Dinakaran Cinema Button CINEMA Astrology Button ASTROLOGY  Magazines Logo VIDEOS Sun network Logo Epaper LogoEpaper Facebook
Catterpillar
search-icon-img
Advertisement

யுஎஸ் ஓபன் டென்னிஸ் புதிய நம்பர் 1 ரைபாகினா சாம்பியன்: பைனலில் சபலெங்காவை வீழ்த்தினார்

நியூயார்க்: யுஎஸ் ஓபன் கிராண்ட் ஸ்லாம் டென்னிஸ் தொடரின் மகளிர் ஒற்றையர் பிரிவில் கஜகஸ்தான் நட்சத்திரம் எலனா ரைபாகினா கோப்பையை கைப்பற்றி அசத்தினார். பரபரப்பான இறுதிப் போட்டியில், இரு முறை நடப்பு சாம்பியனான அரினா சபலெங்காவுடன் (28 வயது, பெலாரஸ்) மோதிய ரைபாகினா (27 வயது) 6-4 என்ற கணக்கில் முதல் செட்டை கைப்பற்றி முன்னிலை பெற்றார்.

இரண்டாவது செட்டில் கடும் நெருக்கடி கொடுத்த சபலெங்கா, ரைபாகினாவின் சர்வீஸ் ஆட்டத்தை முறியடித்து 7-5 என வென்று சமநிலை ஏற்படுத்தினார். எனினும், 3வது மற்றும் கடைசி செட்டில் அதிரடியாக விளையாடி முழுமையாக ஆதிக்கம் செலுத்திய ரைபாகினா 6-4, 5-7, 6-2 என்ற செட் கணக்கில் வென்று முதல் முறையாக யுஎஸ் ஓபன் கோப்பையை முத்தமிட்டார். இப்போட்டி 2 மணி, 21 நிமிடத்துக்கு நீடித்தது.

யுஎஸ் ஓபனில் 2024 மற்றும் 2025ல் தொடர்ச்சியாக சாம்பியன் பட்டம் வென்றிருந்த சபலெங்காவின் ஹாட்ரிக் முயற்சி கை கூடவில்லை. காயம் காரணமாக அவதிப்பட்டு வந்த நிலையில், ரைபாகினா விடா முயற்சியுடன் போராடி தனது 3வது கிராண்ட் ஸ்லாம் பட்டத்தை வென்றுள்ளார். இவர் ரஷ்யாவில் பிறந்தவர் என்பது குறிப்பிடத்தக்கது.

* ரைபாகினா 2022 விம்பிள்டனில் தனது முதல் கிராண்ட் ஸ்லாம் பட்டத்தை வென்றார். அதன் பிறகு 2026 ஆஸ்திரேலிய ஓபன் பைனலில் சபலெங்காவை வீழ்த்தி 2வது கிராண்ட் ஸ்லாம் பட்டத்தையும், தற்போது யுஎஸ் ஓபனில் அதே சபலெங்காவை தோற்கடித்து 3வது பட்டத்தையும் கைப்பற்றி அசத்தியுள்ளார்.

* மகளிர் ஒறையர் பிரிவு தரவரிசையில் 99 வாரமாக முதலிடம் வகித்து வந்த சபலெங்கா, யுஎஸ் ஓபன் பைனலுக்கு முன்பாகவே ரைபாகினாவிடம் நம்பர் 1 அந்தஸ்தை பறிகொடுத்த நிலையில் மும்முறை சாம்பியனாகி ஹாட்ரிக் சாதனை படைக்கும் வாய்ப்பையும் இழந்தார். இன்று வெளியாகும் டபுள்யுடிஏ தரவரிசை பட்டியலில் ரைபாகினா முதலிடம் பிடித்ததற்கான அதிகாரப்பூர்வ அறிவிப்பு வெளியாகும்.

* தொடர்ச்சியாக 100 வாரங்களுக்கு நம்பர் 1ல் நீடித்த 6வது வீராங்கனை என்ற பெருமையை சபலெங்கா நூலிழையில் நழுவவிட்டார்.

* ஆஸ்திரேலிய ஓபன், விம்பிள்டன், யுஎஸ் ஓபன் பட்டங்களை தலா 1 முறை வென்றுள்ள ரைபாகினா, 2027 பிரெஞ்ச் ஓபனிலும் பட்டம் வென்றால் ‘கேரியர் ஸ்லாம்’ சாதனை படைக்கலாம்.