பீகாரை தொடர்ந்து மேற்கு வங்கத்திலும் காட்டு ராஜ்ஜியத்தை தூக்கி எறிவோம்: வெற்றி விழாவில் பிரதமர் மோடி உறுதி

புதுடெல்லி: பீகார் சட்டப்பேரவை தேர்தலில் தேசிய ஜனநாயக கூட்டணி வரலாறு காணாத வெற்றி பெற்றதை தொடர்ந்து நேற்று டெல்லியில் உள்ள பா.ஜ தலைமை அலுவலகத்திற்கு வந்த பிரதமர் மோடிக்கு உற்சாக வரவேற்பு அளிக்கப்பட்டது.

அங்கு கட்சி தொண்டர்கள் மத்தியில் அவர் ஆற்றிய உரை:

பீகார் இந்திய ஜனநாயகத்தின் தாய் என்ற பெருமையை அளித்த பூமி. அங்கு பொய்கள் தோற்கடிக்கப்படுகின்றன, மக்களின் நம்பிக்கை வெல்லும் என்பதை பீகார் மீண்டும் காட்டியுள்ளது. நாட்டிற்கு தேவையான நேர்மறையான பார்வை காங்கிரஸ் கட்சியிடம் இல்லை. காங்கிரஸ் ஒரு ஒட்டுண்ணி. பீகார் வெற்றி ஒரு புதிய சகாப்தத்தின் தொடக்கமாகும். அடுத்த ஐந்து ஆண்டுகளில் பீகார் வேகமாக முன்னேறும். பீகார் புதிய தொழில்கள், முதலீடுகள் மற்றும் இளைஞர்களுக்கான வேலைவாய்ப்புகளைக் காணும். மேலும் உலகிற்கு அதன் வலிமையை நிரூபிக்கும். இந்த வெற்றி தேர்தல் ஆணையத்தின் மீது மக்களுக்கு நம்பிக்கையை வலுப்படுத்தியுள்ளது. பீகார் முதல்வர் நிதிஷ் குமாரின் தலைமையால் இந்த வெற்றி கிடைத்துள்ளது.

இந்த மகத்தான வெற்றியாலும், அவர்களின் அசைக்க முடியாத நம்பிக்கையாலும், பீகார் மக்கள் மாநிலத்தையே தங்கள் புயலால் தாக்கியுள்ளனர். ராஷ்ட்ரீய ஜனதாதளம் கட்சி முஸ்லிம்-யாதவ் சூத்திரத்தை வகுத்துள்ளனர். ஆனால் இன்றைய வெற்றி ஒரு புதிய நேர்மறையான பெண்கள் மற்றும் இளைஞர் சூத்திரத்தை வழங்கியுள்ளது. இன்று, பீகார் அதிக இளைஞர் மக்கள்தொகை கொண்ட மாநிலங்களில் ஒன்றாகும், மேலும் இந்த இளைஞர்கள் அனைத்து மதங்கள் மற்றும் சாதிகளைச் சேர்ந்தவர்கள். அவர்களின் விருப்பங்கள், அபிலாஷைகள் மற்றும் அவர்களின் கனவுகள் காட்டு ராஜ்ஜிய மக்களின் வகுப்புவாத எம்-ஒய்(முஸ்லிம்-யாதவ்) சூத்திரத்தை அழித்துவிட்டன.

குறிப்பாக இளைஞர்கள், வாக்காளர் பட்டியலை சுத்திகரிப்பதை தீவிரமாக எடுத்துக்கொள்கிறார்கள் என்பதையும் காட்டியுள்ளன. பீகாரில் பெற்ற வெற்றி கேரளா, தமிழ்நாடு, புதுச்சேரி, அசாம், மேற்கு வங்கத்தைச் சேர்ந்த பாஜ தொண்டர்களுக்கு புதிய உற்சாகத்தை அளித்துள்ளது. பீகார் வெற்றியை தொடர்ந்து மேற்குவங்கத்திலும் காட்டு ராஜ்ஜியத்தை தூக்கி எறிவோம் என்று அங்குள்ள மக்களுக்கு உறுதி அளிக்கிறேன். இவ்வாறு பேசினார்.

மாபெரும் வெற்றி அளித்த மக்களுக்கு நன்றி: முதல்வர் நிதிஷ்குமார் உருக்கம்

பீகார் தேர்தல் வெற்றி குறித்து முதல்வர் நிதிஷ்குமார் வெளியிட்ட பதிவில்,’ வாக்கெடுப்பில் எங்களுக்கு மகத்தான தீர்ப்பை வழங்கியதன் மூலம் மாநில மக்கள் எங்கள் அரசாங்கத்தின் மீது தங்கள் நம்பிக்கையை வெளிப்படுத்தியுள்ளனர். இதற்காக, மாநிலத்தின் அனைத்து மதிப்புமிக்க வாக்காளர்களுக்கும் நான் தலைவணங்குகிறேன், மேலும் எனது மனமார்ந்த நன்றியையும் தெரிவித்துக் கொள்கிறேன்.

இந்தத் தேர்தலில் முழுமையான ஒற்றுமையை வெளிப்படுத்துவதன் மூலம் தேசிய ஜனநாயகக் கூட்டணி மிகப்பெரிய பெரும்பான்மையை அடைந்து உள்ளது. இதற்காக, பிரதமர் மோடி மற்றும் தேசிய ஜனநாயகக் கூட்டணியின் அனைத்து கூட்டாளிகளான சிராக் பாஸ்வான், ஜிதன் ராம் மஞ்சி, உபேந்திர குஷ்வாஹா ஆகியோருக்கும் வாழ்த்து மற்றும் நன்றி தெரிவிக்கிறேன். உங்கள் அனைவரின் ஆதரவுடன், பீகார் மேலும் முன்னேறும், மேலும் நாட்டின் மிகவும் வளர்ந்த மாநிலங்களின் பிரிவில் சேர்க்கப்படும்’என்றார்.

பீகார் முதல்வராக நிதிஷ்குமார் நீடிப்பார்: சிராக் பாஸ்வான் நம்பிக்கை

லோக் ஜனசக்தி கட்சி (ராம் விலாஸ்) தலைவர் சிராக் பாஸ்வான் கூறுகையில்,’பீகார் முதல்வராக நிதிஷ் குமார் நீடிப்பார் என்று நான் உறுதியாக நம்புகிறேன். எதிர்க்கட்சிகளின் அவமானகரமான இழப்புக்கு ஆணவம்தான் காரணம், அதுதான் அதன் வீழ்ச்சிக்கு வழிவகுத்த ஒரே காரணி. பிரதமர் மோடி தலைமையிலான ஒன்றிய அரசும், முதல்வர் நிதிஷ் குமார் தலைமையிலான மாநில அரசின் இரட்டை எஞ்சின் ஆட்சியும்தான் எங்கள் மகத்தான வெற்றிக்குக் காரணம். பீகார் மக்கள் தேசிய ஜனநாயகக் கூட்டணியின் ஒற்றுமையில் முழு நம்பிக்கை வைத்துள்ளனர், இதுவே இந்த வெற்றிக்குக் காரணம்’ என்றார்.

மோடி, அமித்ஷா விமர்சனம் செய்த ஒசாமா ஷஹாப் வெற்றி

சிவான் தொகுதியில் இருந்து பல முறை எம்.பி.யாக தேர்வு செய்யப்பட்ட பிரபல தாதா கும்பல் தலைவரான மறைந்த முகமது ஷஹாபுதீனின் மகன் ஒசாமா ஷஹாப், பீகார் சட்டப்பேரவை தேர்தலில் ரகுநாத்பூர் தொகுதியில் ராஷ்ட்ரீய ஜனதாதளம் வேட்பாளராக நிறுத்தப்பட்டார். தேர்தல் பிரசாரத்திற்கு வந்த பிரதமர் மோடி, உள்துறை அமைச்சர் அமித்ஷா ஒசாமாவை கடுமையாக விமர்சனம் செய்தனர். ஆனாலும் இந்த தேர்தலில் ரகுநாத்பூர் தொகுதியில் ஒசாமா ஷஹாப் 9,248 வாக்குகள் வித்தியாசத்தில் வெற்றி பெற்றார்.