உலக சாம்பியன் இந்தியாவை வீழ்த்தி அயர்லாந்து அபார சாதனை: 1 ரன்னில் த்ரில் வெற்றி
பெல்பாஸ்ட்: இந்தியஅணியுடனான 2வது டி20 போட்டியில், 1 ரன் வித்தியாசத்தில் த்ரில் வெற்றி பெற்ற அயர்லாந்து 2-0 என்ற கணக்கில் தொடரை கைப்பற்றி வரலாற்று சாதனை படைத்தது. ஸ்டோர்மான்ட், சிவில் சர்வீஸ் கிரிக்கெட் கிளப் மைதானத்தில் நேற்று நடந்த இப்போட்டியில், டாஸ் வென்ற இந்தியா முதலில் பந்துவீசியது.இந்திய அணியில் பிரின்ஸ் யாதவ், சூர்யன்ஷ் ஷெக்டே அறிமுகமாகினர். சூரியவன்ஷிக்கு வாய்ப்பு வழங்கப்படவில்லை.
அயர்லாந்து 7.3 ஓவரில் 48 ரன்னுக்கு 3 விக்கெட் இழந்து தடுமாறிய நிலையில், ஹாரி டெக்டர் பென் காலிட்ஸ் ஜோடி 4வது விக்கெட்டுக்கு 65 ரன் சேர்த்தது. பென் 37 ரன் (23 பந்து, 3 பவுண்டரி, 2 சிக்சர்), டெலனி (0) இருவரும் துபே பந்துவீச்சில் அடுத்தடுத்து வெளியேற, அயர்லாந்து பின்னடைவை சந்தித்தது. டாக்ரெல் 19, ஹாரி டெக்டர் 53 ரன் (47 பந்து, 5 பவுண்டரி, 1 சிக்சர்) விளாசி பெவிலியன் திரும்ப, அயர்லாந்து 20 ஓவரில் 8 விக்கெட் இழப்புக்கு 154 ரன் எடுத்தது. இந்திய பந்துவீச்சில் பிரின்ஸ் 3, அர்ஷ்தீப், துபே தலா 2,ஹர்ஷித் 1 விக்கெட் கைப்பற்றினர்.
இதைத் தொடர்ந்து, 20 ஓவரில் 155 ரன் எடுத்தால் வெற்றி என்ற இலக்குடன் களமிறங்கியது இந்தியா. மூண்ட்ரா வீசிய முதல் ஓவரில், சஞ்சு சாம்சன், அபிஷேக் இருவரும் சந்தித்த முதல் பந்திலேயே டக் அவுட்டாகி ஏமாற்றமளித்தனர். ஷ்ரேயாஸ் 10 ரன் எடுத்து மூண்ட்ரா பந்துவீச்சில் கிளீன் போல்டாக, இஷான் 12 ரன்னில் ரன் அவுட்டானார். இந்தியா 4.5 ஓவரில் 35 ரன்னுக்கு 4 விக்கெட் இழந்து திணறிய நிலையில், திலக் அக்சர் இணைந்து போராடினர்.
இந்தியா 8 ஓவரில் 54 ரன் எடுத்திருந்தபோது மழை காரணமாக ஆட்டம் தடைப்பட்டது. சிறிது நேர தாமதத்துக்குப் பின்னர் தொடர்ந்த ஆட்டத்தில் அக்சர் 14, துபே 20, திலக் 55 ரன், ஷெட்கே 1 ரன் எடுத்து அவுட்டாக இந்தியா நம்பிக்கை இழந்தது. கடைசி கட்டத்தில் ஹர்ஷித் ராணா அதிரடி காட்ட, கடைசி ஓவரில் இந்தியாவுக்கு 19 ரன் தேவைப்பட்டது. ராணா 21 ரன் (10 பந்து, 2 பவுண்டரி, 1 சிக்சர்) விளாசி 5வது பந்தில் அவுட்டானார்.
கடைசி பந்தில் 8 ரன் தேவைப்பட, பிரின்ஸ் சிக்சர் விளாசியும் பயனின்றி போனது.1 ரன்னில் உலக சாம்பியனை வீழ்த்திய அயர்லாந்து 2-0 என்ற கணக்கில் தொடரை கைப்பற்றி சாதனை படைத்தது. அயர்லாந்து பந்துவீச்சில் மூண்ட்ரா, ஹாலர்ட் தலா 3 விக்கெட் எடுத்து வெற்றிக்கு உதவினர்.