திருப்பூரில் பரபரப்பு: போலீஸ் நிலையம் மீது ஏறி போதை வாலிபர் த*கொலை மிரட்டல்

திருப்பூர்: திருப்பூர் மத்திய பேருந்து நிலையத்தில் உள்ள புறக்காவல் நிலையக் கட்டிடத்தின் மேல்பகுதியில் நேற்று வாலிபர் ஒருவர் குடிபோதையில் ஏறி நின்று கீழே குதித்து தற்கொலை செய்து கொள்வதாக மிரட்டல் விடுத்தார். நீண்ட நேரமாக அங்கிருந்தபடியே கூச்சலிட்டு அட்டகாசம் செய்த அந்த வாலிபரை கீழே இறங்கச் செய்ய போலீசார் மற்றும் பொதுமக்கள் பேச்சுவார்த்தை நடத்தினர். இருப்பினும், அவர் கீழே இறங்க மறுத்தார். இதையடுத்து பேருந்து நிலையத்தில் இருந்த சில ஓட்டுநர்கள் சாதுர்யமாக கட்டிடத்தின் மேல்பகுதிக்கு ஏறிச்சென்று, அந்த வாலிபரை மடக்கிப் பிடித்து பாதுகாப்பாக கீழே இறக்கினர்.

அப்போது அவர் மது போதையில் இருந்தது தெரியவந்தது. பின்னர், சம்பவ இடத்திற்கு வரவழைக்கப்பட்ட ஆம்புலன்ஸ் மூலம் அவருக்கு முதலுதவி சிகிச்சை அளிக்கப்பட்டு, மேல் சிகிச்சைக்காக திருப்பூர் அரசு மருத்துவக்கல்லூரி மருத்துவமனைக்கு அனுப்பி வைக்கப்பட்டார். தற்கொலை மிரட்டல் விடுத்த வாலிபர், உடல் நிலை பாதிக்கப்பட்டவர் என்பது தெரிய வந்தது. தொடர்ந்து அவருக்கு மருத்துவ சிகிச்சை அளிக்கப்பட்டு வருகிறது. இது குறித்து தெற்கு போலீசார் வழக்குப்பதிவு செய்து விசாரித்து வருகின்றனர். இந்த சம்பவம் காரணமாக மத்திய பேருந்து நிலையத்தில் பரபரப்பு நிலவியது.