டெல்லி: ஐஏஎஸ் அதிகாரிகளை ஒன்றிய அரசுப்பணிக்கு பணி நிரவல் செய்வது தொடர்பாக புதிய சட்டதிருத்தத்தைக் கொண்டுவருவதற்கான முன்மொழிவை ஒன்றிய அரசு வெளியிட்டுள்ளது. சிவில் சர்வீஸ் தேர்வு மூலமாக தேர்வு செய்யப்படும் ஐஏஎஸ், ஐபிஎஸ், ஐஎப்எஸ் அதிகாரிகள் மதிப்பெண் அடிப்படையில் சொந்த மாநிலத்திலோ, பிற மாநிலங்களிலோ பணியமர்த்தப்படுவார்கள். ஒன்றிய அரசின் மூலமாக அதிகாரிகள் நியமிக்கப்பட்டாலும் அவர்கள் நியமிக்கப்படும் மாநில அரசின் முடிவின் படியே பணியிடங்கள் இறுதி செய்யப்படுகின்றன. அதே நேரம் மத்திய அரசு துறைகளில் பணியாற்ற குறிப்பிட்ட எண்ணிக்கையிலான அதிகாரிகளை ஒவ்வொரு மாநிலமும் அனுப்ப வேண்டும் என்ற விதி உள்ளது. இந்நிலையில் அது சார்ந்த விதி எண் 6-ன் கீழ் சில திருத்தங்களை ஒன்றிய அரசு முன்மொழிந்துள்ளது.அதன்படி,

*குறிப்பிட்ட நேரத்திற்குள் ஒன்றிய அரசு கோரும் அதிகாரியை மாநில அரசு விடுவிக்காவிட்டால் மாநில அரசின் ஒப்புதல் இன்றியே பணியிலிருந்து அதிகாரிகள் விடுபடலாம். தற்போதைய விதிப்படி குறிப்பிட்ட அதிகாரியை விடுவிக்க மாநில அரசின் ஒப்புதல் அவசியம்; அவர்கள் ஒப்புதல் அளிக்க எந்த கால அளவும் இல்லை.

* எவ்வளவு அதிகாரிகளை ஒன்றிய அரசு பணிக்கு அனுப்ப வேண்டும் என்பதை ஒன்றிய அரசே முடிவு செய்யும் என்று திருத்தப்பட்டுள்ளது. தற்போதுள்ள விதிமுறைகளின் படி மாநிலத்தின் மொத்த அதிகாரிகளின் எண்ணிக்கையில் 40% பேரை ஒன்றிய அரசு பணிக்கு அனுப்பவேண்டும்.

* ஒன்றிய, மாநில அரசுகளுக்கு இடையே குறிப்பிட்ட அதிகாரியை ஒன்றிய அரசு பணிக்கு அனுப்புவதில் முரண்பாடு ஏற்பட்டால் ஒன்றிய அரசே இறுதி முடிவை எடுக்கும் என்று திருத்தும் செய்யப்பட்டுள்ளது.

* ஒன்றிய அரசு துறைகளில் நேரடியாக பணியாற்ற ஒன்றிய அரசு அழைத்தால் சம்மந்தப்பட்ட அதிகாரியின் சுயவிருப்பம் கூட அவசியமில்லை என்றும், சர்வதேச அமைப்புகளில் பணியாற்றவே அவரது விருப்பம் அவசியம் என்றும் விதிகள் உள்ளன.

இந்த முன் மொழிவுகள் குறித்த கருத்துக்களை ஜனவரி 25ம் தேதிக்குள் மாநில அரசுகள்   தெரிவிக்கவேண்டுமென்றும், இதற்கு மேற்குவங்கம், கேரளா உள்ளிட்ட 6 மாநிலங்கள் எதிர்ப்பு தெரிவித்துள்ளன. விதிகளின்படி, மாநில அரசுகள் அதிகாரிகளை அனுப்ப மறுப்பதால் ஒன்றிய அரசு துறைகளில் போதிய அதிகாரிகள் இல்லை என்பதாலேயே இந்த நடவடிக்கை எடுத்திருப்பதாக ஒன்றிய அரசு தரப்பில் கூறப்படுகிறது. இந்த புதிய விதிகளை மாநில அரசுகள் ஏற்குமா? ஏற்காதா? என்பது குறித்து விரைவில் தெரியவரும் என்று தெரிவித்துள்ளது.