சென்னை : தடுப்பூசி செலுத்தாமல் கொரோனாவால் பாதிக்கப்படுவோர் கடுமையான பாதிப்பை சந்திப்பதாகவும் சிலர் மரணத்திற்கு தள்ளப்படுவதாகவும் மக்கள் நல்வாழ்வுத் துறை அமைச்சர் மா சுப்ரமணியன் தெரிவித்துள்ளார். தமிழ்நாடு முழுவதும் இன்று 20வது மெகா கொரோனா தடுப்பூசி முகாம் நடைபெற்று வருகிறது. அதன்படி சென்னையை அடுத்த கோவிலம்பாக்கத்தில் ஆரம்ப சுகாதார நிலையத்தில், தடுப்பூசி முகாமை தொடங்கி வைத்து பேசிய மக்கள் நல்வாழ்வுத் துறை அமைச்சர் மா சுப்ரமணியன்,  தமிழ்நாட்டில் 9.39 கோடி பேருக்கு கொரோனா தடுப்பூசியும் 3.44 லட்சம் பேருக்கு பூஸ்டர் தடுப்பூசியும் செலுத்தப்பட்டு இருப்பதாக தெரிவித்தார்.

இன்னுயிர் காப்போம் திட்டத்தின் மூலம் இதுவரை 47.09 லட்சம் பேர் பயன் பெற்றுள்ளதாகவும் இதுவரை விபத்துகளில் சிக்கிய 15,000த்திற்கும் மேற்பட்டோர் காப்பாற்றப்பட்டு இருப்பதாகவும் அமைச்சர் மா. சுப்ரமணியன் தெரிவித்துள்ளார். தமிழ்நாட்டில் இதுவரை 97 லட்சம் பேர் 2ம் டோஸ் தடுப்பூசி செலுத்தவில்லை என தெரிவித்த அமைச்சர் மா சுப்ரமணியன், பரவி வரும் புதிய வகை வைரஸின் பாதிப்புகளில் இருந்து தப்பிக்க மக்கள் அனைவரும் தடுப்பூசி செலுத்திக் கொள்ள வேண்டும் என்று அறிவுறுத்தினார்.