பொன்னமராவதி: பொன்னமராவதி அருகே வார்ப்பட்டி ஊராட்சியை சேர்ந்த நல்லூர் கிராம மக்களுக்கான மயானத்திற்கு பாதைவசதி இல்லாதததால் இறந்தவர் உடலை கண்மாயில் இடுப்பளவு தண்ணீரில் சுமந்து ெசன்றனர். பொன்னமராவதி அருகே வார்பட்டி ஊராட்சி நல்லூரில் மயானத்திற்கு முறையான பாதை வசதி இல்லை என கூறப்படுகிறது. இதனால் கண்மாய்க்குள் இடுப்பளவு தண்ணீரில் நீந்தியபடி இடுகாடு மற்றும் சுடுகாட்டுக்கு இறந்தவரின் உடலை கொண்டு செல்லும் நிலை இருந்து வருகிறது. அடையாஞ்சகண்மாய் கண்மாய், சின்னமுத்தி கண்மாய் ஆகிய இரண்டு கண்மாய்களை தாண்டி ஒன்றரை கிலோமீட்டர் தூரத்திற்கு சுமந்து செல்லும் நிலைக்கு தள்ளப்பட்டுள்ளனர்.

கடந்த இரண்டு மாதத்தில் மட்டும் ஐந்து நபர்கள் இறந்தனர். ஒவ்வொரு முறையும் இறந்துபோனவரின் உடலை மயானத்திற்கு கொண்டு செல்ல முறையான பாதை வசதி இல்லை என்பதால் கண்மாயில் இறங்கி கொண்டு செல்வதால் கடும் சிரமத்திற்குள்ளாகியுள்ளனர். எனவே நல்லூரில் உள்ளவர்களுக்கு சுடுகாட்டிற்கு முறையாக பாதை வசதி செய்துகொடுக்கவேண்டும் என இப்பகுதி பொதுமக்கள் கோரிக்கை விடுத்துள்ளனர்.