திருமலை: ஆந்திர மாநிலம் கடப்பா மாவட்டம், சிந்தகொம்மாதிண்ணே மண்டலம் புக்க அக்ரஹாரத்தில் புக்க மல்லேஸ்வர சுவாமி கோயில் உள்ளது. இதனருகே சுரங்கப்பாதை சிறைச்சாலை இருப்பது தெரியவந்துள்ளது. தரையில் ஒரு சிறிய ஓட்டை இருப்பதை கண்டு அங்கிருந்தவர்கள் அதற்குள் கீழே இறங்கி சென்று பார்த்தனர். அப்போது சுரங்க பாதை போன்று பிரமாண்டமான அமைப்பு தென்பட்டது. இதுகுறித்து சித்தூர் கடப்பா தொல்லியல் துறை அதிகாரிகளுக்கு தெரிவிக்கப்பட்டது. அதன்பேரில் அதிகாரிகள் சென்று ஆய்வு செய்தனர்.

இதுதொடர்பாக தொல்லியல் அதிகாரிகள் கூறுகையில், ‘இந்த சுரங்கப்பாதை சிறைச்சாலை ஆங்கிலேயர் காலத்தைச் சேர்ந்தது. இது ஒரு பதுங்கு குழி மற்றும் கிடங்காகவும் பயன்படுத்தப்பட்டிருக்கலாம். இத்தகைய கட்டமைப்புகள் ரயில் பாதைக்கு அருகில் ஆங்கிலேயர்களால் கட்டப்பட்டது’ என தெரிவித்தனர். இதுகுறித்து தகவலறிந்த அக்கம் பக்கத்தைச் சேர்ந்த பொதுமக்கள் சுரங்க சிறைச்சாலையை பார்வையிட்டு செல்கின்றனர்.