சுனாமி குடிநீர் திட்ட குழாய் பதிக்க தோண்டப்பட்ட பள்ளத்தால் கடும் போக்குவரத்து நெரிசல்

*மண்ணை வெளியில் விற்பனை செய்வதாக குற்றச்சாட்டு

கருங்கல் : குமரி மாவட்டத்தில் 79 கடலோர கிராமங்கள், 17 பேரூராட்சிகள் மற்றும் 19 வழியோர கிராமங்களில் பொதுமக்களுக்கு தூய்மையான குடிநீர் வழங்கும் வகையில் கடந்த 2006ம் ஆண்டு சுனாமி கூட்டு குடிநீர் திட்டம் செயல்படுத்தப்பட்டது. இதற்காக காப்புக்காடு முதல் தொலையாவட்டம், கருங்கல், மாத்திரவிளை, திக்கணங்கோடு வழியாக கோவளம் வரை சுமார் 60 கி.மீ. தொலைவுக்கு சாலையில் குழாய்கள் பதிக்கப்பட்டு குடிநீர் வினியோகம் செய்யப்பட்டு வருகிறது.

இந்த நிலையில் சமீபகாலமாக குழாய்களில் ஏற்படும் அழுத்தம் மற்றும் சாலையில் செல்லும் கனரக வாகனங்களால் குடிநீர் குழாய்களில் அடிக்கடி உடைப்பு ஏற்பட்டு வந்தது. குறிப்பாக கிள்ளியூர் தொகுதிக்குட்பட்ட பகுதிகளில் அதிகளவில் சுனாமி கூட்டுகுடிநீர் திட்ட குழாய்களில் உடைப்பு ஏற்பட்டு ராட்சத பள்ளங்கள் ஏற்பட்டன. இந்த பள்ளங்களில் வாகன ஓட்டிகள் சிலர் தவறி விழுந்து இறந்த சம்பவங்களும் நடந்தன.

இது குறித்து அறிந்த ராஜேஷ்குமார் எம்எல்ஏ சட்டமன்றத்தில் குடிநீர் குழாய் உடைப்பு குறித்து பேசி முதலமைச்சர் மற்றும் அமைச்சர் கவனத்திற்கு கொண்டு சென்றார். இதை தொடர்ந்து கிள்ளியூர் தொகுதியில் ரூ.26.68 கோடி மதிப்பில் சாலையோரமாக டிஐ பைப் பதித்து குடிநீர் வழங்க நிதி ஒதுக்கப்பட்டு கடந்த சில மாதங்களுக்கு முன்பு பணிகள் தொடங்கின. இந்த திட்டத்தில் சாலைகளில் பள்ளம் தோண்டாமல் சாலையோரம் தோண்டி பைப் பதிப்பதாகும்.

இதையடுத்து பணிகள் தொடங்கி சாலையோரங்களில் பள்ளம் தோண்டி டிஐ பைப் அமைத்து அதன் மீது பெட்மிக்ஸ் போட்டு அதன் மீது காங்கிரீட் அமைக்கும் பணிகள் நடந்து வந்தன. இந்த பணிகளுக்காக சம்பந்தப்பட்ட காண்டிராக்டர் நெடுஞ்சாலைத்துறைக்கு ரூ.6 கோடி வரை கொடுத்ததாக கூறப்படுகிறது.இந்த நிலையில் கருங்கல் அருகே மாங்கரை பகுதியில் சாலையோரம் டிஐ பைப் பதிக்க தோண்டப்பட்ட பள்ளம் மூடப்படாமலும், பணிகள் நடைபெறாமலும் இருந்தன.

இதனால் கடந்த சில நாட்களுக்கு முன்பு பைக்குகளில் வந்த 3 பேர் பள்ளத்தில் தவறி விழுந்து படுகாயம் அடைந்தனர். மேலும் கருங்கல்- புதுக்கடை சாலையில் சில நாட்களாக கடுமையான போக்குவரத்து நெரிசலும் ஏற்பட்டது.

இதற்கிடையே நேற்று முன்தினம் அந்த வழியாக வந்த ராஜேஷ்குமார் எம்எல்ஏ போக்குவரத்து நெரிசலை கண்டார். பின்னர் அவரது அறிவுறுத்தலின்பேரில் காங்கிரஸ் தொண்டர்கள் வந்து போக்குவரத்து நெரிசலை சரி செய்தனர். இதுகுறித்து ராஜேஷ்குமார் எம்எல்ஏ கூறுகையில், மாங்கரை பகுதியில் குடிநீர் குழாய் பதிக்க சாலையோரம் தோண்டப்பட்ட பள்ளம் மூடப்படாமல் இருக்கிறது. இதனால் இப்பகுதியில் கடுமையான போக்குவரத்து நெரிசல் ஏற்படுகிறது.

பள்ளத்தை மூடி சரிசெய்ய எந்த பணிகளும் நடைபெறவில்லை. மேலும் பள்ளம் தோண்ட எடுக்கப்பட்ட மண் நெடுஞ்சாலைகளில் ஏற்பட்ட பள்ளங்களை சரி செய்ய பயன்படுத்தாமல் லாரிகளில் ஏற்றி திருடி விற்பனைக்கு கொண்டு செல்லப்படுகிறது. எனவே சம்பந்தப்பட்ட அதிகாரிகள் நடவடிக்கை எடுத்து சாலையோர பள்ளங்களை மூடி, மண்ணை நெடுஞ்சாலை பணிகளுக்கு பயன்படுத்த வேண்டும் என்றார்.