டிட்வா புயல் எதிரொலியாக கனமழையை எதிர்கொள்ள மின்வாரியம் தயார் நிலையில் உள்ளது: மின்வாரிய தலைவர் தகவல்

சென்னை:டிட்வா புயல் எதிரொலியாக கனமழையை எதிர்கொள்ள மின்வாரியம் தயார் நிலையில் உள்ளது என மின்வாரிய தலைவர் ராதாகிருஷணன் தகவல் தெரிவித்தார். மழையால் ஏற்படும் மின் பாதிப்புகள் குறித்த பிரச்சனைகளை 94987 94987 என்ற எண்ணில் தெரிவிக்கலாம் என தெரிவிக்கப்பட்டது. மின்கம்பி தொங்கிக் கொண்டிருந்தால் மின்வாரியத்துக்கு தகவல் தெரிவிக்கலாம் என மின்வாரிய தலைவர் ராதாகிருஷணன் தெரிவித்துள்ளார். அவசரகாலத்தில் மறுசீரமைப்பு பணிகளை செய்ய 99 வாக்கி டாக்கி கருவிகள் களப்பொறியாளர்களுக்கு தரப்பட்டுள்ளன.

சென்னை மாநகராட்சியில் இருந்து தரப்பட்ட 50 வாக்கி டாக்கி கருவிகளும் வழங்கப்பட்டுள்ளன. 3.3 லட்சம் மின்கம்பங்கள், 9,568 கி.மீ. மின்கம்பிகள், 13,029 மின்மாற்றிகள் இருப்பில் உள்ளன. ஜே.சி.பி.,கிரேன்கள் உள்ளிட்ட கனரக இயந்திரங்களை வாடகை அடிப்படையில் கிடைப்பது உறுதி செய்யப்பட்டுள்ளது. மரம் வெட்டும் உபகரணங்கள், பிற கருவிகள் பயன்பாட்டு நிலையில் இருப்பது உறுதி செய்யப்பட்டுள்ளன. சென்னையில் உள்ள 5 மின்பகிர்மான வட்டங்களில் தலா 200 களப் பணியாளர்கள் தயார் நிலையில் உள்ளனர்.1,000 களப் பணியாளர்களுடன் 750 ஒப்பந்த தொழிலாளர்களும் தயார் நிலையில் நிறுத்தபட்டுள்ளதாக மின்வாரிய தலைவர் ராதாகிருஷணன் தகவல் தெரிவித்தார். மக்களின் குறைகளை தீர்க்கும் வகையில் 24 மணி நேரமும் மின்னகம் சேவை மையம் பயன்பாட்டில் உள்ளது என தெரிவித்தார்.