பரலோக வழிகாட்டி

நாம் செல்ல விரும்பும் ஊருக்கு வழிதெரியாமல் தடுமாறும் போது, சிறிதளவும் தயக்கமின்றி உடனடியாக செல்பேசியில் உள்ள கூகுள் மேப்பை பயன்படுத்துவோம். வலப்பக்கம் திரும்புங்கள், இடப்பக்கம் செல்லுங்கள், நேரே செல்லுங்கள் என்று வழிகாட்டலைக் கேட்டு பயணம் செய்கிறோம். நாம் இலக்கைச் சேரும் வரை அது தொடர்ந்து நம்மை நடத்திக் கொண்டே இருக்கும். அதேபோல் நம் வாழ்க்கைப் பயணத்திலும் நாளை என்ன நடக்கும் என்பதை நம்மில் யாரும் அறிய முடியாது. எதிர்காலத்தை முழுமையாக அறிந்திருந்தால் இன்றே சரியான திட்டங்களை அமைத்திருக்கலாம். ஆனால், மனிதன் வருங்காலத்தை அறியாதவன். அப்படியிருக்க, அறியாத எதிர்காலத்திற்குள் பயணிக்கும் நம்மை யார் வழிநடத்துவார்?

இறைமக்களே, காலத்தின் மூன்று கட்டங்களையும் நன்கு அறிந்த நம் சர்வ வல்லமையுள்ள தேவன்! “நான் உனக்குப் போதித்து, நீ நடக்க வேண்டிய வழியை உனக்குக் காட்டுவேன்; உன்மேல் என் கண்ணை வைத்து, உனக்கு ஆலோசனை சொல்லுவேன்.” (சங்கீதம் 32:8) என இறைவேதத்தின் அன்பு கடவுள் வாக்களித்துள்ளார். என்ன அற்புதமான வாக்குத்தத்தம்!

தேவன் நமக்கு நடக்க வேண்டிய வழியையும், செய்ய வேண்டிய காரியங்களையும் காட்டி, ஆலோசனை வழங்குகிறார். இது உண்மையில் ஒரு பரலோக வழிகாட்டி!

நம் மனதில் இந்த பரலோக வழிகாட்டி செயல்படத் தொடங்கினால், வாழ்க்கை எளிதாகி விடும். குழப்பமும் பயமும் இல்லாமல், தெளிவான முடிவுகளுடன் நாம் முன்னேற முடியும். நாம் பயன்படுத்தும் கூகுள் மேப் கூட சில தருணங்களில் நம்மை நடுக்காட்டில்சிக்க வைத்துவிடும். ஆனால், பரலோக வழிகாட்டி ஒருபோதும் தவறான வழியில் நடத்தாது. சிறிய காரியங்களிலிருந்து பெரிய முடிவுகள் வரை நம்மை வழிநடத்தும் சக்தி கொண்டது. இன்று என்ன சமைப்பது, எந்த படிப்பைத் தேர்வு செய்வது, எந்த வேலை, யாரைத் தேர்வு செய்வது போன்ற முக்கியமான விஷயங்களிலும் நாம் தடுமாறி தவறுகளைச் செய்யலாம். தாமதமான முடிவுகள் நஷ்டத்தைத் தரலாம்; தவறான முடிவுகள் வாழ்வையே சிதைக்கலாம்.

ஆனால், தேவன் நமக்காக அவ்வளவு குழப்பமும் கஷ்டமும் விரும்பவில்லை.நம்மை அன்போடு வழிநடத்த அவர் எப்போதும் பேசிக் கொண்டே இருக்கிறார். நாமோ, அவரது மென்மையான சத்தத்தை விட நம் மனத்தின் அடங்காத எண்ணங்களுக்குச் செவி சாய்த்து விடுகிறோம். இறைவேதம் தெளிவாகச் சொல்கிறது: “நீங்கள் வலதுபுறமாய்ச் சாயும்போதும், இடதுபுறமாய்ச் சாயும்போதும்: ‘வழி இதுவே, இதிலே நடவுங்கள்’ என்று உங்களுக்குப் பின்னாலே சொல்லும் வார்த்தையை உங்கள் காதுகள் கேட்கும்.” (ஏசாயா 30:21) என்ன ஒரு அன்பான தேவன்! பகலும் இரவும் இடைவிடாமல் நம்மோடு இருந்து நமக்கு வழிகாட்ட விரும்புகிறார். ஆகவே, சிறிய முடிவுகளிலிருந்து வாழ்க்கையின் மிகப் பெரிய முடிவுகள் வரையிலும், கர்த்தரின் சத்தத்தை கேட்டு முடிவு செய்யுங்கள். அப்போது குழப்பம் இருக்காது, தடுமாற்றம் இருக்காது, பயம் இருக்காது. பரலோக வழிகாட்டியாகிய இறைவேதம் உங்கள் வாழ்க்கையை அழகான பாதையில் நடத்துவதாக.

- அருள்முனைவர் பெ.பெவிஸ்டன்.