சென்னை: முதல்வர் ஜெயலலிதா பங்கேற்கும் பொதுக்கூட்டத்திற்காக சென்னை தீவுத்திடலில் சுற்றலாப் பொருட்காட்சி அரங்குகள் அகற்றப்பட்டு வருகின்றன. முதலமைச்சர் ஜெயலலிதா சென்னை தீவுத்திடலில் நாளை தேர்தல் பிரச்சாரத்தை துவக்குகிறார். இதற்காக தீவுத்திடலில் அமைக்கப்பட்டிருந்த சுற்றுலா பொருட்காட்சி அரங்குகளை பொக்லைன் எந்திரங்களை கொண்டு அதிகாரிகள் வலுக்கட்டாயமாக அப்புறப்படுத்தி வருகின்றனர். ஒப்பந்த விதியின் படி 40 நாட்கள் அவகாசம் அளிக்க வேண்டும் என்ற விதியை பின்பற்றாமலே முன்னறிவிப்பின்றி நடவடிக்கை மேற்கொள்ளப்பட்டிருப்பதாக புகார் எழுந்துள்ளது.

அரங்குகள் திடீரென அகற்றப்பட்டதால் அவற்றை அமைத்தவர்களுக்கும், பொருட்காட்சிக்கு ஏற்பாடுகள் செய்த தனியார் நிறுவனத்திற்கும் கோடிக் கணக்கில் இழப்பு ஏற்பட்டுள்ளது. அரசு அதிகாரிகளின் துணையோடு நடைபெற்ற இந்த அகற்றத்திற்கு எதிராக தேர்தல் ஆணையம் உரிய நடவடிக்கை எடுக்க  வேண்டும் என அரங்க அமைப்பாளர்கள் கோரிக்கை விடுத்துள்ளனர்.