நாமக்கல்: நாமக்கல் மாவட்டம் குமரபாளையத்தில் ஜல்லிக்கட்டு போட்டி தொடங்கியுள்ளது. பொங்கல் பண்டிகையை தொடர்ந்து ஒவ்வொரு ஆண்டும் நாமக்கல் மாவட்டம் குமாரபாளையத்தில் ஜல்லிக்கட்டு விழா கோலாகலமாக நடைபெறுவது வழக்கம். தற்போது நடப்பாண்டுக்கான ஜல்லிக்கட்டு போட்டி நடைபெற்று வருகிறது. இப்போட்டியை தமிழக சுற்றுலாத்துறை அமைச்சர் மதிவேந்தன், ராஜ்யசபா உறுப்பினர் ராஜேஷ்குமார் ஆகியோர் கொடியசைத்து துவக்கி வைத்தனர். இப்போட்டியில் 600 காளைகளும், 350 மாடுபிடி வீரர்களும் பங்கேற்றுள்ளனர்.

6 சுற்றுகளாக நடைபெறும் ஜல்லிக்கட்டில், மாடுகளை பிடிக்கும் வீரர்களுக்கும், பிடிபடாத காளைகளுக்கும் இருசக்கர வாகனங்கள், பீரோ, கட்டில், சைக்கிள், தங்கம், வெள்ளி காசு உள்ளிட்ட பரிசு பொருட்கள் வழங்கப்பட உள்ளது. அசம்பாவிதங்களை தவிர்க்க 6 மருத்துவக் குழுவினர், 500க்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர். கொரோனா தொற்று தடுப்பு நடவடிக்கையாக குறைந்த அளவு பார்வையாளர்களே அனுமதிக்கப்பட்டுள்ளனர். சீறிப்பாய்ந்து வந்த காளைகளை வீரர்கள் ஆர்வமுடன் அடக்க முயற்சித்தனர். குமாரபாளையம் சுற்று வட்டார பகுதியைச் சேர்ந்த மக்கள் போட்டியை கண்டு ரசித்தனர்.