ராணிப்பேட்டை: ராணிப்பேட்டையில் உள்ள உழவர் சந்தையில் சூரிய ஒளியில் இயங்கும் வகையில் ரூ.5 லட்சம் மதிப்பில் குளிர்பதன அறை அமைக்கப்பட்டுள்ளது. இதில் 5 டன் வரை காய்கறிகளை பாதுகாப்பாக இருப்பு வைக்கலாம். ராணிப்பேட்டை உழவர் சந்தைக்கு வாலாஜா, சோளிங்கர், காவேரிப்பாக்கம் உள்ளிட்ட பகுதிகளில் விளைவிக்கப்படும் காய்கறிகள், கீரை வகைகள் ஆகியவற்றை விவசாயிகள் விற்பனை செய்து வருகின்றனர். பசுமையான காய்கறிகள்  குறைந்த விலையில் விற்பனை செய்யப்படுகிறது.

இதனால் ஏராளமான பொதுமக்கள் ராணிப்பேட்டை உழவர் சந்தையில் காய்கறிகளை வாங்கிச் செல்கின்றனர். இந்நிலையில், உழவர் சந்தைக்கு கொண்டு வரப்படும் காய்கறிகளை பாதுகாப்பாக இருப்பு வைக்கும் வகையில் ரூ.5 லட்சம் மதிப்பில் சூரிய ஒளியில் இயங்கக்கூடிய குளிர்பதன அறை அமைக்கப்பட்டுள்ளது. இதுகுறித்து ராணிப்பேட்டை உழவர் சந்தை நிர்வாக அலுவலர் முருகன் கூறுகையில், ‘தமிழகம் முழுவதும் உள்ள உழவர் சந்தைகளை தரம் உயர்த்த முதலமைச்சர் உத்தரவிட்டுள்ளார்.

அதன்படி, ராணிப்பேட்டை உழவர் சந்தையில் விவசாயிகள் பயன்பெறும் வகையில் ரூ.5 லட்சம் மதிப்பில் குளிர்பதன அறை அமைக்கப்பட்டுள்ளது. இந்த அறை சூரிய ஒளியில் மூலம் குளிரூட்டப்படும்.  மேலும், 5 டன் வரை காய்கறிகளை பாதுகாப்பாக இருப்பு வைக்கலாம். சுய உதவிக்குழு மூலமாக இந்த அறை பராமரிக்கப்படும். விவசாயிகள் விற்பனைக்கு கொண்டு வரும் காய்கறிகளை இந்த குளிர்பதன அறையில் வைத்துக்கொள்ளலாம். இதற்கு குறைந்த கட்டணம் வசூலிக்கப்படும். இந்த குளிர்பதன அறை விரைவில் விவசாயிகள் பயன்பாட்டிற்கு கொண்டுவரப்படும், என்றார்.