மீனம்பாக்கம்: சென்னை விமான நிலையத்தில் விமானங்கள் பாதுகாப்பாக இயக்க வசதியாக அதிநவீன பாதுகாப்பு சாதனம் அமைக்கப்பட்டுள்ளதாக இந்திய விமான நிலைய ஆணையம் அறிவித்துள்ளது. சென்னை விமான நிலையத்தில் விமான போக்குவரத்து சேவை பிரிவில் காலநிலைகளில் ஏற்படும் மாற்றங்களை கண்டறிய நவீன சாதனம் அமைக்கப்பட்டுள்ளது. “ஐ.பி. என்ற இன்டர்நெட் புரோட்டக்கால்” என்ற தானியங்கி தகவல் பரிமாற்ற சாதனம் இந்தியாவில் முதன்முதலில் அமைக்கப்பட்டுள்ளது. குறிப்பாக பருவ நிலையில் மாற்றங்கள் ஏற்படும்போது, இந்த தானியங்கி கருவி தானாகவே செயல்பட்டு, மேகமூட்டம், பனிப்பொழிவு, ஓடுபாதையில் போதிய வெளிச்சம் இல்லாமை, தெளிவான நிலை இல்லாமை போன்றவைகளை சென்னை விமான நிலைய கட்டுப்பாட்டு அறைக்கு தெரியப்படுத்தும்.

அதற்கு தகுந்தாற்போல் கட்டுப்பாட்டு அறை அதிகாரிகள், விமானங்கள், ஹெலிகாப்டர்கள் போன்றவைகள் சென்னை விமான நிலையத்தில் இருந்து புறப்படுவது, தரையிறங்குவது போன்றவைகளை பாதுகாப்பாக மாற்றியமைப்பார்கள். அதோடு இந்த நவீன தானியங்கி ஐ.பி கருவி செயல்பாட்டில் இருப்பதால், மோசமான வானிலை நிலவும் போது சென்னை விமான நிலையத்தில் விமானங்கள், ஹெலிகாப்டர்கள் வந்து தரையிறங்க, புறப்பட சிக்னல்களும் கிடைக்காமல் தடை செய்யும். இதனால் விமானங்கள், ஹெலிகாப்டர்களை பாதுகாப்பான முறைகளில் இயக்க முடியும். விபத்துகளை தவிர்க்க முடியும் என்று இந்திய விமான நிலைய ஆணையம் தெரிவித்துள்ளது.
இதுபோன்ற நவீன கருவி மும்பை, கொல்கத்தா விமான நிலையங்களிலும் அமைக்கப்பட்டுள்ளதாகவும், இந்த நவீன பாதுகாப்பான புதிய முறை படிப்படியாக இந்தியாவில் உள்ள அனைத்து விமான நிலையங்களுக்கும் விரிவுபடுத்தப்பட இருப்பதாகவும் இந்திய விமான நிலைய ஆணையம் தெரிவிக்கிறது.

தமிழகத்தில் கோவை மாவட்டம் சூலூர் விமானப்படை தளத்தில் இருந்து நீலகிரி மாவட்டத்திற்கு புறப்பட்டு சென்ற ராணுவ ஹெலிகாப்டர் சமீபத்தில் விபத்திற்குள்ளாகி, இந்திய ராணுவ தலைமை தளபதி உட்பட 14 பேர் உயிரிழந்த சோக சம்பவம் நடந்தது. அதுபற்றி ஆய்வு நடத்திய குழுவினர், திடீரென ஏற்பட்ட மேகக்கூட்டம் தான் ராணுவ ஹெலிகாப்டர் விபத்துக்கு காரணம் என்று அறிவித்துள்ளது குறிப்பிடத்தக்கது.