மெல்போர்ன்: ஆண்டின் முதல் கிராண்ட்ஸ்லாம் போட்டியான ஆஸ்திரேலிய ஓபன் டென்னிஸ் போட்டி தொடர் மெல்போர்னில் நடைபெற்று வருகிறது. இதில் கலப்பு இரட்டையர் பிரிவில் நேற்று நடந்த அரையிறுதி போட்டியில் இந்தியாவின் சானியாமிர்சா, ரோகன் போபண்ணா ஜோடி, இங்கிலாந்தின் நீல் ஸ்குப்ஸ்கி, அமெரிக்காவின் டெசிரே க்ராவ்சிக் ஜோடியை எதிர்த்து விளையாடியது. ஒரு மணி நேரம் 52 நிமிடம் நடந்த இந்த போட்டியில், சானியா மிர்சா, ரோகன் போபண்ணா ஜோடி 7-6(5), 6-7(5), 10-6 என்ற செட் கணக்கில் வெற்றிபெற்று இறுதி போட்டிக்கு முன்னேறியது.

வரும் 28ம் தேதி நடைபெறும் இறுதி போட்டியில் பிரேசிலின் லூயிசா ஸ்டெபானி,  ரபேல் மாடோஸ் ஜோடியை எதிர்த்து விளையாட உள்ளது. நேற்று வெற்றிக்கு பின் சானியா மிர்சா கூறியதாவது: எனக்கு 14 வயதாக இருந்தபோது போபண்ணா தான் என்னுடைய முதல் கலப்பு இரட்டையர் பார்ட்னர். இன்று எனக்கு 36 வயது, அவருக்கு வயது 42. எங்களிடம் உறுதியான பார்ட்னர்ஷிப் உள்ளது. நாங்கள் சிறந்ததைக் கொண்டு வர வேண்டும் என்று எங்களுக்குத் தெரியும், நாங்கள் அதைச் செய்ததில் மகிழ்ச்சி அடைகிறேன்.நான் மிகவும் உணர்ச்சிவசப்படுகிறேன். நான் கடந்த 18 ஆண்டுகளாக இங்கு(ஆஸி.ஓபன்) இருக்கிறேன்.

இது எனக்கு வீடு போல் இருக்கிறது. இது ஒரு சிறந்த பயணம், நான் இங்கு திரும்பி வருவதை இழக்கப் போகிறேன். இது எனது கடைசி கிராண்ட்ஸ்லாம் என்பதைப் பொருட்படுத்தாமல் நான் வெற்றி பெற விரும்புகிறேன்:, என்றார். போபண்ணா கூறுகையில், ”நாங்கள் அனைவருக்கும் ஊக்கமளிக்க வேண்டும், இந்தியாவிலும் அது தேவை,பட்டம் வெல்வது தான் அதைத் தொடர ஒரே வழி என்று நான் நினைக்கிறேன், என்றார்.