புதுடெல்லி: ஆம் ஆத்மி கட்சி போலியான நிறுவனங்களின் பெயரில் நன்கொடை பெற்றுள்ளதாக வெளியான தகவலால் டெல்லி அரசியல் வட்டாரத்தில் பரபரப்பை ஏற்படுத்தியுள்ளது. எந்தவிதமான வியாபாரத்திலும் ஈடுபடாமல்  3 நிறுவனங்கள் ஆம் ஆத்மி கட்சிக்கு தலா ரூ.50 லட்சம் நன்கொடை வழங்கியுள்ளதை கண்டுபிடித்துள்ளதாக ஆங்கில செய்தி தொ¬க்காட்சி நிறுவனம் ஒன்று தெரிவித்துள்ளது. இது ஹவாலா பணம் என்றும், இது குறித்து கம்பெனிகள் பதிவாளர் அலுவகத்தில் புகார் தெரிவிக்க போவதாகவும் அந்த தொலைக்காட்சி அறிவித்துள்ளது.

பாஜக உள்ளிட்ட கட்சிகள் இந்த விவகாரத்தை கையில் எடுத்துள்ள நிலையில் குற்றச்சாட்டை ஆம் ஆத்மி கட்சி மறுத்துள்ளது. நன்கொடை பெற்றதில் தவறில்லை என்றும், குறிப்பிட்ட நிறுவனங்களின் செயல்பாடுகளுக்கு கட்சி பொறுப்பாகாது என்றும் தெரிவித்துள்ளது.

இதனிடையே டெல்லி தேர்தலில் ஆம் ஆத்மி 35 இடங்களில் வெற்றி பெறும் என்று வெளியான கருத்து கணிப்பை தொடர்ந்து பாஜக தனது தேர்தல் பிரச்சாரத்தை தீவிரபடுத்தியுள்ளது. இதன் ஒரு கட்டமாக டெல்லியில் உள்ள 1 கோடியே 20 லட்சம் வாக்களர்களுக்கும் ஆதரவு கோரி தனித்தனியாக கடிதம் அனுப்ப முடிவு செய்துள்ளதாக கட்சி தலைமை தெரிவித்துள்ளது.