சென்னை: பிரபல நகைச்சுவை நடிகர் ஆர்.எஸ்.சிவாஜி, உடல்நலக்குறைவு காரணமாக இன்று திடீரென்று மரணம் அடைந்தார். அவருக்கு வயது 67. தமிழில் ஏராளமான படங்களில் நகைச்சுவை வேடத்தில் நடித்தவர், ஆர்.எஸ்.சிவாஜி. கமல்ஹாசன் மற்றும் அவரது ராஜ்கமல் பிலிம்ஸ் இண்டர்நேஷனல் நிறுவனம் சம்பந்தப்பட்ட படங்களில் அதிகமாக நடித்துள்ள ஆர்.எஸ்.சிவாஜி, பல படங்களில் உதவி இயக்குனராகவும், ஒலி வடிவமைப்பாளராகவும், லைன் புரொடியூசராகவும் பணியாற்றியுள்ளார். 1945ல் எல்லிஸ் ஆர்.டங்கன் இயக்கிய ‘மீரா’ என்ற படத்தில் பணியாற்றிய நடிகரும், தயாரிப்பாளருமான எம்.ஆர்.சந்தானத்தின் மகன் ஆர்.எஸ்.சிவாஜி. இவரது சகோதரர் சந்தானபாரதி பிரபல இயக்குனரும், நடிகரும், தயாரிப்பாளரும் ஆவார்.
1980 முதல் 1990 வரை கமல்ஹாசனின் படங்களில் தொடர்ந்து காமெடி செய்து வந்த ஆர்.எஸ்.சிவாஜி, ‘அபூர்வ சகோதரர்கள்’ படத்தில் ஜனகராஜிடம், ‘சார்… நீங்க எங்கயோ போயிட்டீங்க’ என்று அடிக்கடி பேசிய வசனம் ரசிகர்கள் மத்தியில் புகழ்பெற்றது. பிறகு பல படங்களில் இந்த வசனத்தை மேற்கோள் காட்டி பலர் பேசி நடித்துள்ளனர். சமீபத்தில் நயன்தாராவின் தந்தை வேடத்தில் ‘கோலமாவு கோகிலா’, விவேக்கின் உதவியாளராக ‘தாராள பிரபு’, சாய் பல்லவியின் தந்தையாக ‘கார்கி’ ஆகிய படங்களில் நடித்திருந்தார். ஆர்.எஸ்.சிவாஜி கடைசியாக நடித்த ‘லக்கி மேன்’ என்ற படம் நேற்று திரைக்கு வந்தது. இதில் அவர் யோகி பாபுவுக்கு கார் ஓட்ட பயிற்சி அளிப்பவராக நடித்திருந்தார்.
பல்வேறு மொழிகளில் நூற்றுக்கணக்கான படங்களில், அனைத்து முன்னணி நடிகர், நடிகைகளுடன் இணைந்து நடித்துள்ள அவர், டி.வி தொடர்கள் மற்றும் வெப்தொடர்களிலும் நடித்துள்ளார். கடந்த சில மாதங்களாக உடல்நலக்குறைவு காரணமாக சிகிச்சை பெற்று வந்த ஆர்.எஸ்.சிவாஜி, சிகிச்சை பலனின்றி சென்னை வளசரவாக்கத்தில் உள்ள தனது வீட்டில் இன்று காலை திடீரென்று மரணம் அடைந்தார். அவரது மறைவுச்செய்தி அறிந்து தமிழ்த் திரையுலகினர் இரங்கல் தெரிவித்து வருகின்றனர்.
