ஐபிஎல் தொடரில் இடம்பெற்றுள்ள அணிகளில் பல, 10 போட்டிகளில் ஆடி முடித்துள்ள நிலையில், பிளே ஆப் சுற்றுக்கு தகுதி பெறும் வாய்ப்புள்ள அணிகள் பற்றிய ஒரு அலசல்.
* ராயல் சேலஞ்சர்ஸ் பெங்களூரு: இந்த அணி 10 போட்டிகளில் ஆடி 7ல் வென்று, 14 புள்ளிகளுடன் பட்டியலில் முதலிடத்தில் உள்ளது. பிளே ஆப் சுற்றுக்கு நெருங்கி விட்ட அணியாக கருதப்படும் பெங்களூரு, முதல் இரு இடங்களில் ஒன்றை பிடிக்க முனைப்பு காட்டி வருகிறது. இன்னும் 4 போட்டிகள் மீதமுள்ள நிலையில், அவற்றில் 2ல் வென்றால் பட்டியலில் முதல் 4 இடங்களுக்குள் பெங்களூரு வந்து விடும்.
* மும்பை இந்தியன்ஸ்: மும்பை அணி, 10 போட்டிகளில் ஆடி 6ல் வென்று, 12 புள்ளிகளுடன் பட்டியலில் 2ம் இடத்தை பெற்றுள்ளது. இதன் ரன் ரேட் விகிதமும் சாதகமான அம்சமாக உள்ளது. இந்த அணி, கடைசி 5 போட்டிகளில் தொடர்ச்சியாக வென்று தன் வல்லமையை நிரூபித்து வருகிறது. மீதமுள்ள 4 போட்டிகளில் 3ல் வென்றால், பட்டியலில் முதல் 4 இடங்களில் ஒன்றை மும்பை பிடிக்கும்.
* குஜராத் டைடன்ஸ்: குஜராத் அணி, 9 போட்டிகளில் ஆடி 6ல் வென்றுள்ளது. 12 புள்ளிகளுடன் பட்டியலில் 3ம் இடத்தை வகித்து வருகிறது. மீதமுள்ள 5 போட்டிகளில் 2ல் வென்றால் கூட, டாப் 4ல் ஒரு இடம் பெறலாம். 3ல் வென்றால் பிளே ஆப் சுற்றுக்கு நிச்சயம் தகுதி பெறலாம்.
* டெல்லி கேபிடல்ஸ்: டெல்லி அணி, 10 போட்டிகளில் ஆடி 6ல் வென்று 12 புள்ளிகளுடன் பட்டியலில் 4ம் இடத்தில் உள்ளது. கடைசியாக ஆடிய 6 போட்டிகளில் 4ல் தோல்வியை தழுவி தற்போது, மோசமான ஃபார்மில் உள்ளது. மீதமுள்ள 4 போட்டிகளில் குறைந்தபட்சம் 2ல் வென்றால் பிளே ஆப் சுற்றை உறுதி செய்யலாம்.
* பஞ்சாப் கிங்ஸ்: 9 போட்டிகளில் ஆடி (சென்னையுடன் நேற்று நடந்த போட்டி நீங்கலாக) 5ல் வென்று 11 புள்ளிகளுடன் பட்டியலில் 5ம் இடத்தில் பஞ்சாப் உள்ளது. மீதமுள்ள 5 போட்டிகளில் 3ல் கட்டாயம் வென்றாக வேண்டிய நிலையில் பஞ்சாப் உள்ளது. அதிக ரன் வித்தியாசத்தில் அபார வெற்றி பெற்றால் 2ல் வென்றால் கூட போதுமானது.
* லக்னோ சூப்பர் ஜெயன்ட்ஸ்: இந்த அணி, 10 போட்டிகளில் ஆடி 5ல் வென்று 10 புள்ளிகள் பெற்று 6ம் இடத்தில் உள்ளது. மீதமுள்ள 4 போட்டிகளில் 3ல் அதிக ரன் வித்தியாசத்தில் வென்றால் பிளே ஆப் சுற்றுக்கு முன்னேறும் வாய்ப்பு உள்ளது.
* கொல்கத்தா நைட் ரைடர்ஸ்: இந்த அணி 10 போட்டிகளில் ஆடி 4ல் வென்று (ஒரு போட்டி டை), 9 புள்ளிகளுடன் பட்டியலில் 7ம் இடத்தை பிடித்துள்ளது. மீதமுள்ள 4 போட்டிகளிலும் வென்றால் பிளே ஆப் சுற்றுக்கு முன்னேறலாம்.
* ராஜஸ்தான் ராயல்ஸ்: இந்த அணி 10 போட்டிகளில் ஆடி 3ல் மட்டுமே வென்று 6 புள்ளிகளுடன் பட்டியலில் 8ம் இடத்தை பெற்றுள்ளது. மீதமுள்ள 4 போட்டிகளிலும் வென்று, பட்டியலில் தனக்கு மேலே உள்ள அணிகள் தோல்வியை தழுவும் பட்சத்தில், பிளே ஆப் சுற்றுக்கு முன்னேறும் வாய்ப்பு உள்ளது.
* சன்ரைசர்ஸ ஐதராபாத்: ஐபிஎல் தொடரின் துவக்கத்தில் அதிரடி ஆட்டத்தை வெளிப்படுத்தி பலரை வியப்பில் ஆழ்த்திய அணியான சன்ரைசர்ஸ் அதன் பின் தோல்விகளை தழுவியது. 9 போட்டிகளில் ஆடி 3ல் மட்டுமே வென்றுள்ள சன்ரைசர்ஸ், 6 புள்ளிகளுடன் பட்டியலில் 9ம் இடத்தில் உள்ளது. மீதமுள்ள 5 போட்டிகளிலும் வென்று, தனக்கு மேல் உள்ள அணிகள் தோற்கும் பட்சத்தில் சன்ரைசர்ஸ் பிளே ஆப் சுற்றுக்கு செல்லலாம்.
* சென்னை சூப்பர் கிங்ஸ்: 9 போட்டிகளில் ஆடி (பஞ்சாபுடன் நேற்று நடந்த போட்டி நீங்கலாக) 2ல் மட்டுமே வென்றுள்ள சென்னை அணிக்கு, அநேகமாக பிளே ஆப் சுற்றுக்கு முன்னேறும் வாய்ப்பு துளியும் இல்லை. மீதமுள்ள 5 போட்டிகளில் வென்றாலும், அதன் ரன் ரேட் மிக மோசமானதாக உள்ளது. எனவே, டாப் 4க்குள் நுழைவது சென்னை அணிக்கு எட்டாக்கனியாகவே இருக்கும்.
