ராமேஸ்வரம்: ராமநாதபுரம் மாவட்டம், ராமேஸ்வரத்தில் நேற்று காலை 6 மணியளவில் சுமார் 50 அடி தூரத்திற்கு திடீரென கடல் உள்வாங்கியது. இதனால் கடல் அடியில் உள்ள பவளப்பாறைகள், சிப்பிகள் உள்ளிட்டவை வெளியில் தென்பட்டன. கடல் உள்வாங்கியதால், புனித நீராட வந்திருந்த பக்தர்கள் மத்தியில் பதற்றமும், பரபரப்பும் ஏற்பட்டது. பின்னர் காலை 7.30 மணியளவில் மீண்டும் கடல் நீர்மட்டம் சீரானது. இதனால் பக்தர்கள் நிம்மதியடைந்தனர். இதுபற்றி உள்ளூர் மக்கள் கூறுகையில், ‘‘அமாவாசை, பவுர்ணமி தினங்களில் ராமேஸ்வரத்தில் கடல் உள்வாங்குவது வழக்கமாக நடைபெறுவதுதான். ஆனால் 50 அடி தொலைவு வரை கடல் உள்வாங்கியதால் சற்று பரபரப்பு ஏற்பட்டது. இருப்பினும் 2 மணி நேரத்திற்குள், மீண்டும் கடல் நீர்மட்டம் சீராகி விட்டது’’ என்றனர்.