சேலம்: கைதிக்கு ரூ.20 ஆயிரம் வாங்கி செல்போன் கொடுத்த புகாரில் உதவி சிறை அதிகாரி சஸ்பெண்ட் செய்யப்பட்டார். சேலம் மத்திய சிறையில் செல்போன் புழக்கம் அதிகரித்துள்ள நிலையில் நேற்று முன்தினம் சோதனை குழுவினர் திடீர் சோதனை நடத்தினர். இதில் செல்ேபான், சார்ஜர், ஒயர், சிம் கார்டு என அனைத்தும் தனித்தனியாக பிரித்து மறைத்து வைக்கப்பட்டிருந்தது. இந்த செல்போனை சிறைக்குள் கொண்டு வந்தது எப்படி? என்பது குறித்து நடத்திய விசாரணையில் குண்டர் தடுப்பு சட்ட கைதிகள் சண்முகம் (எ)விக்கு, கார்த்தி (29), விசாரணை கைதி ரவி(எ) ரவிக்குமார் ஆகியோர் சிக்கினர். இவர்களிடம் நடத்திய விசாரணையில், ‘கோபி என்ற கைதிக்காக உதவி சிறை அதிகாரி ராகவனுக்கு ரூ.20ஆயிரம் கொடுத்து, அவர் தான் கோபியின் தம்பியிடம் இருந்து செல்போனை வாங்கி சிறைக்குள் கொண்டு வந்து கொடுத்தார்’ என்றனர்.

இதையடுத்து உதவி சிறை அதிகாரி ராகவன், மற்றும் 3 கைதிகள் மீது அஸ்தம்பட்டி போலீசில் ஜெயிலர் ராஜமோகன் புகார் செய்தார். இது தொடர்பாக சிறை கண்காணிப்பாளர் கிருஷ்ணகுமார் விசாரணை நடத்தினார். இதில் உதவி சிறை அதிகாரி ராகவனுக்கு தொடர்பு இருப்பது தெரியவந்தது. இதையடுத்து அவரை அதிரடியாக சஸ்பெண்ட் செய்து உத்தரவிட்டார். மேலும் விசாரணை முடியும் வரை சேலத்தை விட்டு வெளியே செல்லக்கூடாது எனவும் உத்தரவிடப்பட்டுள்ளது. 3 மாதங்களுக்கு முன்புதான் ராகவன், பாளை சிறையில் இருந்து பல்வேறு புகார்கள் எழுந்த காரணத்தினால் சேலத்துக்கு மாற்றப்பட்டதாக கூறப்படுகிறது. தற்போது கைதிக்கு செல்போன் கொடுத்த வழக்கில் சஸ்பெண்ட் செய்யப்பட்டுள்ளார். இதனால் சிறை வார்டன்களிடையே பரபரப்பு ஏற்பட்டுள்ளது.