன.

?மூத்த பையனுக்கும் மூத்த பெண்ணுக்கும் கல்யாணம் செய்யக் கூடாது என்கிறார்களே?

- வி.லதா, சேலம்.

கால தேசத்தை அனுமானித்துத்தான் இந்த விஷயங்களை எல்லாம் நிர்ணயம் செய்ய வேண்டும். உதாரணமாக, இப்பொழுது ஒரு குடும்பத்துக்கு ஒரு குழந்தைதான் இருக்கிறது. பத்து ஆண்டுகள் கழித்து பெரும்பாலானவர்களுக்கு ஒரு குழந்தைதான் இருக்கும். தலைச்சன் குழந்தை, கடைக் குட்டி என்றெல்லாம் இருக்காது. அப்படியானால் மூத்த பெண், மூத்த பையன் இப்படித்தான் கல்யாணம் செய்து ஆக வேண்டும். ஆகையினால் சாஸ்திரங்களை கால தேச வர்தமானத்துக்கு உட்பட்டே பரிசீலிக்க முடியும். இந்த அடிப்படையில் மூத்தபையனுக்கும் மூத்த பெண்ணுக்கும்தான் திருமணம் செய்ய முடியும். அதனால் தவறில்லை.

?கல்லடி பட்டாலும் கண்ணடி படக்கூடாது? என்ன தத்துவம்?

- சு.கணபதி, கும்பகோணம்

உடலுக்கு ஏற்படும் காயத்தைவிட, பிறருடைய பொறாமை மற்றும் தீய எண்ணங்களால் ஏற்படும் உளவியல் பாதிப்பு அதிகம். ஒருவரின் வளர்ச்சியை, அழகை அல்லது மகிழ்ச்சியைக் கண்டு மற்றவர்கள் மனதில் கொள்ளும் பொறாமை பாதிக்கப்பட்டவரின் ஆழ்மனதைப் பாதிக்கிறது. பிறரின் கூர்மையான எதிர்மறைப் பார்வை, மனிதனின் நரம்பு மண்டலம் மற்றும் தன்னம்பிக்கையை அசைத்துப் பார்க்கிறது. அகவூக்கம் குறையும்போது, இயல்பாகவே கவனக்குறைவு ஏற்பட்டு செயல்களில் தோல்வியோ அல்லது உடல்நலக் குறைவோ ஏற்படுகிறது. நமது முன்னோர்களின் தத்துவப்படி, ஒவ்வொரு மனிதனைச் சுற்றிலும் ஒரு ஆரா (ஆற்றல் வட்டம்) உள்ளது. ஒருவரின் பொறாமை நிறைந்த பார்வை அந்த ‘ஆரா’வை நேரடியாக ஊடுருவி, மனிதனின் மன அமைதியையும் ஆற்றலையும் சீர்குலைக்கிறது.

?சில தமிழ் மாதங்களில் 29 நாட்களும் சில மாதங்களில் 32 நாட்களும் வருகிறதே?

- ஆர்.நந்தகிஷோர், தாம்பரம்.

உண்மைதான். சூரியன் ஒவ்வொரு ராசியைக் கடக்க எடுத்துக் கொள்ளும் காலம் மாறுபடுவதால், தமிழ் மாதங்களின் நாட்களும் மாறுபடுகின்றன. சித்திரை முதல் புரட்டாசி வரை (கோடை - மழைக்காலம்), சூரியனின் நகர்வு மெதுவாக இருக்கும். அதனால் இந்த மாதங்களில் 31 முதல் 32 நாட்கள் வரை இருக்கும். (குறிப்பாக ஆனி, ஆடி, வைகாசி போன்ற மாதங்கள் 31 அல்லது 32 நாட்களைப் பெறும்). ஐப்பசி முதல் பங்குனி வரை (குளிர் காலம்), சூரியனின் நகர்வு வேகமாக இருக்கும். அதனால் இந்த மாதங்களில் 29 முதல் 30 நாட்கள் மட்டுமே இருக்கும். (குறிப்பாக மார்கழி, தையில் சில வருடங்களில் 29 நாட்கள் மட்டுமே வரும்).

சுருக்கமாகச் சொன்னால், ஆங்கில மாதம் மனிதனால் உருவாக்கப்பட்ட நிலையான கணக்கு; தமிழ் மாதம் என்பது சூரியனின் இயற்கை நகர்வை அப்படியே கணக்கிடும் துல்லியமான வானியல் முறை.

உங்களுக்கு ஏற்படும் ஜோதிட சந்தேகங்களை கேள்விகளாக எழுதி அனுப்பிவைக்கவும். ஏன் எதற்கு எப்படி? தினகரன், ராசி பலன்கள் தபால் பை எண். 2908, மயிலாப்பூர், சென்னை - 600 004.