நாடாளுமன்ற ஜனநாயகம் நாள்தோறும் குழிதோண்டி புதைக்கப்பட்டு வருகிறது: செல்வப்பெருந்தகை குற்றச்சாட்டு
பாஜ எம்பிக்கள், மல்லிகார்ஜுன கார்கேவை தாக்க முற்பட்டது குறித்து நாடாளுமன்ற காங்கிரஸ் கட்சி சார்பாக காவல்துறையினரிடம் புகார் அளிக்கப்பட்டுள்ளது. உண்மை நிலை இப்படியிருக்க, பாஜவை சேர்ந்த இரு நாடாளுமன்ற உறுப்பினர்கள் தாக்கப்பட்டதாக நாடகமாடி வருகிறார்கள். பிரதமர் மோடி தலைமையிலான ஆட்சியில் நாடாளுமன்ற ஜனநாயகம் நாள்தோறும் குழிதோண்டி புதைக்கப்பட்டு வருகிறது. நாடாளுமன்றத்தில் ஆரோக்கியமான விவாதங்கள், கருத்து மோதல்கள் நடைபெறுவதற்கு பதிலாக மல்லிகார்ஜுன கார்கே, ராகுல்காந்தி ஆகியோரை வன்முறை நோக்கத்துடன் தாக்க முற்பட்ட பாஜவினரை கண்டித்து தமிழகத்தின் அனைத்து மாவட்டங்களிலும் கண்டன ஆர்ப்பாட்டங்கள் நடத்தும்படி கேட்டுக் கொள்கிறேன். இவ்வாறு அவர் கூறியுள்ளார்.
