திருவனந்தபுரம்: கேரள மாநிலம் திருவனந்தபுரம் அருகே 6 வயது முதல் 12 வயது வரை சிறுமியை பலாத்காரம் செய்த உறவினருக்கு 27 வருடம் கடுங்காவல் சிறையும், ₹ 65 ஆயிரம் அபராதமும் விதிக்கப்பட்டது. கேரள மாநிலம் திருவனந்தபுரம் அருகே விதுரா ஆனப்பாறை பகுதியை சேர்ந்தவர் பிரபாகரன் காணி (55). பக்கத்து வீட்டில் வசிக்கும் உறவினர் ஒருவரின் மகளை வீட்டில் யாரும் இல்லாத நேரத்தில் தனது வீட்டுக்கு வரவழைத்து பலாத்காரம் செய்து வந்து உள்ளார். 6 வயது முதல் சிறுமியை கொடுமைப்படுத்த தொடங்கிய பிரபாகரன், கடந்த 2019ம் ஆண்டு வரை 7 வருடங்கள் பலாத்காரம் செய்து வந்துள்ளார். இந்த நிலையில் கடந்த 3 வருடங்களுக்கு முன்பு பள்ளியில் வைத்து தன்னுடைய  ஆசிரியையிடம் சிறுமி பிரபாகரன் தன்னை பலாத்காரம் செய்து வருவது குறித்து கூறினாள்.

இதைக்கேட்டு அதிர்ச்சியடைந்த ஆசிரியை, விதுரா போலீசுக்கு தகவல் கொடுத்தார். போலீசாரின் விசாரணையில், சிறுமி பலாத்காரம் செய்யப்பட்டது உண்மை என்பது தெரிய வந்தது. இதையடுத்து பிரபாகரனை கைது செய்து சிறையில் அடைத்தனர்.இந்த வழக்கு நெடுமங்காடு விரைவு நீதிமன்றத்தில் நடந்து வந்தது. வழக்கை விசாரித்த நீதிபதி பில்குல், பிரபாகரன் காணிக்கு 27 வருடம் கடுங்காவல் சிறையும், ₹ 65 ஆயிரம் அபராதமும் விதித்து உத்தரவிட்டார். அபராதத் தொகையை பாதிக்கப்பட்ட சிறுமியின் குடும்பத்தினருக்கு வழங்க வேண்டும் என்றும், அபராதம் கட்ட தவறினால் மேலும் 6 மாதம் சிறைத் தண்டனை அனுபவிக்க வேண்டும் என்றும் நீதிபதி தனது உத்தரவில் குறிப்பிட்டுள்ளார்.