யுஎஸ் ஓபன் டென்னிஸ் அலெக்சாண்டர் ஸ்வெரவ் சாம்பியன்

நியூயார்க்: யுஎஸ் ஓபன் கிராண்ட் ஸ்லாம் டென்னிஸ் தொடரின் ஆண்கள் ஒற்றையர் பிரிவில், ஜெர்மனி வீரர் அலெக்சாண்டர் ஸ்வெரவ் சாம்பியன் பட்டம் வென்றார். இறுதிப் போட்டியில் அமெரிக்காவின் பென் ஷெல்டனுடன் (23 வயது, 9வது ரேங்க்) மோதிய ஸ்வெரவ் (29 வயது, 2வது ரேங்க்) 6-3 என்ற கணக்கில் முதல் செட்டை கைப்பற்றி முன்னிலை பெற்றார். 2வது செட்டில் ஷெல்டன் விடாப்பிடியாகப் போராடியதால் ஆட்டம் டை பிரேக்கர் வரை இழுபறியாக நீடித்தது.

அதில் ஸ்வெரவ் 7-6 (7-2) என வெற்றி பெற்று 2-0 என முன்னிலையை அதிகரித்துக்கொண்டார். எனினும், உள்ளூர் ரசிகர்களின் ஆதரவால் உத்வேகத்துடன் விளையாடிய ஷெல்டன் 3வது செட்டை 7-5 என கைப்பற்றி நம்பிக்கையை தக்கவைத்தார். 4வது செட்டில் தனது அனுபவ ஆட்டத்தை வெளிப்படுத்தி ஷெல்டனை திணறடித்த ஸ்வெரவ் 6-3, 7-6 (7-2), 5-7, 6-2 என்ற செட் கணக்கில் 3 மணி, 33 நிமிடம் போராடி வென்று யுஎஸ் ஓபனில் முதல் முறையாக சாம்பியன் பட்டம் வென்று சாதனை படைத்தார்.

இது அவர் வென்ற 2வது கிராண்ட் ஸ்லாம் பட்டமாகும். முன்னதாக, 2026 பிரெஞ்ச் ஓபனில் அவர் தனது முதல் கிராண்ட் ஸ்லாம் பட்டத்தை கைப்பற்றியிருந்தார். 2026 விம்பிள்டனிலும் பைனல் வரை முன்னேறிய அவர் இத்தாலியின் யானிக் சின்னரிடம் தோற்று 2வது இடம் பிடித்தார். யுஎஸ் ஓபனில் 23 ஆண்டுகளுக்குப் பிறகு பட்டம் வெல்லும் முதல் அமெரிக்க வீரர் என்ற சாதனை படைக்கும் வாய்ப்பை ஷெல்டன் நழுவவிட்டார். 2003ல் அமெரிக்காவின் ஆண்டி ரோடிக் யுஎஸ் ஓபன் கோப்பையை கைப்பற்றி இருந்தார்.

ஆண்கள் ஒற்றையர் பிரிவில் கடந்த 20 ஆண்டுகளாக ரோஜர் பெடரர், ரபேல் நடால், நோவாக் ஜோகோவிச் ஆகியோர் ஆதிக்கம் செலுத்தி வந்ததால், கிராண்ட் ஸ்லாம் பட்டம் வெல்ல முடியாமல் தவித்து வந்த ஸ்வெரவ் தற்போது அவர்களின் சவால் இல்லாத நிலையில், மேலும் பல வெற்றிகளைக் குவிப்பார் என எதிர்பார்க்கப்படுகிறது. இளம் வீரர் பென் ஷெல்டனும் அமெரிக்காவின் புதிய நம்பிக்கை நட்சத்திரமாக உருவெடுத்துள்ளார். அடுத்த சீசனில் சின்னர், அல்கராஸ், ஸ்வெரவ், ஷெல்டன் இடையே போட்டி கடுமையாக இருக்கும் என்பதில் சந்தேகமில்லை.

* டபுள்யு.டி.ஏ தரவரிசை மகளிர் ஒற்றையர் டாப் 10

ரேங்க் வீராங்கனை புள்ளி

1. எலனா ரைபாகினா (கஜகஸ்தான்) 9,901

2. அரினா சபலெங்கா (பெலாரஸ்) 7,875

3. ஜெஸ்ஸிகா பெகுலா (அமெரிக்கா) 7,265

4. கோகோ காஃப் (அமெரிக்கா) 7,244

5. மிரா ஆண்ட்ரீவா (ரஷ்யா) 5.743

6. லிண்டா நோஸ்கோவா (செக்.) 5,328

7. எலினா ஸ்விடோலினா (உக்ரைன்) 4,809

8. கரோலினா முச்சோவா (செக்.) 4,683

9. இகா ஸ்வியாடெக் (போலந்து) 4,619

10. மார்தா கோஸ்டியுக் (உக்ரைன்) 3,980