புதுடெல்லி: ‘ஸ்டெர்லைட் ஆலை தொடர்பான பிரதான வழக்கை நீதிபதிகளின் விசாரணை அமர்வு சூழலை பொருத்தே பட்டியலிட்டு விசாரிக்கப்படும்,’ என உச்ச நீதிமன்றம் தெரிவித்துள்ளது. தூத்துக்குடி மாவட்டத்தில் அமைந்துள்ள வேதாந்தா நிறுவனத்திற்கு சொந்தமான ஸ்டெர்லைட் ஆலையை மீண்டும் திறக்க உத்தரவிட கோரிய மேல்முறையீடு மனு மற்றும் ஆலையில் பராமரிப்பு பணிகளை மேற்கொள்ள அனுமதி கோரி தாக்கல் செய்யப்பட்ட இடைக்கால மனுக்கள் ஆகியவை உச்ச நீதிமன்றத்தில் நிலுவையில் உள்ளது.

இந்நிலையில், வேதாந்தா நிறுவனம் தரப்பில் கடந்த நவம்பரில் தாக்கல் செய்யப்பட்ட இடைக்கால மனுவில், ‘ஆலையில் உள்ள உயர்ரக இயந்திர உபகரணங்கள் துருப்பிடித்து சேதமாகும் நிலை உருவாகியுள்ளது. ஆகவே, ஸ்டெர்லைட் ஆலையை மூடிய உத்தரவை எதிர்த்த மனுவை ரத்து செய்து, ஆலை பராமரிப்பு பணி மேற்கொள்ள அனுமதிக்க வேண்டும்,’ என கோரப்பட்டது. இதற்கு தமிழக அரசு தரப்பில் நேற்று முன்தினம் பதில் மனு தாக்கல் செய்யப்பட்டது. அதில், ஸ்டெர்லைட் மனுவை அபராதத்துடன் தள்ளுபடி செய்யும்படி கோரப்பட்டுள்ளது.

இந்நிலையில், வேதாந்தா நிறுவனத்தின் தரப்பில் ஆஜரான மூத்த வழக்கறிஞர் அரிமா சுந்தரம் நேற்று உச்ச நீதிமன்ற நீதிபதி டி.ஒய். சந்திரசூட் முன்னிலையில், ‘ஸ்டெர்லைட் பராமரிப்பு தொடர்பான பிரதான வழக்கு இன்று (நேற்று) விசாரணைக்காக பட்டியலிடப்பட்டு இருந்த நிலையில் அது திடீரென நீக்கப்பட்டுள்ளது. அதனால், அந்த மனுவை அவசர வழக்காக பட்டியலிட்டு உடனடியாக விசாரிக்க வேண்டும். ஏனெனில், ஆலையில் பராமரிப்பு பணிகள் மேற்கொள்ள வேண்டியுள்ளது,’ என கோரினார். இதை ஏற்பதாக தெரிவித்த நீதிபதி சந்திரசூட், ‘கொரோனா பிரச்னையின் காரணத்தினால் சில அமர்வுகள் இல்லாத நிலை உள்ளது. அதனால், நீதிபதிகளின் விசாரணை அமர்வின் சூழலை பொருத்துதான் ஸ்டெர்லைட் ஆலை தொடர்பான வழக்கை பட்டியலிட்டு விசாரிக்க முடியும்,’ என தெரிவித்தார்.