சென்னை: சென்னை வானகரத்தில் இன்று நடைபெறும் அதிமுக பொதுக்குழு கூட்டத்திற்கு 7 எஸ்பிக்கள் தலைமையில் 2 ஆயிரம் போலீஸ் பாதுகாப்பு போடப்பட்டுள்ளது. குழு மோதல்களை தடுக்கும் வகையில் போலீசார் சிறப்பு ஏற்பாடுகளை செய்துள்ளனர். அதிமுகவிற்கு ஒன்றைத் தலைமை கோரிக்கை கடந்த ஒரு வாரமாக நடந்து வருகிறது.இந்த பரபரப்பான சூழலில் இன்று வானகரத்தில் நடைபெறும் அதிமுக பொதுக்குழு கூட்டத்திற்கு ஆவடி மாநகர காவல்துறை கமிஷனர் சந்தீப் ராய் ரத்தோர் மேற்பார்வையில் 7 எஸ்பிக்கள் தலைமையில் 21 டிஎஸ்பிக்கள், இன்ஸ்பெக்டர்கள், சப்-இன்ஸ்பெக்டர்கள், காவலர்கள் மற்றும் ஆயுதப்படை காவலர்கள் என மொத்தம் 2 ஆயிரம் போலீசார் பாதுகாப்பு பணியில் ஈடுபட்டுள்ளனர். பொதுக்குழு நடைபெறும் மண்டபம் அருகே 3 அடுக்குகளாக பாதுகாப்பு பணியில் ஈடுபட்டுள்ளனர். பொதுக்குழுவின் போது இருதரப்பு மோதல்களை தடுக்கும் வகையில் சாதாரண உடையில் போலீசார் பாதுகாப்பு பணியில் ஈடுபடுத்தப்படுவார்கள்.